DMAIC for Distress Meeting Arguing Ignore Confuse

 

喺職場做到中層，唔少人都學過一籮籮嘅管理學技巧同品質管理工具，乜嘢PDCA、SWOT Analysis、Six Sigma、GSTD、DMICA、Lean，名堂多到你背都背唔晒。理論上，呢啲工具應該幫到你提升效率、改善流程、解決問題，聽落好似好勁，但真實世界點樣？應用起來真係一言難盡。呢啲西洋傳入嘅管理學玩意，漂洋過海來到香港，十有八九係水土不服，落地生根？多數係DOA (Death on arrival)落地即死。

話說當年我年少無知，誤入歧途，入咗一間行Six Sigma嘅公司，成日話要「優化流程」、「數據驅動決策」，聽落好似好高大上。入職唔夠半年，比人assign咗去做一個DMAIC項目。DMAIC係Define、Measure、Analyze、Improve、Control，一套解決問題嘅步驟，聽落好有條理。書本同培訓講到天花亂墜，話首要步驟係要組一條跨部門嘅multi-functional team，集合唔同部門嘅專長同觀點，先至可以全面睇問題、搵方案。聽完覺得好有道理，信心滿滿，諗住大展拳腳。

但現實點樣？問題即刻浮現。你只不過係一個普通中級職員，無權無勢，連自己部門嘅printer壞咗都要等IT排期嚟整，你點樣跨部門call一條team出嚟？實際上，係好難搵齊人，所以多數係由高層直接欽點一堆三唔識七、九唔搭八嘅人出黎做。

到第一次開會，定好晒時間地點，寄咗Outlook invite，點知到咗開會嗰日，會議室得你一個同你個PowerPoint。然後你逐個部門捉雞咁捉去搵人，去到財務部搵阿Ken，佢話月尾要埋數行唔開，有乜事搵佢阿姐。你膽粗粗敲佢阿姐門，道明來意。阿姐坐一坐正話：「呢啲project我哋唔熟，你同你嘅部門head confirm咗我哋要點配合先？大家都忙我地share唔到人手比你地。對公司真係咁重要嘅話，點解唔係你dept head做？」意思係，你膊頭無花就躝啦。加上背後，財務部阿姐同你阿頭可能唔啱牙，做乜放人幫你抬轎。

好唔容易先捉到小貓兩三隻入黎，勉強開完第一次會大家認識下。

無計可施之下，只好將件事escalate上去，多數呢類DMAIC會有個高層sponsor。點知高層一臉不耐煩，先屌你一鑊：「連開個會咁小事都要我出面，你點做project lead？」然後佢出咗一封措辭唔係好客氣嘅email，cc晒全公司M grade，話「請各部門主管配合某某嘅DMAIC項目，確保有代表出席會議」。你以為咁就解決問題？錯晒！呢封email一出，等於同全公司宣佈你篤人背脊，得罪晒全世界。

到咗最後，呢啲所謂嘅DMAIC項目，多數係team leader一個人孤軍作戰。Define問題？自己寫。Measure數據？自己搵。Analyze原因？自己諗。Improve方案？自己試。Control結果？自己跟。Team？咩team？Microsoft就有個team！根本得你一個人喺度捱。而家好啲有AI。

到最後present day仲要唉契弟咁唉班teammate出席，唔好比人察覺原來得一個人做，佢地乜都無做過，唔係又比高層屌多鑊。

辛苦做晒啲report同presentation，拎去同高層匯報，對住成班C字頭：「為咗減低異物污物，我地建議加購一部金屬探測器，安裝係生產線。」你仲懶醒咁搵埋幾個唔同牌子報價，一部效能好少少的機可能要成十幾廿萬，最差買部大陸機可能都要五萬。財務部總監出聲問你，兩萬蚊可唔可行，你答兩萬蚊應該就唔得，用目光掃射下其他高層求救。換來係CFO掉低一句：「你知唔知集團今年P&L係幾多。」我區區一個prodcution officer咋，撚知成間公司個P&L咩。

無錢當初就咪鳩做啦。

結果，你忙咗半年，開咗無數OT嘅DMAIC，台上一鞠躬落幕。班高層就繼續開第二個DMAIC搵第二個受害者。

當年眼見好多DMAIC project都係咁，個Project leader自己一個人做晒，或者至少做咗八到九成。個Improve多數因為要駛錢要資源，而無咗下文。

或者你會諗，如果由高層親自lead呢啲項目，會唔會好啲？理論上，高層有權有勢，跨部門合作應該無咁多阻力。的確，如果係CEO或者GM親自出馬，下面嘅人多數唔敢推搪，開會一定全齊，個個正襟危坐。但問題又嚟喇：高層親自lead，下面嘅人仲敢唔敢講真話？多數係唔敢。佢哋會點頭附和高層嘅意見，唔敢提出反對或者新想法，結果變咗一言堂，Brainstrom環節高層一個人演講二十分鐘。原本DMAIC講求集思廣益，靠multi-functional team嘅多元觀點去搵最佳方案，但高層一lead，條team淨係變咗一班yes-man，失咗跨部門合作嘅真正意義。

講到底，呢啲西洋管理工具喺香港職場水土不服，唔單止係文化差異，仲有公司內部嘅權力結構同人際關係作怪。中層夾喺中間，無權無勢，空有一身理論，多數係有心無力，或者係無心無力，或者係有心無錢，或者係無錢自然無力。高層又未必真心buy-in，只係將呢啲工具當成fancy嘅buzzword，攞嚟同board交代或者喺年報入面吹水。最終，DMAIC、Six Sigma呢啲野，淨係變咗一場場職場真人騷，熱熱鬧鬧咁開場，冷冷清清咁收場。