Coaching係乜東東？

上次講到果間會用six sigma的公司，另一樣野班管理層成日掛係口邊係coaching。

Coaching係近十幾年係企業好流行的管理技巧，真正的定義我唔算好清楚，大概係「依照對方個人的長處及經驗，引導對方自己發掘答案，而不限制解決問題的方法」。背後理念係，因為每個人優點缺點唔同，只有自己知道最適合自己的方法，即使個方法對我而言係比較好，對其他人未必一定，指定一個方法亦限制咗對方成長。

我寫得出黎，梗係「幻想美麗，現實殘酷」。

當然，可能係遇到bad coach，但我遇到真實的情況係：

「我明明知道答案，但我唔會講比你聽等你估，再用5 whys 問到你口啞啞答唔出，顯示出我幾咁英明神武，最後見你搵到個解決方法係錯，我亦唔會出聲提你，因為coaching係唔會提供特定答案，但到你做錯我絕對會屌鳩你兼出warning letter。」

 小弟係做食品業，當年我好深印象一次係初初係呢間公司返工，唔知佢地原來唔鼓勵伙計戴手套，而係叫人勤洗手。咁我有一日出去做野時，就戴咗對手套，咁啱比廠長見到，廠長的我埋一邊問：

「你做咩戴手套？」

「怕整污糟對手。」

 

「你好怕整污糟對手咩？」

「咁做野方便啲啫，唔駛行返出門口洗手。」

 

「你好怕行黎行去咩？」

「咁做緊野唔方便行開。」

 

「你做緊乜唔方便行開？」

「因為記錄緊啲生產數據唔方便行開。」

一來一回咁樣比佢捽咗成幾分鐘，最後我先叮一聲：「你想我除手套？」

然後除咗手套，廠長大人好滿意咁行開了，留下一臉茫然的我。

多年後我回想返件事，其實佢只要行過黎，同我講：「我地公司做法唔建議同事戴手套，因為咁會忽略咗去洗手，對手套戴成日仲污糟過唔戴。」清晰簡單易明，又達到效果，為乜要繞咁大個圈呢。

呢一次只係我少少同呢位廠長交手的經驗，日後同佢開生產會議，差唔多次次都咁，一個問題不斷咁追問落去，直到無人應到機答唔出，不過到最後佢係唔會講件事應該點做，而係都係由返班仔自己諗。

係呢份工，令我深深懷疑到coaching呢個管理技巧，究竟係條友用得衰，定真係有根本上的缺點。明明係「解決問題的方式有千萬種，不應限制對方發挖屬於自己的方法，只能引導」，去到真正的執行，卻淪為「我不會提供答案，即使我係知道點解，我只能不斷咁逼問你，等你透過排除法最後得到我心目中的答案，即使到最後你個答案係錯，我亦唔會糾正你等你錯。」

即係問港女食乜好咁：

泰國菜？
唔想食辣。

日本菜？
唔想食生冷野。

打邊爐？
唔想食熱氣野。

韓燒？
都話唔想食熱氣野。

咁你想食乜？
無所謂，你話事啦，食乜都得。

或者係其他行業可能合用，但工廠入面，99%的程序係有晒SOP，可以比人發揮探索的空間本來好細，一個試錯可能令公司唔見幾十萬至幾百萬不等，你叫一般同事點會受你coaching去搵個適合自己的方法？出咗事邊個孭鑊？

定大家有遇過好的coaching，可以分享一下。