有個朋友結婚無耐就生左兩件，呢排又見佢老婆又大肚，聽到佢呻話擔心屋企唔夠用，開始諗緊係唔係要買樓，預備日後生活。
咁作為朋友，當然係聽下佢呻，約出黎食餐飯咁。
「其實你做乜結完婚咁快就生幾件，唔享受下二人世界先。」
「我同老婆都係信徒，結婚前都傾好左，仔女係神賜比我地福氣，我地只會順其自然，有得生就生。如果呢個係上帝嘅心意，佢自然會幫我地諗出路。」
「其實你而家呢度都唔差丫，雖然係租，但地方都叫見駛，業主又無乜話要趕你走，只要你唔好係咁生，五個人都應該住得落，駛乜又要再搵個大D地方，而家樓價又咁貴，拖住幾件細搬屋又麻煩。」
「你未結婚未有小朋友，你唔明架喇，我唔係想淨係要一個大D嘅地方，我係想要一個穩定嘅家，比到一個將來我老婆同仔女，三房係最基本。」
「妖，你而家頭家好唔穩定咩，你份人好無將來咩，你而家無錢丫嘛，無錢就要面對現實架啦。」
「租人地方始終唔夠自己地方好嘛，我覺得錢唔係問題，只要有信心，無野係解決唔到。加上如果有自己地方，我又可以開放屋止比D教友上下黎聚會，又可以款待D未信者同佢地傳福音，呢個係我地嘅夢想。」
「香港地有錢就有夢想，咁你而家幾錢人工。」
「二萬。」
「咁有幾多儲蓄？」
「加加埋埋都有十萬。」
「就憑呢D咁你想買個三房單位？！你知唔知而家樓市幾錢呎？你過鬼到壓力測試呀！」
「所以今次約你出黎就係想問你攞住五十萬做首期，日後仲希望你一齊幫手供，只要你肯幫我，相信神會大大祝福你，我仲問咗肥強同阿May。其實你比到幾多唔係問題，最緊要係拓展神國入面有份。」
「我約左人，走先，下次再傾，祝你買得成。」
沒有留言:
張貼留言