移民感恩見證

 今年內，敝教會已經有三名執事決定賣樓移民，圈子內的朋友，所有人的話題離不開移民及預備移民，有實力的美加美澳，無實力的台灣、泰國、馬來西亞。

耶和華是我的避難所，不過真是要避難的話，去外國比較好；

耶和華是我的保障，但手持外國護照好像更有保障；

耶和華是我的盾牌，但離岸美元戶口是我的後盾。

 

以上相信是好多中產信徒心裡想法，即是已經在教會中做到執事、董事、主席、長老的信徒，他們多參與事奉、對教會有供獻，有美好的名聲，經常一副信心滿滿的姿態：

「神與我同在，無論去到邊，遇到乜都唔駛怕。」

所以去到英美澳加，上帝一樣與他們同在，而且這批人最早有能力離開。

 

估計未來幾年，教會內出現大量的移民感恩見證，大概會是這樣：

 

大家XX堂嘅弟兄姊妹早晨，同隔離果個講：「耶穌愛你，我都愛你！」

 

今日上到黎係想分享一下我呢幾年預備移民嘅經驗，係當中我地一家人睇到神嘅看顧同帶領。

 

早喺二零一五年，我係一次靈修嘅時候聽到聖靈嘅聲音，叫我要移民，我問主：『吓，主呀，點會呀，我成家人係香港，你點會叫我走呀，我好唔捨得香港呀。』我一直將呢係事放係心入面禱告，無同人講，希望神有更清楚嘅聲音話比我知，因為我唔想自己誤會咗神，我係好想行係佢預備喞路上面。

 

呢個移民嘅異像一直無改變，反而越黎越清楚，我同神講，我知你要我離開香港，但我要去邊呢，我再一次祈禱求問神。直到有一次我聽到牧師講道，講到英國嘅基督教衰落，好多好有歷史嘅教堂，都要賣比人做其他野。我聽到之後就問神，係咪英國架，係咪英國架。當時神無回應我，要我等待佢嘅旨意。

 

我一直不斷咁求問神，但佢都無答我。我諗，我係咪一直咁等佢嘅回應，所以佢唔回應我，佢係要我有行動。就係呢個時候，牧者講道啱啱講到阿伯拉罕嘅故事，講到阿伯拉罕受到神嘅呼召，佢自己都唔知要去邊，但佢捉住上帝嘅應許，令到佢成為萬國之父。我覺得神真係好愛我，係我最需要佢嘅時候就籍住牧師嘅講道提醒我。

但係有一件事我係好掛心，我有同老公講過我收到上帝要我移民嘅異像，但佢一直無乜點理過，一直去到舊年我老公終於同樣收到神嘅感動，開始同我傾移民嘅事，我當時心入面真係好激動，神終於回應我嘅禱告。

 

因為時間嘅關係，好多常中嘅細節我唔詳細講，上帝預備比人嘅豐富，完全係超過我地所想所求，係移民呢件事上，我不斷咁見到上帝嘅預備同開路。我地兩公婆唔係咩專業人士，英文又唔係好，突然英國又比用BNO可以移民，咁啱當年我地兩個有申請過。移民要用好多錢，但原來神已經一早為我地預備咗。當年我同老公係零三年結婚，當時樓價跌到好低，好多人叫我小心入市，層樓今日已經升咗好多倍，我地完全唔駛擔心錢嘅問題。恩恩同信信好快又係果邊搵到學校，每一件事上，我地見到神係點樣一步一步咁帶領住我全家去英國。

 

雖然我地一家人離開咗香港，但我仍然係XX堂嘅一家人，大家仍然可以係主內互相關心，而家互聯網真係好方便，可以時時刻刻咁見面。我知道在座好多人無諗過移民，但神係你身上一定有佢嘅計劃，只要你肯相信佢同埋憑信心踏上，神係信實，佢一定唔會呃你。即使你地決定留返係香港，我深信神必然有佢嘅美意，只要你肯相信佢。

 

到最後我想分享一首詩歌。