終於有工返

 

為咗證明個blog未死，出返篇文先。

終於有工返。

差唔多兩年有多前，疫情下公司執笠，最後頂咗比另一間公司，間新公司搵返我地舊人留低。當其時我已經搵到新工，不過諗住做生不如做熟，點知燒焦咗。

係新公司第一次面試唔係好順利，因為當時公司執笠，我對上個廠長早就聞風先遁跳咗船搵咗新工，係我幫公司善後搞讉散。咁間新公司以為我係廠長，後尾知道唔係想壓我價，幾個來回後差唔多以原有條件留任，仲安排咗個Senior production manager係我上面。

 新入場，要裝修，改過格局適應新公司生產。做開呢啲就明，啲野用開唔郁可以捱好耐，你換下電線搬下位隨時就壞比你睇。當時已經同對方GM講，工場二十年黎無做過大維修，你要有準備好多野未必合你地心意要大改，好多野要換，要洗你唔少錢。

 咁係裝修期間亦真係出過事，原有隻強化地磚間廠已經執笠，搵唔返同一款，以前靠修修補補頂住先，一係就全數鏟起換過晒，一係好似砌圖咁塞唔同磚上去。咁成間廠換地磚要幾球，亦拖慢咗重新開張的日子。

 事後係點我就唔知，因為返咗工一個月佢就炒咗我，而我亦唔知係咪因為呢件事而引發。

 有啲好彩，之前in個份工未請人，面懵懵打去R撈，暫時唔駛失業。不過果到又係跳出一個火坑，跳入一個屎坑，結果做咗半年，真係勁頂唔順下，係疫情最嚴重下裸辭。

 好幾次我都懷疑自己有無做錯決定，不過事後問過啲更高層同社會經驗比我更豐富嘅人，都支持我走，話當時個局無得拆。因為我係被空降到分公司做主管，但分公司被總公司收購後，並無請走原有老闆，原老闆仍然係有股份係到返工。佢既唔係我上司(我直接向總公司負責)，又唔係我下屬(我無辦法分咐佢做野)，又唔係我拍檔(佢有股份係老闆)。如果總公司有足夠支持，我諗亦唔係無得做，但偏偏總公司內部權鬥又好嚴重，隔離部門有大粒想上位，搞唔到啲高層，就黎搞我地班細，做野咁耐都未試過開會真係會比人用手指指住黎鬧。

最後兩面夾攻真係頂唔順，壓力太大唔辭工肯定捱到精神出問題，之前08年失業後第一份工又係咁，諗住好歹捱夠一年，最後要用幾年時間先慢慢平復係工作上的創傷。

然後，係慢長的失業時間。

係失業期間，都算努力搵工，apply過我諗有超過100分工，真係見過連phone in 同zoom in差唔多有二十份。兩次失業經歷，令我感到香港班HR請人時，真係好唔專業。

唔知撞乜鬼，香港招聘廣告，好多係唔寫人工，連range都無，大家靠估，連我想屈就都唔知開咩價好。當然係行業耐，大概知個譜，但有時又免不過去諗，如果真係差得少少而無得面試，又係好失落。當然，你唔叫我去見還好，上到去先同我講budget差少少，橫掂我都上到黎，不如開門見山講差幾多，睇下有無辦法。有時候覺得，HR都係打份工，唔好為難啲打工仔啦。

其次，我見過咁多份，個HR未必係最大問題，而係本身公司唔知想請乜人，然後叫HR乜人都call上黎見。見成二十份工，覺得同我經驗及能力真係關事覺得啱做，得三到四份左右，其他大部份，傾頭果幾句已經強烈覺得，「喂，你叫我上黎把撚呀，完全都唔係果回事。」禮貌上當然客客氣氣見埋。

之前係FB寫過，去年見份工，first in就見佢operation大佬，個大佬無問題幾乎想即時請我，連條件都傾好埋，只不過話巡例見見老闆。Second in見老闆係個三十幾歲的後生仔，工作上佢一樣野都無問我，淨係不斷問我出面有無connection，帶唔帶到生意比佢，但我份工係QA喎。

結果見唔成。

最後，呢個世界，都係識人好過識字，見得成呢份工，係熟人介紹。

 呢段時間，重心過去去專比老人玩的FB，各方友好不妨Add 下

 https://www.facebook.com/profile.php?id=100076554320014