網絡宣教？！咩黎架

首先係搞全球華人網絡異像分享祈禱會，邀請班六七十歲或以上嘅知名教牧，分享網絡宣教嘅異象。

下一步搵金主籌錢，成立網絡宣教中心，委任返班平均年齡七十歲嘅主席、副主席、總幹事，最緊要跟返政府薪酬表，同埋記得畫大餅，滾返兩個後生入局做幹事，因為班老人家乜都唔識。人工有咁低得咁低，最好自酬薪金，為主作工不入計較，先求祂的國和祂的義，幫班老人家開FB、IG、X、threads同小紅書，平時拍片剪片出post。

一開始搞個講座，題目係《網絡對當今教會全面的影響與破壞》，youtube直播，時間係平日朝十點，記得閂咗chatroom等大家專心聽，放幾個月得幾十view。

本身個年青幹事有啲雄心，但諗啲橋全部比人ban晒，每日只係用唔同account出經文post同長輩圖，下面一大堆老人家留言：阿門阿門阿門阿門阿門阿門阿門阿門阿門阿門阿門阿門阿門阿門。

過咗半年首批資金用得七七八八，咁緊係出黎告急啦，學下影音使團咁發緊急代禱呼求。機構可以沒有異象，但不可以沒有奉獻。

於是推出救亡大計「全球華人100日禱告運動」。每日朝十點準時YouTube直播，畫面永遠係主席坐喺書枱前，放枝咪，背景係個書櫃。內容只有兩樣：讀一段經文，然後十五分鐘嘅「帶領禱告」，重點係反覆強調「主話施比受更為有福」同「奉獻係屬靈投資，永不虧本」、「拯救靈魂非金錢可衡量」。

年輕幹事負責剪片、加字幕、寫title、出post。佢試過偷偷加咗啲meme試下炒氣氛，即刻畀副主席WhatsApp「呢啲圖唔夠造就人，麻煩刪！」

直播chatroom今次破天荒開返，但設咗「只限付費會員」。結果畫面下面永遠得兩條訊息循環：一條係總幹事夫人發嘅「阿門」，另一條係主席自己小號發嘅「奉獻二維碼喺description」。

奇蹟出現咗。運動進行到第87日，有位匿名弟兄一次過奉獻咗三十萬，剛好夠清還晒拖咗半年嘅年輕幹事人工、場地租同機房費。董事會即刻開香檳慶祝，主席含淚宣佈：「睇到嗎？主真係信實！佢用呢筆錢證明咗我哋嘅方向完全正確！」

年輕幹事終於攞到人工，第二日就遞咗辭職信。主席好語重心長同佢講：「我以前全職事奉時都試過出唔到糧（下刪三萬字），最後神一樣保守到今日。」

機構冇咗異象，唔緊要；冇咗年輕人，唔緊要；班教牧唔識網絡文化，唔緊要；最緊要係三十萬，網絡宣教事工可以繼續做。