警告!

本人並沒有接受過任何正統神學訓練,所有發表內容,全屬個人信仰心得及教會生活經驗分享,敝blog負能量爆燈,如閱讀時感到不適,或出現任何不良反應,包括痰多咳嗽,夜睡不寧,神經緊張,潮熱汗出,心煩多疑,踎身起身見頭暈等徵狀,請即時停止,並向專業人士尋求協助。

2018年1月3日 星期三

以跑為喻


如果問近年邊個宗教發展得最快,相信係跑步。

跑步點傳教架呢?


如果跑步學基督教咁做的話:

首先佢地會籌錢去起運動場,認為無一個屬於自己全資擁有的私人運動場,跑步界好難有發展,跑友好難有進步。但花費巨資起好之後,個運動場平日大部份時間係丟空,只係星期六日最多人用。然後佢地仲會話一個運動場係唔夠,要不停咁擴建,不停咁籌錢,同不停咁擴建,再不停咁籌錢。幾時先會停,無人知;擴到幾大先叫夠,唔會有人理。

之後佢地會再籌幾千萬搞一個全港性的宣傳大會,認為如果唔做宣傳的話,其他人又點會知道跑步的好處,無人話比大家聽的話,又點會有人跑步。宣傳大會請好多名星同高官上台,去講跑步有幾好,大家快D去跑,不過你從來無見過呢班人跑過,仲會作一首跑步歌比大家一齊唱。大家係會上好感動,認為跑步真係一種好好的運動,值得大家去推廣,結尾仲會呼籲大家一齊決志去跑步,然後散場返屋企。

籌幾千萬開拍大型紀錄片,遠赴希臘馬拉松考古,宣稱搵到當年跑死嘅士兵菲迪皮德斯個墳墓,開個記者會,有人拎住對草鞋,話已經99.9%確認係當年菲迪皮德斯著過黎跑。

佢地會組織好多人係街上面同人講,跑步有幾好,大家應該一齊去跑步,如果你唔跑的話就心臟病高血壓糖尿病,好快會死。

平時星期六日,去到運動場,坐埋一齊,大家分享跑步心得,有咩秘訣,研究邊本講跑步的書好睇,然後去飲茶。

會分開老人組、成人組、夫妻組、大專組、中學組同兒童組,認為所有人一齊跑唔係咁好,因為大家需要唔同。

教你跑步班教練,好多自己無跑開,甚至係從來無跑過,經常一度文裝咁到場。因為佢地認為,只要同班跑友夠熟,會理解佢地需要,唔駛親身落場跑,跑唔跑步唔係重點,最重要係令到大家去跑,同埋搵多D人黎一齊跑。

訓練量好輕,黎黎去去都係練幾樣野,跑三兩K就休息,因為擔心加重訓練量會嚇走D新人,班舊人要想進步要自己私下練,或者永遠唔求進步。但係你跑得快跑得耐,會比教練stop你,認為你會影響其他人訓練進度。

規定跑友只可以同跑友拍拖結婚,因為擔心同一個唔跑步的人拍拖結婚,會影響到本身跑開個人都唔跑。

會開間跑步學校,專門教授各種跑步知識,班老師唔多落場跑,但佢地會認為自己係成個跑界最重要的人,成日出黎指指點點D人應該點跑。

平日點練跑都無用,星期日一定要去運動場跑,因為不可以停止跑步。如果要輪班工作,星期日跑唔到咁點,教練會索性叫你轉過份工。

佢地會專搵一D中產以上的人去跑,因為咁先可以提升整體形像,再吸引多D人黎跑。

跑步運動近年嘅發展,會唔會比到教會一D啟示呢。

我近日開始跑返步,除咗想運動保持健康,其中一個原因,係因為身邊好多朋友去跑。從傍觀察,我慢慢察覺到,當你要宣揚一件事,希望其他人一齊去做,最有效的方法,係自己去做,堅持去做。做到一個地步,成為你生命一部份,根本唔需要「傳教」,會自然流露出黎,而呢種自然流露,亦會好自然地吸引其他人的好奇。

譬如,我諗好多跑友自己唔覺,但我無跑開就好覺,佢地一坐埋,好自然會傾關於跑步d野,買邊隻錶,邊對跑鞋好著,邊條路好跑難跑,報邊個比賽好。聽得多,身邊人會潛移默化地受影響,睇住佢地跑到瘦咗又黑咗,以前行步路話攰,到跑馬拉松跑咗五個鐘,由夜鬼變成朝朝早五點起身跑步,我覺得呢種轉變係好 Amazing ,不其然想試下,睇下自己極限去到邊。咁呢個時候,順水推舟,邀請人一齊去跑,自然水到渠成,駛鬼又報佳音又街頭佈道又大型佈道會又拍紀錄片。

2 則留言:

  1. 有部分人跟隊跑了一段時間,慢慢發覺原來練跑嘅姿勢唔多正確,又得唔到專業嘅指導,令到條腿越跑越粗。如是者,就唔再跑步,過檔其他運動,又或休養生息。

    回覆刪除
  2. 如果信仰好似跑步咁眼睇得到就好... 人地一味主啊主啊,但個心諗乜你都只能夠係估下估下。好似陳日君咁出黎鬧下共產黨係咪就信得好堅呢?天曉得...不過鬧得都型就係,好過梁美芬777之流。

    回覆刪除