咩叫嫁畀耶穌呢？

見到藝人張文慈話自己要嫁畀耶穌(張文慈怕醜「出嫁」)，又令我諗起近年成日出現一個信仰疑難，教會入面有好多講法，對上搵唔到一個聖經跟據，中間又睇唔到係教會傳統，對落又好唔合常理同邏輯，同時，亦唔見有咩教牧真係拎過上台講，但係信徒就係咁信咁做。知其然，而不知其所以然，莫審其出身本末者也。

所謂嫁比耶穌呢個講法，完全係合乎以上條件。

如果睇聖經，新約有講過教會係基督的新婦，舊約亦多次將神與以色列的關係，比喻做夫婦，最明顯當然係何西亞書，上帝叫何西亞娶淫婦歌蔑，去表達以色列即使背叛上帝，但上帝依舊對佢地不離不棄。但讀者要留意，無論新舊約的婚姻觀，同現今好大差別，以前婚姻係由父母安排，並無現今浪漫之愛，唔係話你想嫁比邊個就 邊個，例如十誡入面：「不可貪戀人的房屋、也不可貪戀人的妻子、僕婢、牛驢、並他一切所有的」，將妻子僕婢、牛驢並列，是屬於丈夫的個人私產。 

所以教會/基督同上帝/以色列的關係只係比喻，講得係比喻，即係話喻體唔係事實，唔能夠將比喻當成事實。即係「一粒麥子不落在地裡死了，仍舊是一粒，若是死了便結出許多子粒來」，唔係叫你將條友活埋係地下。又即係，舊約先知多次話以色列人背德係淫婦，你今日返教會兜口兜面話世人都犯了罪，所以個個女人都係雞，會唔會比人打一身先出得返黎。 

好神奇嘅係，話教會係基督的新婦果位，叫保羅，而保羅呢，就無結過婚，唔知當年有無人同佢講過「你未結婚你唔明架喇~~」

聖經無進一步講到信徒個人本身可以嫁比耶穌，嫁比神，係舊約時代，你話你嫁比上帝做聖母，分分鐘比人拎去用石頭打死。新約講一班信徒係屬神的兒女，又嫁返比耶穌，咪即係亂倫？相反，異教就好多凡人嫁比神的故事，你睇下希臘神話宙斯搞過幾多條女就知。

教會咁高舉「六個一」(一生一世、一男一女、一夫一妻)價值，點解又會接受呢d咁古靈精怪的觀念係教內流傳，而不作勸喻呢？

有人講過，嫁比耶穌呢個講法，好可能同天主教傳統的靈修觀有關，之但係天主教亦有好強勁的獨身觀，一個修女話自己嫁比耶穌，佢呢世又真係唔會再嫁會守獨身。我之前聽過好多姊妹話「同耶穌拍拖」、「嫁比耶穌」，之後又會同凡人拍拖結婚，我有時真係不禁會諗，究竟佢地係咪重婚？之前有無同耶穌離婚先呢，同耶穌離婚有咩手續要搞，你同耶穌結婚，又同第二個係一齊，係咪即係勾佬呢？你估你係孔慈呀。

「嫁咗比佢都可以同你一齊」

就連民間信仰，如果你過契比某一個神明，後來因為其他原因要契另一個，係要有一定手續要做，要搵個師父向先一位神明稟明原委，答應後先可以過契。連民間信仰尚且如此認真，點解教會內會講得咁隨便。 

最後，好明顯啦，「嫁比耶穌」呢種講法，弟兄不宜，難道弟兄要講「我要同耶穌○○」咩。唔好話弟兄不宜，面對住一位姊妹，聲稱話自己「嫁咗比耶穌」，第兄就算有意思都唔敢追啦，勾義嫂喎，仲要撬耶穌牆腳，犯埋十誡，未死過咩。