令人好攰的教會

睇返啱啱公佈嘅核數報告，教會儲備，今時今日已經累積到三千幾萬，保留一千萬做流動資金，仲有兩千萬就放左係到。好早年前，我已經不斷呼籲教會執事，係咪應該更有效地運用資產，或者做返一D相對穩健的投資，而唔係淨做港幣定價蝕通脹，而每一次對方都係答我：「蝕咗咁點算呀！」

我心諗：「喂呀，咁你而家咪蝕緊囉~~~」

其實唔係好明，我奉獻比教會，教會只係將D錢放係銀行，點解就等於積財寶於天上，而同樣我放係銀行就唔當係呢，兩者有乜分別先？

所以早幾年政府推出ibond時，我就停左十一奉獻，嚴格黎講我無停，我只係將錢拎左去買ibond，將舊錢保值後先奉獻，總好過眼白白睇住蝕。又無規定十一奉獻要月供，我儲埋三年一次過比唔得咩！就好似細個阿媽hold起晒你D利是錢，怕你亂用，等大個先比返你。(不過，通常都係比阿媽落左格。)

其實我自己都無左件事，教會點用錢真係唔到我呢D盲毛去插手。到今年年頭開會友大會，要通過財政預算案，而教會的會友大會又好特別，可以放低張授權信投贊成票，唔駛真人出席，所以各堂崇拜有千三人出席，但會友大會扣除執事同傳道人之外，出席會友通常都唔過二十人。

到問答環節，我多口問句話會唔會有更好嘅投資選擇，先發現，原來執事去年係無公開咨詢下，將部份儲備轉左做人民幣定價。雖然執事有話過佢地曾經問過一D從事投資相關專業嘅會友意見，但點解咁改變儲備投資咁大件事，唔駛向會友交待？口風都無漏過出黎？咁即係拎去做津巴布韋定期都得架啦！我當場嬲到唔識出聲，亦無追問佢地拎左幾多錢去做人仔定期。

我咁唔識投資都知，過去買人仔除左利息高，仲係貪佢有升值能力，但兩者近年都頗成疑問，人行為刺激經濟已經減過息，亦有貶值壓力刺激出口，呢個時候仲持有人仔唔係一個明智決定。結果呢下就出事，中央突然暴力貶值，執筆時加埋已經跌左5-6%。執事會有無任何機制處理風險？跌到邊一個位，減息減到去邊會離場？我深信以執事們諸般嘅智慧，事前應該無討論過，佢地對神(黨)好有信心，人仔係唔會跌嘅。

我睇返今年教會核數報告，去年利息收入有45萬，比對上一年19萬大幅升超過一倍。以二千萬儲備黎計，即係大約拎左一千萬去買人仔，一千萬做港元定期，呢幾日人仔貶值，賬面差唔多就蝕左五十個，倒蝕利息收入。

咁，呢件事，相信我唔講，執事唔講，亦無咩人會出席會友大會，更加無人神心到拎份核數報告黎睇，估計都係不了了之，暗啞底無左件事。

唔係話要去追究執事，要有人人頭落地，而係改動儲備用途咁大件事，事前點解唔拎出黎比大家知，比大家討論呢，然後集體做決定，到日後有乜問題都好，唔多唔少大家都知情而願意負上一定責任。而家咁樣做，賺左又無人知，蝕左呢，哈哈哈哈哈哈哈哈哈哈哈哈！