警告!

本人並沒有接受過任何正統神學訓練,所有發表內容,全屬個人信仰心得及教會生活經驗分享,敝blog負能量爆燈,如閱讀時感到不適,或出現任何不良反應,包括痰多咳嗽,夜睡不寧,神經緊張,潮熱汗出,心煩多疑,踎身起身見頭暈等徵狀,請即時停止,並向專業人士尋求協助。

2018年6月24日 星期日

如何處理教會桃色醜聞(暗黑版)



件事通咗天,唔諱名,雖然桃色醜聞係教會界好大殺傷力,但又唔係無得救,過去有人返到身,當然要去返以前一模一樣就無乜可能,但係返入去教會界搵啖飯食未必係想像中咁難。


如果出咗事比人爆大鑊,一定要認,總之乜都認晒,認清認楚,係教會扭曲的寬恕文化入面,肯認契弟贏一半,肯認先封後門,肯認有道德光環,總之止咗蝕先。因為搞得呢D野都唔會係無名無姓之輩,係堂會有一定數量支持者,總會有班人走出黎話:「佢都認咗錯,你仲想點,係咪要人頭落地,永不超生先開心。」指控受害者不懂饒恕,咬住唔放。

認還認,只可以認有發生,但唔可以認係侵犯,唔可以話係強逼,話係你情我願,一時失腳。尤其係性罪行呢D野,案發現場通常得兩個人,到最尾只會口同鼻拗,睇個官信邊個。而有權力的人,你口大佢口細,加上實會有D中立份子走出黎話:「真相係點無人會知,惟有神能審判。」

如果大家未結婚,話係感情瓜葛,因為太關心班囡囡,自己越咗界都唔知。如果結咗婚,說服老婆行出黎話已經原諒自己,暗示有人因為老公牧師的身份,而鍾意咗佢,而家唔係性騷擾或性侵犯,係有人勾引人老公,拆散人家庭,我家庭先係受害者。將件事變成家事,減低公共性,變成老公出軌但老婆以愛戰勝一切。呢種TVB家好月圓,浪子回頭金不換,老婆擊敗第三者,苦盡甘來,默默承受一切,贏返個老公,最後BBQ跳起yeah,簡直係收視保證,係可以呃到好多人,尤其係佔教會不少部份嘅婦女。華人社會處理性罪行時,一向都有blame the victim的問題,順水推舟,污名化對方,為自己爭取支持。

就算老婆唔肯夾口供,亦可以受害者姿態出現,話已經比人拆散家庭,搏下可憐,係高舉家庭價值的教會入面,有咩大得過家庭,而家賠埋個家庭,唔係唔比下面。

頭先講過,搞得呢D野,通常都唔係細粒,堂會入面有一定勢力,下面總會有班人會無條件撐,交下戲就可以賺到原諒同接納,咁就要好好組織同利用呢班人。因為自己醜聞纏身,好難再行出黎撐自己,要同佢地講已經悔改,願意承擔一切後果,唔會為自己辯護,自己只不過係一個被罪纏繞的人,而家乜都無晒。與支持者交心要私下做,講到樣樣野都係為教會好,係教會饒恕文化下,班支持者自然會識去對付受害者。

大把例子證明,好似康希、趙鏞基咁,比人告上法庭入埋罪,係教會入面未必有事,甚至可以成為屬靈資產,顯示出自己勇於認罪悔改的一面,之後一樣受萬千愛戴,要一個教會領袖身敗名裂,比大家想像中困難得多。

所以係教會入面遇到呢D事,處理手法係有D唔一樣,由其你無名無姓無後台,千祈唔好一時義憤走去爆人大鑊,因為公開事件,鬧上傳媒,係華人教會「家醜不外傳」的傳統下係大忌,實有D柒頭,針唔拮到肉,話你咁做係「令基督的名受虧損」,引埋聖經黎鬧你「點解要搵外人審判,唔私下解決」,「會絆倒人」,「指責容易,建設困難」,倒頭來比人反咬一口,引埋聖經金句,要你「若這人與那人有嫌隙,總要彼此容忍,彼此饒恕;主怎樣饒恕了你們,你們也要怎樣饒恕人。」堅持追討公義,係教會入面好容易得到一個「不願饒恕」的罪名。

呢D咪叫教會唔行世界果套,分別為聖囉。

咁點樣做先好?

首先要明白,教會入面太多爛好人同鄉愿,佢地無咁多心思時間去搞清真相係點,只會覺得件事好煩,大家一人少一句,唔好嘈,誤會黎架啫,最緊要係傳福音同擴堂,阿們。類似呢D事,通常唔會係咩申張正義,正邪對決,而係受害人 vs 爛好人。

所以,其中一個面向,係要應付呢一大堆爛好人,要識得規矩,明白係教會入面的玩法,先可以將真正制裁到D禽獸。

第一重要,要話已經原諒咗對方,搶咗道德高地先。我不斷強調係教會扭曲的文化入面,饒恕係好重要,千祈唔可以比人攻到你「不懂饒恕」呢一點。當然你可以學《一念無明》方皓玟,話自己曾經好嬲對方,怨天尤人,眼淚鼻涕都出晒,然後先話憑主耶穌基督的大愛,原諒咗對方,希望對方都可以,誠實面對自己的罪。

「年青人,為咩你要走出黎公開件事,係責任,定係公義?」

「係愛呀!XXXX。」

所以一定要話今次走出黎公開事件,唔係為咗煮死對方,而係真心愛對方,希望對方悔改,再次脫離罪的網羅。因為「隱藏的事,沒有不被人知道的」,話如果唔揭發對方,第日比第二個爆出黎就會「令基督的名受虧損」,福音受阻欄,總之拎晒教會平時用開果堆大道理,搶咗道德高地先。

同埋唔好一次過發放所有資料,要唧牙膏,逐少逐少將真相披露出黎,對方唔知你掌握幾多,最初一定會否認,等對方為自己辯護完,再篤爆佢講大話,等佢支持者撐完佢之後,發覺錯咗,再撐,又再錯,要破壞佢係會眾中間的印象,當大家覺得佢前言不對後語,摧毀佢誠信之後,就算你屈佢強姦隻豬,偷睇阿婆沖涼,都有人信。

保護自己,所有對話應該要錄音,正式錄音又得,偷錄又得。聽過好多故仔,處理事件的教會領袖/執事等,私下承諾受害人好多野,但事後反口唔認,仲屈返受害人講大話。到時佢有權力你無,佢口大你口細,會眾會信邊個。係呢D事上,最緊要保護自己。

受害人或幫手的人,要好清楚自己想要D乜,申張正義好大好高,但實際你想要乜結果?送官究治,告到佢坐監,定只係想趕呢D人出教會,比個教訓呢D人。想告到佢坐花廳,當然第一時間要報警,唔駛交比教會處理,因為刑事偵查、法律呢類專業,絕對唔係堂會入面搞得掂。做好法律上支援,先搵個律師問下,我再講多一次,做得呢D衰野,一定唔係無名無姓,時間拖得越長,對方黎講就更有利,有錢請個好律師教定路,唔亂講野,就算上到庭唔一定輸。法庭面前,唔好講到窮人含撚,但有錢有權一定有優勢。受害人資源通常都差好遠,所以要做好準備。

上醫治未病,無論教會定信徒都好,唔係去諗出咗事要點做,而係防範於未然,但睇性別公義事工的分享,大部份堂會依然覺得唔關自己事,到件事爆出黎有人報官就話已經進入法律程序唔可以講,總之冚得就冚。對教會學識處理呢D事,真係完全唔會有寄望,我估今次,犯事果位牧師,最後除咗無咗份工,會唔會比人告上法庭都好難講,大有機會最後無事。

1 則留言:

  1. 正所謂「大聲唔代表無禮貌」,「爆你大鑊、趕你出教會唔代表唔饒恕你」!

    回覆刪除