警告!

本人並沒有接受過任何正統神學訓練,所有發表內容,全屬個人信仰心得及教會生活經驗分享,敝blog負能量爆燈,如閱讀時感到不適,或出現任何不良反應,包括痰多咳嗽,夜睡不寧,神經緊張,潮熱汗出,心煩多疑,踎身起身見頭暈等徵狀,請即時停止,並向專業人士尋求協助。

2018年6月1日 星期五

單身歧視?




係百川寫咗少少教會單身弟兄姊妺嘅問題,意猶未盡,寫多篇先。

早幾個月BBC有篇報導,講到職場入面,單身人士被視為「任勞任怨的牛」,公司要Family friendly,當然變相成為Single unfriendly


職場上的「單身歧視」真的存在嗎?

「在選擇休假日期的時候,有孩子的同事也能獲得優先待遇,而單身或沒有孩子的員工卻很難請假照顧家中的老人,或者經常被安排出差。」

「我見到不計其數的職場人士抱怨說,他們的管理者認為他們在深夜和周末都可以隨時接受任務,因為他們沒有孩子或配偶。」

「我還遇到幾個女性說,她們應得的加薪被取消了,原因是管理者認為她們不像(已婚)同事那麼需要多賺錢。」

單身者在社會比人欺壓,以為在教會可以過安樂日子,就大錯特錯,因為教會何止Family friendly,直情係Family oriented,問題嚴重一百倍。



我唔知點解教會入面有呢種錯覺,認為單身人士一定好得閑同好有錢,唔排除有人好有錢又好得閑又單身咁筍,但以觀察計,教會內最有錢,除咗本身已經大富大貴果班,應該係一班未有小朋友嘅雙職夫婦,以及已經進入空巢期嘅父母,佢地可以一年去三四次旅行,我?三四年先去一次旅行。單身者如果獨居或者要照顧父母,唔會十分得閑,淨係忙家務都唔得掂,有病又無人照顧,唔通自己一個人住要去請個菲傭返黎咩。

由於呢種錯誤認知,所以教會推出黎嘅牧養策略,係叫呢班單身者多投入事奉,發揮恩賜,出錢出力,建立堂會,有返咁上下忙,唔會亂諗野,同好多人一齊唔怕寂寞,話唔定仲可以係事奉中搵到個靈魂伴侶。

經常垢病一樣野,係教會好多問題並唔獨特,只係社會問題嘅延伸,但教會無負起把關責任,而問題進入教會後加倍放大。

個問題去到幾嚴重,大家可以睇下呢篇文《單身人仕的牧養》,所講大致係果種老套路。

不過有兩點,我想勾出黎講一講。第一係關於單身者嘅性試探。

//獨身者會有性的慾念,就像有其他正常、健康的慾望一樣。人喜歡用壓抑的方法去克制肉體的情慾,往往會受到挫折和失敗,帶來罪疚感。信徒若在這方面長久軟弱,給魔鬼留地步,怎能好好的見証基督?//

我直接引《單身起義》一段黎答:

//然而,若我們結婚,所有因誘惑而來的掙扎,是否就會神奇地消失?給色情物品和婚外情破壞的基督徒婚姻數字說「不會」。//

係面對性試探方面,其實大家咁高咁大,唔好成日覺得單身者有好多誘惑先得,佢地真係咁多誘惑,又駛鬼單身咩。

第二點,關於未婚者係教會,對已婚者嘅角色。

//若經濟充裕的單身者有感動,可支持有需要的家庭,如免息貸款買樓或低價租出樓宇給已婚家庭。//

雖然篇文二十年前寫成,但係叫單身者資助家庭買樓或者平租比佢地,呢個講法,會唔會有D痴線呢?有錢就做到架啦,關咩單唔單身事,定單身人仕好恰D呀而家,單身唔駛買樓呀。即使單身人仕有兩個錢傍身,但因無兒無女無伴侶,日後依然要面對龐大退休壓力,仲要調返轉借錢比夫婦買樓?第日已婚信徒D仔女,係咪會幫手照顧返年老獨居嘅單身者先?唔會的話,又憑乜叫人咁付出?

或者好似呢篇文中《無婚者的罪名?》所提到嘅現象 ,第時教會唔單止信與不信係罪,可能過咗某個年紀結唔成婚都係罪,要停聖餐。

另外一樣野,我之前應該有寫過,再次提返,好耐之前已經觀察到,教會兒童事工,多數係由一班未婚姊妹撐起,點解?其中一大原因,係希望父母可以安心崇拜,返到黎掉低個仔女去兒童主日學,自己可以去大禮堂,又可以比班姊妹宏揚一下母愛。

結果,又係班單身者去服侍家庭。有無D事工係調返轉,係班夫婦服侍單身者架呢。

仲有個好神聖嘅理由令你無得推:「係愛呀,哈利。」耶穌叫你愛人如己架!咁邊個去愛呢班單身者呢?唔知喎,耶穌掛。

點解教會D教導咁單向,而且永遠以家庭為中心。話服侍單身,結果係單身者承擔更多侍奉,咁樣叫牧養,定係奴役呢?單身者係教會入面犧牲自己成全別人嘅家庭,到最後自己乜都無,但又唔可以反抗,唔係就無愛心唔順服。

我成日話,如果套野係work,唔會出現呢D問題,如果問題繼續存在,反證出套野根本唔work,點解教會依然會不斷咁重覆去講去做,呢D一早證明唔work嘅方法?呢D方法,稍大年紀嘅單身者,對於教會果套,好多都試過晒,結果係換黎一次又一次嘅失望。

譬如,有唔少人講,不如唔好用婚姻做牧養嘅界線,搞融合牧養,當中有家庭,有單身。不過我親身經驗,係唔work嘅,因為當小組入面多過一個家庭,加上如果有小朋友的話,個話題一定會去咗講家庭講湊仔經,因為係華人文化入面,個細路先係維持宗族嘅核心,所有人會圍住佢轉。而當單身者嘗試插咀時,一定會比人頂一句:「你未結婚/未有小朋友你唔明架喇」,同咸酸菜炒牛歡喜一樣,係定律黎。

結果人係多,有小組,有團契,有群體,但單身者係入面,依然搵唔到歸屬感。一個人孤單寂寞唔難過,因為一個人梗係會孤單寂寞,而係果種喧鬧過後嘅冷清,係好多人中間發現原來自己一個人,先至係最難頂,久而久之,佢地自然會消失。

又例如單身事工,我早兩年寫咗幾萬字去講呢個問題,如果有時間真係想執返一個乾淨版上去信仰百川。教會單身事工有幾個結構性問題,令到好難長遠咁做。

第一,無人希望自己咁樣係群體中間被分割出去,最有需要果班,往往最唔願意參加呢d單身事工,唔想被人標籤係蘿底橙賣剩蔗,係我呢D鍾意八卦又多口先會去。

其二,去得呢D單身事工,或多或少、唔多唔少、多多少少係希望搵到,佢搵到,佢會走;佢搵唔到,佢又會走(好多人去完第一次,見無乜靚仔靚女,第二次唔會再黎,現實得很),結果事工好難持續人數,搞得幾次D人走得七七八八。然後教牧又再以「沒有需要」為理由,唔會再搞,形成惡性循環。

第三,呢D活動,班搞手成日唔知痴咗邊條線,皇帝唔急太監急,搞到個活動成個狩獵場咁,活動未完走過黎同你講,問你睇中邊個,打鐵趁熱,蘇州過後無艇搭,甚至刻意孤立一D佢地覺得登對嘅人出黎,希望佢地撻著,搞到個氣氛好尷尬,令到好多人根本唔鍾意去呢D活動。

彈咗咁多野,去到尾聲,又要解答究竟有乜解決方法,以免又被人話我偏激淨係識得鬧,無建設。首先,我覺得教會內專注家庭,上承五千年中華文化,下連近年反同運動,係一套碩大無朋、錯綜複雜嘅體制,我唔建議去挑戰或者做咩改變,唔係比人溶咗都唔知咩事。

既然教會無得搞,我鼓勵人係教會外搞,脫離教會嘅事工同活動模式,結咗婚果班人,不如真係試下約D未結婚嘅出黎食下飯,唔駛太大圍,否則圍埋又係講湊仔,人少少,傾下閑偈,令到班單身者唔會因為身邊朋友結晒婚,而無咗社交圈子,大時大節永遠要一個人過。可以多D運用同理心,而唔係急於解決問題,係一個群體入面,無人希望比人睇成一個待解決問題,即使佢真係有問題解決唔到,佢地需要係認同以及體諒,而唔係價值判斷。營造返一個安全嘅環境出黎,等呢班人可以安心分享下,你會聽到好多真心話,從來唔會係教會內聽到。

同樣,單身者撇除教會D事工,亦真係可以服侍返夫婦。雖然我未有小朋友我唔明,但我真係知湊細路係好忙,可以幫手babysitting,帶個小朋友去放電,放父母一日半日假,相信佢地都會好感激你。

D野難唔難做?我覺得比籌廿億擴堂容易好多嘅。


2 則留言:

  1. 返工前去茶記食個早餐,你就會發現"一個人"唔駛等,入得最快。

    回覆刪除