警告!

本人並沒有接受過任何正統神學訓練,所有發表內容,全屬個人信仰心得及教會生活經驗分享,敝blog負能量爆燈,如閱讀時感到不適,或出現任何不良反應,包括痰多咳嗽,夜睡不寧,神經緊張,潮熱汗出,心煩多疑,踎身起身見頭暈等徵狀,請即時停止,並向專業人士尋求協助。

2019年11月21日 星期四

《好男人性戰實錄》讀後感二之墳場姑爺仔



上回講到作者Fred Stoeker自細花天酒地,食女無數,最後浪子回頭金不換,仲要係教會搵到處女老婆。但係Stoeker教會搵到老婆嘅經歷,理性少少睇,係一嘅都唔神奇。因為作者自高中以黎已經係美式足球校隊成員,外型有返咁上下,以佢食女無數的經驗,亦證明佢係女人堆中好受歡迎,你估出面真係好似教會講到咁人肉橫流,想同人搞一夜情就有架,年中幾多人係夜店浦足一晚食白果。

 
 加上書中呢段:

//我在史丹福大學取得社會學學位,優等榮譽畢業,之我往三藩市作投資顧問。一個五月的春日,我在辦公室呆到很晚,其他人都回家去了,剩下我獨自一人心事重重。我在轉椅上轉過來,二郎腿擱在窗台上,凝望著加州的壯麗日落。//

運動健將,名校優等榮譽畢業,畢業後做ibanker投資顧問,日落辦公室,如果你上網搵下佢個樣,即使而家年過半百,外型依然唔係認真差。

佢係二十幾三十的時候,肯定係風華正茂、玉樹臨風、風流倜儻,完全係坊間所講的Alpha male、筍盤,加埋男人不壞女人不愛,浪子回頭金不換,佢想識女仔搵老婆,D女真係由美國東岸排到去西岸。真係,如果我係女,梗想搵呢D人做老公啦。

所以,佢容易識女仔係正常,咁嘅條件係教會唔係墳場姑爺仔溝死女先係神蹟呀!我幾肯定佢返教會上主日學果十二個月,已經獲得好多姊妹嘅注意同青睞,當佢有所行動去「認識」主內姊妹時,梗係一個星期就埋齋啦。

至於一般凡人唔係大學美式足球校隊,唔係史丹福大學優等榮譽畢業,打份牛工,辦工室入面無窗,唔知對海定對山定對住隔離棟大廈,甚至連自己位都無,加班加到從來未試過見到日落,就唔好諗咩「神會介紹個老婆比你」,你一日祈禱由朝祈到黑,神會留低個獨身恩賜比你咋。

作為一名資深單身人士,老早為意一個現象,教會內很多論及單身或處理性誘惑的書,均由已婚人士執筆,再唔係就好早婚,例如本書的作者,寫書時已經中年有多並已婚。又例如寫《不再約會》嘅哈理斯約書亞,佢叫人唔好約會,但佢寫完本書未到兩年就結婚(雖然去年哈理斯反口兼道歉,承認自己教導出錯)。我當然唔會天真到認為世上所有已婚的男性,一定可以從婚姻中獲得性滿足。之但係,你食緊自助餐,咀都未抹,然後過黎同我講點解要禁食,感覺總係有份說不出嘅古怪。

係另一本書《單身起義》有提到呢個現像:

//當然,也有人坦承,有些人確要等待較長時間才找到「特別的那一位」。不過,再一次,背後的假設是每個人最終都會到伴侶。就是等待本身,也常常成了精彩婚姻可期的原委。我們傾向徦設,等得越久,獎賞越豐。正如莎士比亞《辛白林》所寫,禮物「來得越遲,欣喜越大」,不少當代作家認同這看法,例如,《上帝也寫羅曼史》(When God Writes Your Love Story: The Ultimate Approach to Guy/Girl Relationships)的夫妻檔的作者之一的蕾絲莉‧陸迪(Leslie Ludy)就見證自己獲天賜良緣,絕對值得等待。她寫道:「〈神〉要我靠祂到一個地埗,讓祂在最合適的時間,將那特別的男子領到我跟前,猜猜看?在祂看為最適合的時間,祂正正作了此事。艾瑞克(Eric Ludy)是我的白馬王子,穿著盔甲出現,我萬分慶幸自己沒有妥協,接受次等貨色。」

這個故事的問題是她遇到艾瑞克時才十六歲(並在十九歲時結婚)。陸迪用來描述自己等候的語言暗示,那是漫長而艱難的掙扎,最終才得到神報賞。言下之意,較大齡的單身讀者最終也會得享神蹟般的介入。然而,對於年紀或許較陸迪遇上白馬王子時大兩倍以上的單身人,這說法又有多大說服力?這類現見證與現實合起來看時,對年紀較大的單身者來說,顯得尤其空洞。//

《單身起義》的作者指出,教內好多書講抵抗誘惑、教人等待戀愛並最終如願,當事人並無長時間單身同禁欲,而佢地嘅背境通常與目標群眾有一定距離,咁佢提出嘅建議,係咪真係有效同具說服力呢,咁其他人應唔應該採信佢地嘅講法呢,我係十分存疑。

有一個都市傳說,話男性每七秒就會想到與性有關嘅事物。如果真係要寫講男人如何戰勝誘惑,係咪應該搵個七十歲嘅處男來執筆,介紹多年來如何堅持聖(性)潔,守得住自己眼目同思想,從來無試過打飛機或對女性有歪念,平時出街會幪住雙眼。如果搵得到的話,由他來分享他的經驗,是否有說服得多。

假如你搵得到嘅話。

1 則留言:

  1. 七十歲從來提唔起性慾嘅處男真係咁難搵咩?不過係一個病人啫,你又會信服佢咩?

    龍井樹

    回覆刪除