職場魔幻時刻：只有你諗唔到，無野係佢地做唔出

 

係果間MNC，食咗無數隻死貓。

有一次，發生咗一單特別離譜嘅投訴，話係我哋嘅產品入面keep住搵到頭髮，一個月入面已經比人投訴咗幾次，比個廠長捽到爆炸。

於是我哋即刻展開大調查，巡晒成條生產線，檢查每部機、每個角落，仲開咗無數次briefing，叫晒所有工人檢查髮網、戴手套、確保無任何毛髮掉落。

搞咗兩個月仲係keep住收投訴，廠長比更大粒屌，屌完又走落黎屌我地。

點知天無絕人之路，有一日，一個眼利嘅工人喺拆包裝物料之前，無意中發現未開封嘅包裝袋入面竟然有頭髮！真相終於大白—問題唔出喺我哋嘅生產線，而係包裝物料本身！

於是我哋即刻向供應商投訴，仲將所有證據—照片、樣本、報告，一併寄過去，要求對方解釋。

話說呢批包裝物料係從大陸入口，之前同呢個供應商合作多年，一直相安無事，點解近幾個月突然多咗咁多雜物？只有你諗唔到，無野係佢地做唔出，原來間廠搬咗去第二度！無通知到我地！

更離譜嘅係，我哋間MNC嘅大中華QC audit team唔係base喺香港，而係base喺上海，負責審核嘅同事要即刻買機票飛去新廠房現場調查。我哋作為香港廠員工，根本無權參與審核，只能喺遠處等報告。報告出爐，內容同我哋預料差唔多，間廠新開當然就污煙瘴氣，點樣睇都唔似一間有資格為MNC供貨嘅廠房。

事後，我仲天真到以為搵到問題根源，總算可以鬆一口氣，甚至覺得自己幫公司解決咗大問題，應該會畀高層讚賞。於是我好有心機咁搵經理傾，問可唔可以唔扣我哋我嘅KPI，因為我有個異物防護KPI，一年唔可以多過九單。

點知經理一臉冷笑，回我一句：「責任永遠歸於最後經手嘅人。供應商出問題，你哋點解無喺收貨時檢查清楚？呢個係你哋嘅疏忽。」我心諗：喂，大佬，包裝物料係總公司審核同認證嘅供應商，我哋前線點樣知道佢搬咗都唔出聲？但喺大公司文化下，責任永遠推落最底層嘅人，供應商同audit team永遠可以置身事外。