職場魔幻時刻 -- 公司比人搞

 

喺嗰間MNC返工，真係一單接一單嘅死貓等你食。話說有一日，又收到一封投訴信，話我哋嘅產品入面搵到釘書釘！客戶仲好有心機咁寄返個樣板俾我哋，攤開一睇，嘩，真係成排書釘整整齊齊咁「鑲嵌」喺產品入面，仲係同廠房用緊嘅同牌子、同顏色嘅釘書釘。呢啲唔係意外，根本係有人故意放入去！一睇就知係內部搞亂，十成十係人為事件。心諗：呢單嘢大鑊喇，唔係普通嘅質量問題，係有人存心報復公司！

 

點知，成間公司出奇地寧靜，簡直靜到詭異。廠長？無出聲，成日話自己好忙，匿喺辦公室度「處理大事」。QA Manager？話自己負責品質保證，唔係調查刑事案件，推得一乾二淨。Production Manager？話生產線日日咁忙，無時間理「呢啲小事」。高層？更加唔使講，佢哋只關心KPI同年報數字，呢啲「敏感」事件一律唔沾手。結果呢單投訴好似一粒燙手山芋，一層一層咁推落嚟，最後跌到我呢個普通officer頭上。我心諗：喂，我只係一個小薯，點解連咁大件事都要我查？

好，第一步梗係想睇閉路電視（CCTV）啦，搵證據係基本吧？於是我即刻搵保安部查詢，點知回覆係一個晴天霹靂：話CCTV因為硬盤容量有限，只會錄足72小時，之後就自動洗晒再錄。問題係，我哋廠房嘅產品從生產、存貨到派貨，再去到客戶手上，起碼要一星期，甚至十幾日，CCTV點樣幫到我？即係話，兇手可能喺一個月前已經落手，但證據早就畀洗晒，查都無得查。我試過同保安部爭拗，問點解唔加個大啲嘅硬盤，佢哋話：「公司話無budget，72小時夠用。」我心諗：夠用？連查投訴都唔夠用，仲講咩Six Sigma嘅「零缺陷」？

至於部金屬探測器，大家知道係廢。如果靈敏度跟足公司要求，一日可能打三至四成產品出黎，根本用唔到，生產線自己熄咗，大家心知肚明隻眼開隻眼閉。

最後要交report都無辦法，硬住頭皮上，個5whys分析，得一個答案人為惡意破壞。Present果下諗住死撚硬，因為平時到4 whys都會比人公開處刑，捽到你暈。

點知，我講完，場面係死寂一片。廠長無反應，QA Manager無意見，Production Manager低頭玩手機。無人有問題，無人有反應，無人肯跟進。我嘅報告好似一粒石頭丟入大海，連個水花都無。事後無人再提呢單投訴，客戶點樣處理？供應商有無改善？全部無下文。

十幾年後嘅我，作為一個老咗嘅大叔，終於明白點解：呢單嘢係一隻大炸彈，擺明係內部有人做得唔開心，故意搞亂報復公司，而係公司現有的硬件中，係防範唔到，大家都知。咁大件事，點會有人想接手處理？廠長怕畀高層怪罪，QA怕畀問責，Production怕連累自己部門，於是個個都扮盲，推到最底層嘅我呢個小薯身上。我好似《九品芝麻官》入面嘅包龍星，喺枱底畀人推出去送死，變成唯一嘅「負責人」，如果再有第二單，咪追返上次邊個出Preventative action plan。

而搞咗咁多單異物投訴之後，我個異物防護KPI，就比人扣到去零。