感恩，挑戰

是咁的，曾經有一個傳道人同我講，FB係一個公開嘅地方，發表意見時要考慮受眾嘅想法，以免引起別人困惑，教會術語叫絆倒別人，我，銘記於心。


我估計，近排好多參與「感恩tag」嘅基基，睇黎係從來沒有考慮過身邊非基朋友嘅感受，佢地無信仰背景，亦唔見得會嘗試理解你地做緊乜/諗緊乜，只係每日打開FB，就發現比人洗版，覺得好向左走向右走煩。

以下是我聽過嘅回應：

「乜都感恩一餐」

「真係好傻的嗎？ 」

「點解唔係多謝幫過你嘅人，而走去多謝上帝」

稍前已經有人攢文講過，大部份的感恩事項，其實同一般世人所追求嘅價值並無二致，都係感謝主我有個好丈夫/太太/男友/女友/朋友/家庭/工作/學業/教會，供甩層樓，有仔有女，有個富爸爸，直到永遠，阿們。即係話，我今日走去tag一個非基嘅話，佢都可以up足五日，而你係唔會察覺到大家有乜分別。

 (http://nocrab.wordpress.com/2014/09/08/thanksgiving-challenge-for-what/)

我唔係話「感謝主我有個好丈夫/太太/男友/女友/朋友/家庭/工作/學業/教會直到永遠，供甩層樓，有仔有女，有個富爸爸，直到永遠，阿們」有錯，不過，最起碼，約略解釋下你點解咁做，比D唔知情人士理解一下你嘅信仰，我又唔信你成個FB淨係得基基。

或者，如果你真係好感謝以上呢堆野，我鼓勵你兜口兜面同佢地講。即係好似咁，你有日放工好攰，上到巴士發現竟然有位，當你感謝完上帝賜座之後，落車時不如同個巴士司機衷心咁講句「唔該晒，幸苦你渣左成日巴士黎接我，今日仲要有位坐」，甚至寫封感謝信去巴士公司表揚佢地，我相信對方更加理解你嘅感恩之情，更加能感動人。比人明白，呢份感恩係源自神。

最後，我都應下境講件感恩事項：「我感恩身邊朋友個個都好熟悉我性格，無人夠膽tag我。」