我有一票，仍未決定

好老實講，即使過左年初一，仲有大量中間游移票未決定點投，我係其中之一。

但呢段時間楊岳橋及其支持者拉票的手法，卻令到呢班人(包括我)感到好委屈，明明我地乜都無做過，就日日比人鬧唔顧全大局，耽於內鬥(呢個算唔算內鬥真係有故講)，益左建制派，收左共產黨錢，係鬼等等。

呢種做法，集體利益高過個人意願，做法好有極權主義味道，用呢種方法去追求民主？明唔明自己做緊乜？你地就係用緊建制派配票策略，你地以往就係批評建制選民無自己投票意願，阿爺叫投邊個就投個，只係投票機器。你地係用緊自己以往最不屑嘅手法，就只係為左搶一個議席 or so called大局。究竟個大局大到幾大我地可以開始放棄民主原則，你地連討論都未有，甚至未意識到咁做係反民主。

係，香港人係豬，但未豬到連自己感受都分唔清，未豬到唔識去問點解次次個大局都係你地果邊。我唔明點解選民有責任要揹呢次公民黨，甚至整個泛民嘅政治危機，而佢地一直無認真去回應今次拉票對象嘅政治訴求。即係，你要我為你地抬轎，投下神聖一票，既唔完全代表緊我嘅政治主張，又對我而言乜野政治利益都無，甚至連少少意願聽下我地講法都承諾唔到。咁樣唔係乜野顧全大局，含淚投票，而係徹底地搵鳩我笨柒。一邊搵鳩我笨柒，一邊鬧我係豬，一邊要我投你票，你覺得有無可能？

令到有一班人，明明唔支持本土派嘅政治主張，都未必願意再出黎含淚投票，寧願唔投，投白票，唔想搞到自己咁委屈。

得返最後一個星期，年初一後動搖然後決定投梁嘅人，楊果邊已經錯過左機會勉救，甚至將佢地越推越遠，只係仲淨低一D未決定，或決定唔投嘅少數遊離票。楊岳橋及其支持者，仲唔努力去化解當中嘅矛盾，仲一味去恐嚇呢班人，只係阿崩叫狗，越叫越走。

我而家話比大家聽，我手頭上有一票，而我亦明確話比楊岳橋及其支持者聽，你地D拉票工作，對我一D用都無，無人鍾意日日夜夜比人鬧，淨返一個星期，我期望你地最低限度可以處理下呢個心結。

我真係語重心長咁同楊岳橋及其支持者講，希望你地做到以下幾點，咁或者可以係最後時間，搶到仍然未決定嘅選民(即係我)：

1. 承認初期選舉工程未如人意，就算唔認真道歉，起碼要流露出歉意。表示眾多支持者嘅言論，未必代表楊岳橋或者公民黨自己諗法，做到某程度嘅切割，否則大家覺得你地沆瀣一氣。
2. 即使不接納本土派的主張，不應視本土派為敵人，唔好開口埋口話人係鬼，話人收共產黨錢。講多次，無人鍾意無啦啦比人鬧，無啦啦比人屈。
3. 保留同本土派嘅合作空間，拉攏仍然動搖嘅人，佢地或者都叫比較支持本土思想，但又無行到咁前。完全同本土派切割，係將呢堆人趕埋過去。
4. 發展到呢一刻，已經出現一D聲音，擔心下次正式選舉時，公民黨會收返楊岳橋，而改派更有份量嘅侯選人，即係支持者對公民黨出現動搖。我對公民黨最重要一項建議，班大佬應該呢一刻就衝出黎講，話無論今次選舉咩結果，到下次正式選舉時，一樣會排楊岳橋係名單第一位，以示你地新舊交替嘅決心，以絕觀望。

當然，會有人覺得以上要求好過份，唔係你地嘅意願，會覺得好委屈。咁到我講返一句：「大局為重」，你地仲想贏嘅話，就要含淚犧牲。