警告!

本人並沒有接受過任何正統神學訓練,所有發表內容,全屬個人信仰心得及教會生活經驗分享,敝blog負能量爆燈,如閱讀時感到不適,或出現任何不良反應,包括痰多咳嗽,夜睡不寧,神經緊張,潮熱汗出,心煩多疑,踎身起身見頭暈等徵狀,請即時停止,並向專業人士尋求協助。

2015年7月2日 星期四

如果你想係教會追女仔,不如去學PUA (教會單身事工系列三十三)



又要戴頭盔,我唔係完全反對教會對戀愛婚姻的教導,係出自聖經又好,出自傳統又好,出自民間智慧都好,總有一定道理,毋須全面拋棄,又嘗造創造一套「真● 基督徒戀愛婚姻觀」。凡事整過一套基督教版本出黎,係一件相當無聊嘅事,因為呢D基督教乜乜,好多時同坊間大同小異,而坊間果套,過去又有好多基督徒有份一 齊建設,滲透左好多基督教價值入去。即使未信都好,戀愛同婚姻嘅價值本身都好崇高,夾硬要整一套更好更崇高出黎,只會係擾民而徒勞無功。

同我之前寫初職信徒牧養缺失一樣,教會呢套戀愛教導出現同樣嘅問題,就係同信徒一般生活會面對嘅處境有一段好大距離,極難應用係實際生活上。

你叫我祈禱等候問牧者睇屬靈書安排集體活動再等候祈禱,有目標都比人追左去啦or目標都追咗第二個啦,唔好話教會女多男少,女仔要面對好大競爭,男仔其實 一樣,尤其突然間有個外來嘅姊妹,條件又唔錯,會剎時發揮出強大的鮎魚效應,同一時間團契入面幾個男仔去追,你估我又未見過,甚至都追過添啦。

當有人發現唔work,返到教會講到果種挫敗同擔心時,就比人覺得係怨婦,成日投訴,而好少有人真係去關心下呢類人。

其實,返得教會耐,無人唔知道理想嘅戀愛同婚姻係點,但當去唔到呢個理想時,我地應該接受幾多現實,幾多妥協呢,而家係教會根本無呢個討論空間,一講就,哦,你唔屬靈你唔夠祈禱你無依靠神,或者認為你挑戰教會教導,挑戰教會權威。

到最後結果,唔少信徒講一套做一套,係戀愛呢件事上依照所謂世俗價值行事,目標為本,明明無短宣心志,因為心儀對像係短宣隊,所以就不斷參加短宣,投其所 好,而取得「成功」往往就係呢班人,因為個世界的確係咁運作。明知教會唔鍾意,就唔會將自己經歷拎出黎講,分享時就同人講自細就好鍾意宣教,覺得呢個係神 比佢嘅異像,佢從來無特登去搵對象,結果神就因為佢呢個心志而令到佢遇到另一半,好感恩好感謝神,虛偽到爆,Hi Auntie,識佢十幾年都無聽過話鍾意宣教呀,而溝到女結埋婚生埋仔之後又話有家庭負擔,唔可以再去宣教。

另一班真係好敬虔咁嘗試實踐呢一堆教導,「寧願無都唔想亂黎」(一位姊妹excactly wording),結果求仁得仁,就係無。

教會咁強調呢D教導同價值觀,不旦無幫到信徒面對呢個世界挑戰,反之仲好容易製造左兩種人出黎,一種就世俗虛偽但快人一步理想達到,另一種就神聖屬靈卻充滿挫敗。果D少數又神聖又成功,就一早上晒天使心接受訪問。

如果抱住追女仔心態,諗住係教會入面搵女朋友的話,倒不如去學Pick Up Artist(把妹達人)果套,會更加有用,更快見效,而唔好將時間浪費係教會呢類活動入面,或者聽晒教會果種壞鬼教導。如果教會想班姊妹唔好咁容易比外 面D人「呃」,更加要比佢地知乜野係PUA,去明白呢D招數,唔好咁容易比人氹。

當然,學完PUA返黎唔好比教會知喇,唔係又比人話你「依靠人嘅方法,唔依靠神。」

背後道理一D都唔深奧,只係一個好簡單嘅邏輯:教會果套得,就唔會咁多單男獨女啦,就係教會呢套有問題,先會咁樣,仲要人繼續落去?不斷咁重覆同一個做法,然後期望出現一個唔同結果,會唔會傻豬豬咗D呢。

4 則留言:

  1. 簡單來說, 不要返教會溝女. Lol

    回覆刪除
  2. 教會d女仔鐘意你都好被動,成日問神問神再問神,但佢地又要求男仔條件要點好點好,自己就…我自己都係女仔都好睇唔過眼,自己都好多男性朋友,為你地好,最好唔啦,某d教會女仔幾open mind既,個d好d

    回覆刪除
  3. 就算你成功, 最後都會有一班牧者&姊妹出黎又黎又路 (yes,弟兄好少阻人發財)

    回覆刪除
  4. 就算你成功, 最後都會有一班牧者&姊妹出黎又黎又路 (yes,弟兄好少阻人發財)

    回覆刪除