婚姻這回事--思道平台活動後感

TL:DR 唉我未結婚我唔明架喇

尋晚去完思道的活動講婚姻，可以話大開眼界，由十分保守(六個一支持者)到十分前衛(讚成同婚)的想法都有，大家發言十分湧躍。

婚姻係神聖，但婚姻制度是否神聖的呢？

我並不完全反對教會推行六個一的價值，但同時好明白，六個一，只係人類歷史中芸芸婚姻制度中其中一個，唔依從，係咪就係無價值呢？眾所周知，中國的摩梭族如今依然係走婚制的母系社會，作為一個都市生活的現代基督徒，又有無資格話佢地淫亂呢？

正如教育好重要，但係咪等於要維護現有的教育制度呢？等於要堅持去考TSA呢，有人處身於現有教育制度之外去追求學問，是否需要大力鞭撻呢。咩先係婚姻嘅真諦？

前排睇《教堂經濟學》，講到昔日教會介入婚姻，主要的原因係收費，亦同時係一種權力的彰顯，邊個唔聽話，婚都唔比你結，呢樣野，現代教會依然有遺風，信徒與未信的人拍拖結婚，唔少會面對教會紀律。

BTW，今次唔係講信與不信，講返婚姻個問題。

教會內經常將性解放、同運講成洪水猛獸，衝擊婚姻制度，道德淪亡。但婚姻制度的崩潰，其實遠早於同運，或更早期的性解放運動，而係始於工業革命後的現代化過程。以往農業社會，人類最細的單位，唔係家庭，而係宗族，結婚從來唔係兩個人嘅事，而係兩個家族嘅事。當時結婚，搵個媒人拉線，係祠堂拜堂，請鄉親父老食餐飯就係。而當時D人，亦係世世代代係同一條村，唔會離鄉別井。宗族、鄉里就係婚姻的見證人，有維護婚姻的力量。

但世界現代化之後，人口流動性大增，好多人脫離農村走去城市謀生，核心家庭出現，缺乏鄉里宗族的見證同守護。咁樣的話，你點知一個人結咗婚未？而工業化後女性可以出黎社會工作，取得更大自主權，亦脫離父母之命、媒酌之言，追求自由戀愛。去到呢一刻，公權力先開始有需要介入，去確立婚姻制度，而政府要處理亦只係一D技術性問題(遺產承繼、稅務等)，而從來唔會接觸或解釋婚姻的本質。

而我覺得，呢一點正正係近年教會的盲點，將婚姻，同維持婚姻的制度混為一談，並以維持制度不變，作為維護婚姻的主要手段。但問題在於，制度點都會因應環境而轉變，教會最後只會打一場losing battle，滿足一下自己殉道慾望。

即使唔改變六個一的制度，事實上關於婚姻的內涵都一直在變。現代人(甚至教會)推崇果種由浪漫之愛，兩情相悅，然後盟誓一生的婚姻，出現的時間實際非常短。我以前提過王明道的愛情，而家睇返簡直匪夷所思。

個故事係咁，王明道某次去某家教會講道，咁啱個身為司琴的牧師太太有事黎唔到，叫咗佢個女上去彈，王明道就咁一見鐘情。返去祈個靚禱，打聽對方生活細節睇下係咪愛主基督徒，搵一個稍為年長的姊妹咨詢過，一個月之後就向對方提親，而對方竟然應承咗，但因為當時女方年紀太細，得十六歲，所以婚事推延到十八歲先。

用現代術語講一次，就係有件宅男睇中個女神，然後自己腦補所有細節，係未約會過的情況下，就話要娶人。

我唔夠膽取笑王明道，但今日教會如果有人咁樣拖都未拍就憑一次見面就結婚，傳道人會唔會阻止呢。

所以真係唔好立亂話咩維護傳統，個傳統無你想像得咁穩固同美好。話維護傳統婚姻價值，卻又唔清楚個傳統係點，當中有咩演變。中國傳統入面，向來係一夫一妻多妾，而納妾的難易度，又與男方的權力成正比，權力越大越容易妻妾成群。與此同時，中國傳統亦容許接受男人去滾，唔少後世稱頌的詩人都係大滾友，唔係邊會得黎杜牧果句「十年一覺楊州夢，贏得青樓薄倖名」，話唔定幾百年後，肥龍、骨精強，會被後世吹奏成當代偉大的文學家。

又講遠咗，咁婚姻係咩回事。

頭先講到婚姻的內涵，唔好講到唐朝咁遠，上一兩代對愛情的追求唔係認真強烈，面對婚姻，更多係滿足傳統的責任，男大當婚，女大當嫁，成家立室，生兒育女，有時候亦只係經濟同盟，佢地無諗咁多咩搵條「蘇眉」(soul mate)，但求有個伴，你忍下我，我忍下你咁就一世。所以我地呢一代見證唔少上一代嘅婚姻，好早已經無咩愛情可言，更多係責任，係仔大女大，滿足晒傳統任務後，兩個人無晒感情，形同陌路。

所以去到近代D，大家嘗試拉返高個戀愛的要求，特別係教會之內，關於戀愛的教導有如恆河沙數，睇下對婚姻可唔可以提供到一個長遠D嘅保護，呢個轉變究竟有無用呢，睇住離婚數字節節上昇，我相信都係失敗咗，將婚姻寄望係愛情之上，似乎都係唔穩陣。

教會近年將婚姻推到一個十分神聖、崇高的位置，隨之而來出現兩大問題：第一，無法處理教會內的不婚者，獨身人士係教會無出路。第二，違反商品說明條例，將婚姻宣傳得過度美好，但信徒的婚姻，卻無法有效彰顯出黎。

一貫覺得好可惜係，類似的話題，理應由堂會本身去處理，引導討論，然係群體之中尋找出路，不過，係堂會入面，類似的話題依然係禁忌，一講出口就有煩惱，話就話尊重各人意見，事實上你懂的，從而先會流落民間，由思道平台黎做。