Achievement unlock，終於比新約釋經界權威、希臘文專家block咗。

Achievement unlock，終於比新約釋經界權威、希臘文專家block咗。

既然block咗睇唔到，正所謂無眼屎乾淨盲，都唔爭在講埋。

關於釋經界權威希臘文專家嘅故事，我假假地算係個受害人，究竟佢當日為咩事糾黨bully我呢個無名小輩，實在無法查證。不過有關光頭黨的手法，過去一兩年耳聞目睹，幾乎如出一轍。就係佢地好鐘意用FB message係背後講人壞話，面對公眾就好似佢地對顏色神學咁，義正辭嚴，滿口術語，下下話自己係呢方面權威，你聽唔明係你道行未夠，廢事同你傾，叫你返去讀多幾本書先。唔知情仲以為佢地係護教先鋒，只為因為太愛教會而言辭過激。

而且呢種私下講壞話嘅做法，我相信正係佢收靚嘅手法黎，無啦啦有個教會紅人、學術權威、新約希臘文專家、神學院教授同你FB私訊喎，對好多平凡人黎講真係受寵若驚，佢仲推心置腹咁同你傾偈，唔介意比你知佢對其他人嘅諗法，即係不經意咁講下人壞話，如果你份人唔夠剛正獨立，仲唔飄飄然，梗係加埋把口一齊講啦，難免係當中奉承幾句。咁就姣婆遇著脂粉客，各取所需，一拍即合，你需要權威嘅認同，提升自己嘅虛榮，佢需要簇擁嘅快感，人前人後受到恭維，慢慢咁，自然形成一個犯罪團夥，互相餵養。背後心態我都唔多明，自己叻就話啫，攀龍附鳳，有咩成就可言，識得幾個博士做FB frd可以叼到光咩？要一班攀龍附鳳嘅人圍爐，又有幾人中龍鳳？

佢地估唔到，呢個世界仲有好多正直善良嘅人，唔會同流合污，堅持耶穌嘅教訓，對背後講人壞話呢D行為保持距離。過去一兩年，已經有三個人走過黎同我講，光頭黨係背後講我壞話，有人仲提供cap圖證明，一個咁講可以唔信，兩個咁講難免有D懷疑，三個人係唔同圈子不約而同咁話佢地係背後放風毀人清譽，眾口鑠金，好難唔到人唔信。

不過講釋經同希臘文(加埋背後講人壞話)佢就係權威，網絡罵戰呢D野，佢識條鐵咩，以我流連網上嘅經驗，網絡罵戰大大話話打過幾百場，肯定權威過佢多多聲啦。

從來block人、刪post呢D行為，係網絡世界視之為下三流手段，一個cap圖就無得走啦，更加無私顯見私。我成日都話，網絡上而家最大嘅危機，唔係青少年沉迷網絡讀書唔成，而係因為智能手機出現，大大減低上網嘅難度，真正達成Information At Your Fingertips，令到一眾中老年人湧入網絡，證明自己仲得，仲可以學習新事物，所以先有長輩圖出現，同成日收到D偽科學健康資訊，仲怪你點解唔幫佢廣傳。呢班人又唔似班後生，浸淫網絡世界好耐，熟知各種潛規則，反而嘗試將自己嘅社會經驗同地位，強加係網絡世界之上。

由於網上世界，大家只會睇到你嘅留言，所以亦只能依你嘅留言去判斷你為人，無論現實世界有幾咁勁揪，上到網都係一個nobody，要依靠自己嘅實力，言論有無道理，捱過一波又一波嘅罵戰，先會形成到自己嘅權威做KOL。我就真係未見過有人係靠block人同刪post去營造到公信力，以而家呢個發展，佢條block list分分鐘仲長過佢條frd list，最多咪只能做到block人界KOL，真係要出黎指點江山令人心悅誠服仲差好遠。

所以我成日話，教會嘅教牧同工，真係去高登/連登呢D人流極多嘅討論區，開返個account，睇下人地係點鬧交，又留下言嘗試比公眾驗證一下自己嘅言論，究竟可唔可以說服到人，學下保羅當日係雅典街頭天天同人辯道，試下講講下整句「我係呢方面權威專家，我講就係啱，你講就係錯」，咪睇下大家有乜反應。圍埋係自己小圈子，養一堆人幫自己打飛機，block呢個block果個，背後講呢個講果個壞話，卻又意圖一統江湖做武林盟主，比你好打到好似東方不敗又點，江湖上只覺得你係一個男不男、女不女嘅閹人。

而家勸佢迷途知返，我諗已經無乜用，近日發展，光頭黨已經越黎越似一個cult，以光頭教主做核心，佢講野無人夠膽質疑，一有疑問就踢你出圈子外，比幫眾恥笑攻擊，不斷block人加埋FB個演算法，只會聽到自己喜歡聽嘅野，身邊又只係淨底一班人崇拜佢，非黑即白，非友即敵。越批評佢地，佢地越覺得自己係為義受逼迫，受到人攻擊。任何善意嘅勸喻，只會比佢拉入無窮無盡的神學辯論當中，然後又再踩低你唔夠佢叻，唔識原文。但係，從來無人質疑佢學術能力，而家大家係懷疑佢「神學高深，人格卑劣」，唔駛讀返幾個學位先知人格有問題掛。

係教會歷史上，呢一類群體，由魅力型領袖領導，當中靠朋黨式管治，非友即敵，外面個個都想我死，人地所講全部都係大話、係謠言，唯我獨尊，一個唔該真係變成異端時有所聞，希望我唔好口臭講中。

大家記得要為佢地代禱，祈望聖靈親自出手提醒佢。