阿摩司係當時南部猶大國提哥亞做牧人，一日領受到耶和華的默示，開始評論北國以色列，而內容係由頭鬧到腳，再由腳鬧返上頭，預言以色列會亡國被擄，粗俗D講直頭係咒人冚家鏟。
一直去到第七章，終於有人忍唔住，身為北國祭司的亞瑪謝走去篤灰，報串比當然以色列王耶羅波安聽，話阿摩司亂講野，咒北國以色列會仆街冚家鏟。亞瑪謝又用自己皇室祭司的身份大阿摩司，話呢到有王嘅宮殿同聖所，唔輪到你呢D草民係到出聲。
不過呢，阿摩司個回應仲痴線，我嘗試用廣東話意譯一段出黎：
耶和華又比我睇到一件事，有幅牆用準繩黎起，主手拎住準繩企係上面。
耶和華對我講，阿摩司啊，你睇到D咩。我話，我睇到準繩。主話，我要將教會吊起黎打，唔會再願諒佢地。影音使團要執笠，以勒基金一定玩完，我會大晒，用刀斬死晒搞福音盛會D人。
有間神學院嘅教授亞瑪謝，叫人去搵陳一華，話阿摩司係出面講你地壞話，佢講D野難聽到痺，我地頂唔順。
因為阿摩司話我地會玩完，當街比人斬死。
亞瑪謝又對阿摩司話，你條茂利，搵食行遠D，躝返去信仰百川寫廢文啦。唔好再走出黎出聲喇，呢到又有教授又有博士。
阿摩司對亞瑪謝說，我唔係咩傳道人，又無讀神學，我打份西工，逗最低工資。耶和華揀咗我，唔好再打工，叫我同你地講野。
亞瑪謝，而家你要聽耶和華講野，你話，唔好對住福音盛會講野，唔好批評影音使團，唔好抽以勒基金水。
所以耶和華咁講，你老婆要係砵蘭街做雞！你D仔女比人斬死晒！你層樓斷供變做銀主盤！你死係堆填區入面！你地個個做晒難民。
睇完嚇一跳，亞瑪謝身為皇帝祭司，要維護北國以色列好正常，搵食啫，犯法呀，阿摩司駛唔駛咒人老婆做雞咁誇張。大家仲要唔好忘記，我地就知日後以色列亡國啫，當時無論南北國國泰民安，列王記中仲記載耶羅波安二世係神揀選復興以色列之人，早有預言佢會打勝仗，收復大片土地，。
「他收回以色列邊界之地，從哈馬口直到亞拉巴海，正如耶和華以色列的神藉他僕人迦特希弗人亞米太的兒子先知約拿所說的，因為耶和華看見以色列人甚是艱苦．無論困住的自由的、都沒有了、也無人幫助以色列人。耶和華並沒有說要將以色列的名從天下塗抹．乃藉約阿施的兒子耶羅波安拯救他們。」
當時阿摩司咒人會仆街冚家鏟，係脫離國情，無乜事實根據兼唔講道理。
阿摩司的做法，基法上係違反晒現今教會的教導，事前又無禱告，又無先私下約見，份工無咩咁巴閉，唔係社會上流人士，唔係神職人員，又無落手落腳做過牧養工作，基本上淨係得把口，識批評但又無建設性，一黎就公開嘈嘈閉，講D野仲咁負面咒人老婆做雞，一D愛心都無，完全係一個能說不能做嘅廢青，企係道德高地打J。自詡為耶和華的先知係到說三道四，外行領導內行，仲要身為南國人唔理自己國家，走上北國講預言，干預別國內政，自己一事無成，又要係到指點江山。人地皇室祭司呢，日日要係聖殿劏羊獻祭，又要做皇室顧問幫皇帝處理國家大事，日日勞心勞力為主獻上，工作不知幾繁重，地位不知幾尊貴。
咁點解最後聖經有阿摩司書，而無亞瑪謝書呢？點解聖經要記載埋呢D咁負面粗鄙嘅說話呢？
沒有留言:
張貼留言