面對教會反對萬聖節，只需要問一個問題

以部份人的講法計，扮耶穌等於交鬼

我真係唔太在乎有信徒反對慶祝萬聖節，你有你領受，我有我自由，正如我唔會反對一個穆斯林唔食豬肉，然後不斷同佢講豬肉幾好味，幾有營養。因為我知呢D叫信仰，而信仰係有好個人的一面，唔一定可以用理性解釋。

但好死唔死，好多信徒認為，即使唔講信仰、唔用聖經、唔用教會傳統，我地都可以用公共理性去說服其他人，基督教論理觀係比較優勝，值得社會採納。呢樣野，應該歸功於關啟文。 

個問題在於，教會反對一樣野，通常係先有立場，然後去搵理由，再妖魔化件事，提出好多陳義極高嘅原則，左一句上帝不喜悅，右一句聖經係咁寫，前一句話會鬼上身，後一句問你係咪基督徒黎架。但呢一堆原則，只係適用於反對果件事之上，不能夠伸延接近嘅事物上，形成雙種標準。例如以來源去攻擊萬聖節，但當有人提出聖誕節一樣有異教根源，係咪要同時間反對埋，佢地會即時hang機唔識回應，一係話我地而家討論緊萬聖節，唔係講聖誕節，所以唔關聖誕節事。

無他，因為果堆理由，只係堆砌出黎，佢地從來無深入去思考究竟合唔合理，適用範圍應該有幾大，點樣處理例外情況。正如唔Q邊個牧師話扮鬼等於交鬼，首先，可以去翻查一下聖經，有無記載過鬼係咩樣？只有講過被鬼附的人係點。現時魔鬼嘅典型形象，其實是取材自希臘神話中半人半羊的PAN。我曾經上過李錦彬牧師的《從聖經中辨別諸靈》，係聖經中，鬼係屬於靈界，無形無相，無人講得出鬼係咩樣。所以根據聖經，人係唔可以扮到鬼，只是扮演到創作出黎，經過藝術加工嘅形象。

或者真係去下D party就知，真係會扮鬼嘅人，係少之又少，只係一個cosplay大會，唔少人甚至會扮成耶穌添。扮耶穌會鬼上身呀，咁教會又叫人效法耶穌，點呀，果D Comic com 咁點呀，去完個個比鬼責呀。好多時D福音話劇都會有人扮魔鬼添啦，又點計數？

更大鑊係，佢地經常拎住呢堆「理由」，走出黎嘗試說服其他人接受同支持，對住信徒仲好少少，你仲聽得明佢講乜，大家同為肢體會留幾分薄面。對住非信徒呢，人地又點會咁客氣，當然比人抽到變人乾。而當其他人駁斥呢班基督徒提出的理據，真係好似遇到人鬼上身一樣，無論如何討論落去，班教徒立場總係紋風不動，甚至覺得自己為義受逼迫，反而令到佢地更加堅持己見。

其實呢種人，只係為咗表現自己的宗教情操，就一如好似企係街口祈禱嘅法利賽人一樣，我實在告訴你們，他們已經得了他們的賞賜。再講，好多反對慶祝萬聖節嘅人，本身就唔會，亦從來無參加過萬聖節活動。呢種信仰宣示，著實係好廉價，因為倒頭來佢地根本無犧牲過任何野，反而浪費好多人嘅寶貴光陰。《令人噴飯的謝飯》中提過，好多基督徒話自己為主付出，唔做呢樣唔做果樣，實情係佢地無能力去做，盡力去做亦唔會有咩成果。明明係世界中撈唔掂無發達，就話自己唔貪愛世界，知足常樂過簡樸生活；明明係溝唔到女溝唔到仔，就話自己要運用獨身恩賜服侍教會。真係人唔笑，狗都吠。最慘係，呢D人即使走入教會服侍，好多野做到一蹋糊塗，不如老老實實走返出去貪愛世界算啦，咁就真係為教會著想喇。

真係，唔通我話我有能力做國家主席個位，因為要效法耶穌謙卑，所以先放棄，又要話比你聽咩！

要明白一件事，佢地做緊係一種信仰宣示，好聽d係法利賽式禱告，難聽D咪係當眾打飛機，而唔係打算理性溝通搵共識尋答案，但佢地又怕比人話佢地耶撚，所以又會擺一副樣能夠同人理性溝通，到辭窮理屈之時，又搬返信仰自由出黎為自己辯護，話大家唔可以咁樣攻擊佢。

年中唔少人咁中計，浪費生命同佢地討論。

對付佢地只要問一個問題，問佢係咩情況下，佢地會考慮改變立場。如果佢話無論點都唔會的話，你指出佢地既然唔會改變，咁討論黎做乜，不如慳返啖氣好過。