話左，台灣就算拉到去公投，教會呢邊都毫無勝算。之前有兩萬人去圍立法院聯署公投，香港呢邊果堆乜乜逆向時報，乜大聯盟，乜關注組，乜乜關注組大聯盟同大聯盟關注組起勢咁報，以為可以顯示實力，教會不可欺。之後12月3日全台反同婚活動，全台約17-20萬人出黎遊行，係教會界入面唔少人瘋傳，以為台灣有救，我已經非常不以為然，教會仲以為係同性婚姻一事代表到大多數，實在太傻太天真，人地今次一個凱道晒你冷。
我再講一次，教會唔好再迷信自己咩代表「沉默的大多數」，沉唔沉默加埋教會反同呢邊都係少數，果套講左十幾二十年的同運陰謀論社會上無人會buy，明光社D書，除教徒之外有咩人會買，所謂「可以說服到大眾的公眾理由」亦只係自欺欺人，真係說服到，今時今日就唔會咁多人支持對家。本來呢個只係一個好簡單的邏輯，你說服到大眾支持你，你就係多數；發覺自己呢邊唔夠人多，就係自己講法說服唔到人。做唔做到大多數亦不嬲唔係教會著重點，而係堅守真道，活出信仰。
除左係新教呢邊，你試過係邊個團體到聽過呢種陰謀論？連天主教反同性婚姻，都唔係咁攪法去抹黑對方，話要同摩天輪結婚。因為呢套陰謀論同大眾自己親身經歷有差，你越宣傳，社會公眾越反感，教會呢邊支持度越低。
係唔願意接受真相的情況下，教會面對矛盾的講法，開始出現認知失調，我地係社會大多數，但我又無法說服社會大多數黎支持我，反而支持對方，遊行示威人數又唔夠人地多，背後一定有其他的理由，我地咁正義，一定唔會係我地錯。惟有自己創造現實黎說服自己點解會出現呢種現象，所以就出現著名的同運陰謀說：同運背後有好有大陰謀，好多詭計，佢地掌握晒社會上各個關鍵位置，滲透晒大學/政府/媒體/跨國企業，黎推動自己議程，仲勁過Dan Brown筆下光明會同共濟會加埋，比佢地成功之後亂倫、孌童、人獸、多人婚姻合法化，你個仔係幼稚園有人會教佢肛交，呢個世界會人類滅絕冚球鏟。大家千祈唔好比佢地誤導，我地先係忠架。
係呢個同運陰謀論影響下，出現兩個後果，第一頭先寫完，就係呢套講法同社會大眾經驗不符，無說服力，你越講大家越反感，覺得教會痴鳩撚柒線，即係你話黃耀明、何韻詩其實係隸屬一個全球性的同志平樣祕密會社，會員仲有美國總統同蔡英文，同加埋Apple CEO Tim Cook，呢個組織勁過共濟會，二三十年間就控制晒全球，意圖推動平權運動流治全世界，將人類推向罪惡深淵，大家會點睇？我要聽陰謀論我去聽雲海啦！而家教會就做緊類似野。
其二，因為覺得對方好多陰謀詭計，結果就成日疑神疑鬼，少少事就大炮打烏蠅，衝晒出黎，事事扯到去同運陰謀論之上。對方未必真係支持同運動，只係有少少辣得到，教會即唔放過任何機會盡全力去反撲。再加上教會認為同運打茅波，佔據社會少會關鍵位置黎推動同運議程，所以反映係下層信徒上，覺得對方不擇手段時，我地亦唔需要對佢地客氣，否則我下一代就比人屌屎忽，結果為反同乜都做得出，人身攻擊，強辭奪理，抵譭抹黑，甚至肢體衝突，總之我地要贏，維護世界和平少少犧牲在所不惜。我想問，基督教信仰係咁架咩？
因為咁，好多人係因為教會態度轉移去支持對方，佢地未必知道同運係乜，性解放係乜，同性婚姻對社會有乜影響，但教會惡形惡相歪理說盡，人性係鋤強扶弱，佢地就自覺有責任去對付教會，令教會唔好過，以免教會勢力坐大。而家出現的情況，教會越打壓，同運就越易贏得社會大眾支持同同情，情況有如第一世紀基督徒被逼迫一樣，越多逼迫發展越快，越多人睇到佢地受盡壓逼都唔放棄自己所堅持，反過來感動到好多人。
台灣教會係反同婚之事上敗象已呈，回天乏力，實在有乃一眾基督徒的努力，再唔痛定思痛，檢討自己，輸唔係一場同運之爭，而係輸掉整個教會的見證。輸唔緊要，勝敗乃兵家常事，但若果連自己輸D咩都唔知，想贏返就好難。
台灣教會係反同婚之事上敗象已呈，回天乏力，實在有乃一眾基督徒的努力，再唔痛定思痛，檢討自己，輸唔係一場同運之爭，而係輸掉整個教會的見證。輸唔緊要，勝敗乃兵家常事，但若果連自己輸D咩都唔知，想贏返就好難。
沒有留言:
張貼留言