警告!

本人並沒有接受過任何正統神學訓練,所有發表內容,全屬個人信仰心得及教會生活經驗分享,敝blog負能量爆燈,如閱讀時感到不適,或出現任何不良反應,包括痰多咳嗽,夜睡不寧,神經緊張,潮熱汗出,心煩多疑,踎身起身見頭暈等徵狀,請即時停止,並向專業人士尋求協助。

2016年12月19日 星期一

信與不信,不能同食一撻


信與不信呢個問題,真係已經到好老土,不過由於參加咗思道平台的活動,不免又要總結一下自己的諗法。


你問我信信聯婚對信仰有無幫助,其實我會答你有,我無大家諗得咁反傳統,但我講果幫助唔係教會講果套。教會話有共同信仰,彼此有相同價值觀,對兩個人的感情同他日婚姻有幫助,即係,教會成日同你講,信仰唔同,淨係十一奉獻比唔比已經有排拗,仲有第日教仔呢,睇死信與不信一定家嘈屋閉。呢種睇法實在過於簡單,甚至叫得上膚淺。一個人的價值觀形成有好多複雜的原因,唔係單單信仰相同,大家諗野睇野就係接近,大家就可以做神仙眷侶,我好肯定咁講,你成長背景、家庭環境形響你點揀伴侶,絕對大過教會。去到我呢個年紀,身邊D人結晒婚,我咪一樣見過基督徒夫婦要為錢嘈交,一樣會嘈究竟比幾多奉獻,如果兩個信徒結婚就會交齊十一奉獻,我相信教會奉獻會升返一倍左右啦。

信信聯婚係教會最大優勢係,係教會有豐厚的輔導資源,係有問題時可以適時介入幫手。信信聯婚的人需要教會的照顧,教會為咗打同運,亦需要信信聯婚代其宣傳家庭價值,生養眾多,形成一種互惠互利的共生關係。你話我會唔會諗得太功利,試下今晚即時宣佈,果堆天主教基督教名校,信主無分加,一夜之間,你估唔見咗幾多「基督徒」父母。你試下教會,今個星期cancel晒Awana英語主日學,又有幾多「基督徒」父母帶埋個仔女轉會。

對搵唔到的人無幫助仲好大破壞,搵唔到又分三大類,男信女不信、女信男不信、食自己。

雖然話有一軛論,但男信女不信在教會私下相當受歡迎,至少好少可棒打鴛鴦叫你分手,仲好有心成日叫你邀請另一半返黎,返到黎仲無話會問長問短,逼佢聽福音。因為中國傳統想法,係嫁雞隨雞,嫁狗隨狗,大家認為女方最後會信,變成教會實質增長,所以大家比較有心機放長線釣大魚,慢慢傳福音,返教會唔會比去好似比人Sale旅遊會藉咁,幾個人夾一個,疲勞轟炸。就算女方長時間唔信都好,甚至到最後,女方係未信情況下佢地結咗婚,因為教會願意接納,男方因為感情問題而離開教會的機會較低,我真係好少見過有弟兄,因為條女唔信而走人。

調轉女信男不信,女方往往係教會承受極大壓力,成日擔心佢比人呃,成日比人問有無做愛,擔心佢比人食咗隻豬,比人滾大個肚,比人騙財騙色,雖然我明白,教會姊妹唔少真係純近乎鈍,真係唔呃你呃邊個。好多教會明文規定同不信的人拍拖要停事奉,停聖餐,甚至會逼你分手,而呢D紀律好似專為姊妹而設咁,我見過一D男信女不信的例子,同居埋,男方係教會依然可以事奉,無人執行紀律。另一單比有個姊妹比人知道同個唔信嘅拍拖,連崇拜上台獻詩都比人ban。大家亦覺得個弟兄好似聖人咁,從來無性衝動,從來唔扑野,好少會有人去探聽弟兄有無搞過(or by default當佢地有) ,但姊妹通常都係呢D紀律嘅受害者。

結果,我見到經常出現兩個情況,第一,女方拍拖堅持一段時間,或者決定結婚後,索性離開教會,免得受人白眼。唔少教會傳道人講明係唔祝福信與不信嘅婚姻,唔鼓勵甚至係反對教友出席,沈旭輝個例子,你話沈旭輝同佢老婆段婚姻係不被祝福,佢地兩個無幸福,但我好肯定佢地幸福過果堆,最後要係屋企養貓嘅獨身恩賜囉。

其二,如果個男仔真係好鍾意個女仔,真係好想結婚 or 合法扑野,但又真係唔想信耶穌,佢會講大話呃個女仔話信。大家聽到後哈利路亞感謝主,禱告蒙應允,流淚撒種觀呼收割。然後個男同一時間上初信班、洗禮班同婚前輔導,洗完禮book教堂結婚行禮,一條龍服務。咁結咗婚,甚至生埋仔個男人先坦白話自己其實唔信,咁叫個姊妹可以點?婚後初初或者都會見佢地返下教會,之後生命影響生命,慢慢消失。

咁樣教會想出現邊個情況多D,佢地兩個因種種原因離開教會,定係接納呢種現象,期待日後有所轉變呢。

呢種信與不信嘅經歷,又再加深信與不信無好結果呢個刻板印象,而呢個現象,只不過係教會自我預言應驗,你覺得佢地會出事會散,所以千方百計去搞散佢地,結果真係散咗同出事。

食自己果班又點,又可以分弟兄同姊妹兩個Case黎講。之前睇過基督徒婦女協會一個調查,覺得自己有獨身恩賜的姊妹,唔到5%,即係有大部份未婚的姊妹,係唔覺得自己有乜獨身恩賜而被逼守寡,引發的問題,可能比信與不信更嚴重,已經變成一個社會問題。出黎社會做事,大家或多或少曾經遇過D女高層,三十到尾四十出頭,無拖拍嫁唔出,訓身工作,全情投入,個人mean到爆,固然覺得天下間所有男人得罪咗佢,佢咁好條件做乜無人揀,亦同時發揮強大嘅queen bee syndrome,對所有後生過自己嘅女同事睇唔順眼。

當教會有好多呢類人時,氣氛又點會和諧呢,查一次經都刀光劍影,暗藏殺機。

我一直有個陰謀論,教會其實係比呢班姊妹撐起,佢地好多時間去事奉,身上又好多閑錢去奉獻,所以教會養寇自重,無心去解決姊妹嫁唔出呢個問題,個個有家庭要相夫教子時,仲邊有心去教會事奉,有錢都留返同老公去旅行啦,有錢都留返比仔女日後讀書啦,仲比錢教會擴堂咩 。嗱,做個非正式統丫,你教會兒童學主力做服侍果班人,係咪就係呢班嫁杏無期嘅姊妹?同時佢地又會幫手插花同帶詩班,讀神學院延伸課程。

我唔係想鬧班姊妹,佢地都係教會呢套價值觀之下嘅受害者。求學時叫你比心機讀書,唔好輕易去談戀受,影響學習,上帝會為你預備,你唔係信唔過上帝嘛。到出黎做野,又叫你趁年輕奉獻主用,唔係到臨老走唔郁先去非洲宣教咩,當一個人結咗婚個心就去左家庭到,趁自己仲單身時多經歷一下,多嚐主恩滋味。怕你唔順服仲引多段聖經:「沒 有 出 嫁 的 、 是 為 主 的 事 挂 慮 、 要 身 體 靈 魂 都 聖 潔 . 已 經 出 嫁 的 、 是 為 世 上 的 事 挂 慮 、 想 怎 樣 叫 丈 夫 喜 悅 。」去到三十出頭,先突然同你講,那人獨居不好,要「六個一」,「一生一世,一男一女,一夫一妻」,咁樣生命先完滿。你年紀唔細,好搵返個人,要生仔就趁早,單身唔係唔好,不過結婚比較好囉,丈夫先係頭,你睇下師母廿幾年黎幾咁支持我,就知一個家庭對事奉者係好緊要。但你唔能夠降底標準喎,因為你要搵到上帝預備比你果個,唔好揀錯。

結果,班姊妹到三十幾歲人,驀然回首先發現,過去十幾二十年青春比晒教會,教會又幫唔到佢地搵老公,自己專心事奉又好少同異性深入接觸,白紙一張,未拍過拖,經驗值近乎零然後叫佢地打大佬,要拍拖要結婚要生仔,想緊張亦唔知係邊到埋手。 

咁弟兄果邊又點呢,作為一個資深單身弟兄,我想講話係男女比例極唔平衡底下,做弟兄亦唔會好過,唔好以為咁樣就好容易溝到姊妹,一樣係極級困難。因為無論社會同教會之中,係鼓勵姊妹向上嫁,要搵一個社會經濟地位,以致屬靈生命好過自己嘅男人,因為聖經話丈夫係妻子的頭,妻子最多做條頸。

姊妹25歲自己搵萬五,希望嫁個搵二萬五,30歲自己搵二萬五,想搵過最少搵三萬五,到自己35歲,自己搵到過三萬五,對方最少係專業人士月入五萬以上,到40歲自己都係專業人士時,唔係人中之龍仲點襯得起自己。到姊妹呢個年紀,專心係教會事奉咗十幾二十年,分分鐘讀咗幾個神學延伸課程,做埋執事會主席,再要搵個比自己屬靈嘅人,兩樣加埋,我唔敢話香港教會入面無呢D人,每幾十年應該出到幾個嘅……,而一個靈命好,月入以十萬計的青年才俊,又何須揀件35+的中女呢?

咁係呢情況下,一D年紀稍大嘅在職團契,慢慢變成姊妹團契,弟兄無立錐之地,最終離開,又令姊妹識到男仔嘅機會更加細,跌入惡性循環。

成日有人話我有破壞無建設,批評容易投入困難,咁我又講下教會日後可以點做。

若然我咁勁揪,寫幾寫就打爆咗個軛,教會突然間多咗 好多信與不信的情侶同夫婦,教會有乜資源去應對,點樣去關心呢班人,點教導佢地?對教會黎講有乜衝擊。呢D野,教會係打破一軛論前,真要坐底好好研究下,謀定而後動,突然無咗班中女撐住,教會都唔知會變成點。或者傾完之後,大家寧願守寡都唔想打爆個軛,咁樣大家就要認認真真諗諗,教會應該點樣去牧養呢班人呢。

當討論仍未發生,真係唔好要求人做到D乜。

6 則留言:

  1. https://zh.wikipedia.org/wiki/%E6%83%85%E4%BA%BA%E8%8A%82

    情人節的起源有多個版本,收錄如下。
    古羅馬「華倫泰」的傳說
    據《世界圖書百科全書》(World Book Encyclopedia)資料指出:「在公元後200年時期,羅馬皇帝克勞狄二世禁止年輕男子結婚。他認為未婚男子可以成為更優良的士兵。一位名叫瓦倫丁的教士違反了皇帝的命令,秘密為年輕男子主持婚禮,引起皇帝不滿,結果被收監,據說瓦倫丁於公元269年2月14日被處決。」

    昔日羅馬皇帝禁止男子結婚,是因為他認為已婚的士兵怕自己戰死則留下妻子兒女乏人照顧,不會奮勇作戰,損害羅馬軍的戰鬥力,不利羅馬對外侵略擴張領土的國策
    愚見認為,教會為保障勞動力和資金的供應,使盡手段或明示或暗示阻止女信徒結婚,正和羅馬皇帝的想法如出一轍

    回覆刪除
  2. 『食自己果班又點,又可以分弟兄同姊妹兩個Case黎講。』

    老兄, 你講左姊妹個 Case, 好似未講弟兄喎。

    回覆刪除
    回覆
    1. 好! 姊妹要 marry up, 弟兄要 marry down. 兩條線永遠走唔埋,死症!

      刪除
  3. 有時聽到人哋話:
    可惜你老公唔信主,佢唔信既話將來你係天堂咪見唔到佢
    心諗呢d人根本就當自己係上帝既發言人甚至代上帝做埋審判一個人將來會上天堂定落地獄=.=

    回覆刪除
    回覆
    1. 呢樣野我真係好奇怪,點解有人可以決定到邊個日後上天堂?
      連耶穌係福音書都開口講過,不是口稱我主我主的人就能夠,甚至奉佢名趕鬼醫病的人都唔得,只有遵行父旨意的人先得。

      刪除