警告!

本人並沒有接受過任何正統神學訓練,所有發表內容,全屬個人信仰心得及教會生活經驗分享,敝blog負能量爆燈,如閱讀時感到不適,或出現任何不良反應,包括痰多咳嗽,夜睡不寧,神經緊張,潮熱汗出,心煩多疑,踎身起身見頭暈等徵狀,請即時停止,並向專業人士尋求協助。

2017年2月2日 星期四

一百億負能量戰士下集


傳統黎講,我地唔應該叫負能量、悲觀、負面、消極,中國有一個好優美嘅詞語去形容,叫呢D係憂患意識,所謂生於憂患,而死於安樂也,好事多磨,多難興邦,True love never run smooth,寧願你諗多咗,預備多咗,總好過你遇上困難後束手無策。我諗得衰少少,無事發生,賺咗;我諗得太理想,但出意外,點呢?積極諗法可以解決預備不足呢個事實?


早幾年美國Barna Group做咗個研究,睇下青少年人點解唔再鍾意去教會,呢個研究最後變成一本書叫《論盡基督徒》(Unchristian),其中一個點係話,教會對懷疑信仰的人不友善。


係正能量橫掃下,係好強調乜野逆境自強,what didn't kill me made me stronger,但只係強調最後結果係自強同stronger,然後請你黎出黎講見證,如果你無變強變壯,無乜理人係逆境中爭扎求存嘅痛苦同迷惘,若然你失敗咗,更加無人會請你講見證。今時今日教會內嘅見證,基本上係同一個模倒出黎,幾乎係編劇理論入面嘅神話結構:英雄嘅出現, 英雄嘅墮落,以及英雄嘅回歸。信主前點點點以為自己好醒,遇到挫折跌低,信主後重上高峰,比以前更好。


係08金融海嘯後特別多同類型的見證,某某金融海嘯後經歷生意失敗,幾乎要破產,係一籌莫展之際,突然比個朋友帶咗返教會,信咗主,然後佢生意就慢慢上返去,甚至比之前做得更大。當中有無見證到耶穌點改變佢生命呢,無!佢信主前專心做生意搵錢至上無時間陪屋企人,信主之後一模一樣。如果你話佢之前做生意唔順利,信咗耶穌之後,覺今是而昨非,明白到錢唔係萬能,雖然後來生意好轉,佢都分多咗時間比屋企人,又捐錢支持公益事業,又去做義工幫弱勢社群,呢個世界錢賺唔晒,最緊要係耶穌,都比我見證到佢生命轉變丫。咁呢D見證,見證咗D乜呢,咪見證咗經濟週期高低起跌囉。


我地淨係鍾意睇人變好變強一面,然後拎出黎做宣傳,擔心個見證唔夠勁唔夠靚吸引唔到人,而呢種別,好似D減肥前減肥後廣告咁,越誇張越有宣傳作用。我成日諗,我地個信仰係咪咁架,耶穌最成功一刻,就係世人睇佢最失敗一刻,傳道傳到比人釘上十字架,班細嚇到四散。耶穌如果要我地成功要我地勁,要我地出人頭地,正能量爆燈。佢駛鬼釘十架咩,佢釘人上十架就差唔多,再唔係十架跳落黎,拳打彼拉多,腳踢大祭司,企係聖殿上振臂高呼:「I'm the King of the World!」,下面幾十萬人齊聲和應,咁咪型到爆。點解耶穌偏偏用個咁霉嘅傳道方法,我地成日話效法耶穌,我地效法咗D乜。


講遠咗,返翻黎。


你如果信完耶穌發覺自己經歷同呢D見證唔同,對信仰出現一D疑惑,得到唔係解答、同行或關懷,而係得到督責同指正,日日比人屈你話你對神無信心,甚至係疏遠同排擠。因為正能量世界有個講法,係話負能量會傳染,叫你唔好痴埋呢D人到,以免沾染到佢D衰氣。要醒要勁要成功,要痴埋D正能樣到。但點解班正能樣又會比你班衰神痴埋佢果到唔擔心你D衰氣呢,無得解架,世界上好多野係無解架啦,好出奇呀,尼斯湖入面有無水怪吖,呢個世界有無外星人吖你話。


教會要你常常感恩喜樂,你發覺自己唔得,各種生活壓力下成日苦瓜乾咁面口,你會比人話:「基督徒要時常感恩,點解你做唔到,天父爸爸比咗咁多野你,你真係無野可以感恩咩,係咪因為你對神唔夠信心?你快D向神求信心啦」而面對呢D問題,教會提供的答案往往好膚淺。


你無信心,佢叫你有信心;
你唔開心,佢叫你開心;
你成日憂慮,佢叫你不要為明天憂慮;
你覺得教會好虛偽,佢叫你真誠。


即係咩?


你餓呀,佢叫你飽,飽咗就唔餓;
你窮呀,佢叫你有錢,有錢就唔駛窮;
你買唔起樓,佢話,你有層樓咪得囉;
你比人裁員裁出黎失業,你搵到工咪唔駛驚囉;
你擔心嫁唔出,唔緊要,天父已經賜下獨身恩賜比你。


只係將問題改成相反詞講返一次比你聽,我地可以輕易指出終極目標,對信徒有好高標準,但無提供路徑,亦唔會陪伴同行,然後將當中所有唔合理嘅事美其名為操練,但求所有人行到出黎一式一樣,有個基督徒樣式比辦人睇,嗱,信咗耶穌,腦筋靈活左,人又高左,自信心都返晒黎。結果,教會再唔係一個受傷得醫治得安慰嘅地方,而係一個正能量訓練場地,唔夠正能量就比人DQ。


唔單止無法解決疑惑,相反令人無所適從,大大加深對信仰嘅疑惑,咩叫「對神無信心嘅最佳解決方法係對神有信心」,慢慢呢D疑惑係長期缺乏理解疏導下,演變成真正嘅信仰危機,最後離開教會。結果加深咗教會入面嘅印象,以為當人對信仰出現疑惑後,最終會離開教會,一見人有乜問題對信仰有疑惑同無乜信心之時,急急要制止佢地,想將佢地導入正軌,逼佢地接受教會正統教導而變返正常,最後搞走人,跌入自我應驗預言之中。


即係好似呢篇文咁




//志傑也是生長於基督教家庭的青年,自小隨家人返教會,參加崇拜聚會、團契與主日學,風雨不改。然而,當志傑上大學,開始博覽群書放眼世界廣結朋友時,發現外面的世界觀與家中及教會所教導的全然不同,便不免把外面遇到的問題帶回來討論。求知欲強的他,其實並不是要挑戰信仰,他只是期望有人給他指點迷津。例如,聖經不是說掌管萬有的上帝是公義的嗎?為甚麼民間卻說「殺人放火金腰帶,忠忠直直終需乞食」?聖經也說上帝是滿有慈愛的,但志傑從新聞報章所看見的世界卻都是甚悽慘的,既貧富異殊也天災連連,為何會如此…?


當志傑把問題帶回家,父母便會以「不該懷疑神」來禁止他發問;教會傳道人更評他為反叛青年,說基督徒的責任就是信,「信者得救」、「因信稱義」等都基於「信」;團契導師更懷疑他的得救有問題。說真正信耶穌的人,是不應問問題的。志傑為了表示自己是真的信耶穌,便從此不敢在家中或教會問問題。但也同時愈來愈感到這信仰的不實在。在校園中,他可以雄辯滔滔,但在教會裡,他的人卻愈來愈沉默,偶爾還有一種異鄉人之感。


踏入社會工作後,志傑不想自欺欺人,也為了不甘心活在「人云亦云」的日子裡,便以忙為藉口不再返教會了。//


好多離教故事如出一轍,有問題唔比問,比人話係「不信」,到最後佢真係「不信」比你睇,決心離開教會出去搵答案。


有時候負面情緒的確係關於處境,心境會因為處境改變而轉變,即係你失業時自然好擔心經濟,會問上帝會唔會有供應,但如果有你月入五萬,供完層樓,又溝到女,自然信心滿滿,認為上帝必看顧。但問題係,如果教會入面D正能量爆燈,對神好大信心嘅人,多數都係生活無憂,中產以上,富豪未滿,咁我又要問,佢地嘅信心係源自優裕嘅生活條件,定係真係對準神呢,如果好似約伯咁,拎走晒呢D條件,有幾多人會堅持落去。我好串咀講過幾次,唔好話拎走D車呀樓呀高薪厚職呀健康呀,淨低拎走佢個仔女因相同信仰,入基督教/天主教名校果額外五分,睇下一夜間唔見幾多基督徒父母,幾多老豆老母唔再帶個仔返教會。有D人乜著數都無依然唔放棄信仰,爭扎求存堅持唔離開教會,佢地憑藉嘅難道又唔係信心,認為即使環境如何,神應該係靠得住,就算最後得個桔,無名成利就,仲保持盼望。你覺得邊d人信心大D?


好似數學原則咁,正負得負,負正得負,負負先會得正,惟有認同同體諒負面情緒,先有辦法將人係負面情緒中解救出黎,你對一個負面人灌輸正能量,否定佢地嘅情緒,逼佢地要正面,實際係推佢落火坑。你要陪一個人一同疑惑,一齊搵答案,佢先能夠走出疑惑。呢D野一D都唔神秘,係教會成日講嘅同理心。早年套《玩轉腦朋友》講過負面情緒嘅積極意義,教會唔少傳道人仲拎入講道做例子,教人咩叫「與哀哭的人同哭」,但教會氣氛有無因而改變,稍為善待少少悲觀嘅人,容許一D人對信仰抱有懷疑呢?


可能有,我唔知呢。


係呀,我係負面架喇,睇多d天使充喜下啦。

PS. 怕咗大家,我改咗blog個副題,呢到負能量爆炸架,要正能量去買天使心啦,徐若瑄果本呀

沒有留言:

張貼留言