警告!

本人並沒有接受過任何正統神學訓練,所有發表內容,全屬個人信仰心得及教會生活經驗分享,敝blog負能量爆燈,如閱讀時感到不適,或出現任何不良反應,包括痰多咳嗽,夜睡不寧,神經緊張,潮熱汗出,心煩多疑,踎身起身見頭暈等徵狀,請即時停止,並向專業人士尋求協助。

2017年10月11日 星期三

深山大陰謀



相信呢幾日大家都食飽花生,花咗幾日時間去考古,發覺成件事真係有少少古怪。

以下內容純粹以陰謀論出發的另類解讀,志在炒下花生,各界敬請留意。



屍屍基本係三無人仕,無背景,無歷史,無出處,佢話自己係基督徒,但出自咩教會咩宗派,信主幾耐有咩經歷,完全搵唔到。有無人私底下見過真人,真係佢現實生活的朋友?而家個account201510月出現,據聞佢之前個account比人封咗。


屍屍好刻意咁打入香港教會界,wall上面有唔少有頭有面的人留過言、蒲過頭、派過like,仲特別對準一班耶教中佬派軍餉,我覺得呢個取態非常獨特,因為後生都係鍾意群埋一班後生,邊有興趣應酬你班中佬。果堆教會中佬,怕唔怕比自己老婆知, 係網上日日追住件後生女派like呢。

呢個應該唔係佢主account而係分身,無提過佢私下生活係點,除咗知道佢係外國住,偶然有D旅行相,同派下軍餉之外,主要就係用黎鬧中共鬧政府,鬧唔同政見嘅人。

以一個普通人黎計,又無投過稿到時代論壇,又無係香港教會界做過咩崗位,而佢寫D野,又唔係特別有營養,又唔係寫萱體宣傳正能量,可以話無乜真材實學,粗口爛舌,散播仇恨。

香港教會圈對政治有潔癖,深怕得罪政權影響北上傳教,只講愛同包容合一,對針對大陸人的仇恨言論,即使唔開聲反駁,都避之則吉。屍屍吸引到咁多教會人,幾乎抬舉到成為「香港教會反共女神」,前所未見。

係佢出post回post同貼新聞頻率之密,連我呢位自命網撚都慨嘆不如,如果唔係全職咁做,佢應該要用好多私人時間去管理個fb,仲未計佢要覆人私下嘅message。


從後果而論,屍屍好成功咁挑動到兩大派之間的爭執,或者好成功挑動到希臘文權威去攻擊顏色神學。所以坊間有好事之徒話,「都唔知究竟邊個先係Fans」。


豹公篇文惹起我一D疑竇,深山二聖的政治同神學立場,以我粗淺理解,講穿就係叫教會唔好參與政治抗爭呢趟渾水,讓教會成為教會,用一個更加鄙俗的講法係「大家讀多D聖經唔好搞搞震」,被豹公抨擊為港共神學、公公神學不無道理。


而最奇怪係,呢種立場,唔積極反共走在最前線,咪係屍屍最憎嘅立場之一,佢口口聲聲話反共,點解深山神學院無受到佢全天候嘅愛,定佢其實無讀過二聖嘅文章,唔理解佢地嘅立場。


深山二聖,近年不斷舉辦講座出書,宣傳其神學同政治立場,正如十口文武所言,深山幾乎成為香港教會政治立場的「準」代言人。


而顏色神學教授,好明顯比較企係當日雨傘運動參加者之中,深受年青人歡迎。


咁重手要打死顏色教授,背後係咪咁簡單係市場競爭呢,唔抵得人係FB咁受年青人歡迎?就算鬥倒顏色教授,對深山個牌子有害無益,係七傷拳,先傷己,後傷人。好多人知道件事之後,話明唔去深山讀神學,甚至會杯葛唔買佢地d書。如果係市場競爭,殺敵一萬自損萬一,無人蠢到會拎自己個招牌黎玩。


咁作為一個陰謀論愛好者,呢一刻要問一句,兩大派鬥過你死我亡,成件事嘅潛在得益者,會係邊個,邊個最開心呢。顏色教授退場,深山神學政治立場成為教會正統,對香港現時政治環境有乜影響呢。兩虎相爭,如果最後得益係第三方的話,咁好有理由相信,成件事係第三方搞出黎,背後有勢力引導緊成件事。


而且,有人爆出曾經男扮女裝嘅深山神學教授骨格精奇,無相關神學牧養訓練,但又可以到一間神學院做教授,成件事非常詭異。以中國傳統官場倫理解讀,破格提拔,可以肯定「上面有人」。


對付顏色神學,文攻(深山三聖)武鬥(屍屍FB)都齊,手法係咪有D眼熟?係咪好似某個組織對付異見人仕一樣。


背後勢力一定係魔鬼,應該係,除非唔係。


最後,我想公開同梁家麟院長道歉,講聲對唔住。之前仲寫文批評過佢的「上位論」:「個人的發言空間,跟他的江湖地位是成正比的。」認為咁樣有違耶穌謙卑的教導。


今日所見,係香港教會界當中,上到位,有江湖地位之後,真係可以為所欲為,暢所欲言,甚至糾眾生事,圍堵他人。原來梁院長一早睇清教會係江湖,係講實力,講地位,講叢林法例,講人多勢眾,效法耶穌謙卑呢D事,都等上到位先發財立品。


院長英明,唔等不及,還望院長大人有大諒,不記小人過。

7 則留言:

  1. 屍屍係好可疑,尤其她粗口爛舌得唔似女人,更甚的是她在fb中post過一幅女人穢內褲的圖,我感哇然! 這使我覺得"她"的真身應不是女人的可能性很高。

    回覆刪除
    回覆
    1. 就咁睇屍屍應該係真人黎,如果係男扮女裝的話,我諗真係要去到人格分裂先得

      刪除
    2. 咁呢個女人真係徒有外貌

      刪除
    3. "徒有外貌"? You really think so ?
      或是"相由心生"?

      刪除
  2. 會唔會係:
    https://www.facebook.com/howtindogs/

    回覆刪除