先講D數據。
首先，要多謝高登先，係感情台其中一個post我發現一個殘酷嘅事實。
雖然呢幾年傳媒成日報導香港女多男少，搞到又乜盛女物剩女，好似成為一個社會問題咁。但事實上，整體上女性比較多嘅原因，第一係因為有幾十萬外傭，第二男性通常比女性早死，令到六七十歲以上女性人口大幅度拋離男性，將所有數字加埋就會得出香港女性人口比男性多呢個現象。
而家香港實際情況，係適婚年齡層(25-45)，一向都係男多女少，比例約維持係110：100，而且情況會持續落去，因為係25歲以下年齡層，一樣係男多女少。
當然各人愛惡不同，我不能夠完全排除有人喜歡非本地籍人士，或者十幾歲就鍾意六七十歲以上嘅單身女性，不過與一般傳媒報導香港女多男少嘅情況，又話好多男人上大陸結婚，令情況惡化，實際上係有一D微妙嘅差異。
唔好再相信香港女多男少..所以男仔一定搵到女呢個理論
咁教會情況係點呢，眾所週知，香港教會男女比例懸殊，正常就起碼都七三，一個單身活動極端起上黎可以去到九一。但一直無乜實際數據顯示，我暫時只有搵到呢份資料，香港香港教會適婚年齡男女比例，大致上是一比三，即係100：300。
即係話，教會適婚年齡層個男女比例，大約差市面上兩倍。教會每一百對新人結婚，背後就產生二百個教會剩女。真愛固然值得等待，但家下個真愛唔夠分點算呢？
以下有個四個答案可供選擇：
1.恢復舊約族長時代一夫多妻制。
2.禁食祈禱，期望短時間內香港有大量未婚男性信主。
3.打破一軛論，接受與不信嘅人一齊
4.我唔知，我唔聽，我唔理。
駛唔駛要個五十五十，定打電話問朋友呢？
而呢個已經係2009年嘅數據，咁教會除左叫班姊妹同耶穌拍拖外，呢五年間做過D乜呢？人生究竟仲有幾多個五年呢？
5. 「我睇到，呢幾年神會係教會興起姊弟戀」
回覆刪除呢句野，早幾年一個四張幾的單身女傳道同我講既，當佢講到第三次，想我加入佢個群組"條件差等極冇人要越來越老惟有寄望姊弟戀之教會單女群"時，我好寸咁回佢︰「唓，我都唔鍾意細過我的男人既。」
根據數字，莫講話姊弟戀，就算母嬰戀都唔夠分，佢地幾時先識醒呀！
回覆刪除你指出事實，但你教會已經盡力。
回覆刪除一些教會不聞不問，我就不相信他們關心姊妹婚恩問題。情人節當然要和師母過二人世界。