警告!

本人並沒有接受過任何正統神學訓練,所有發表內容,全屬個人信仰心得及教會生活經驗分享,敝blog負能量爆燈,如閱讀時感到不適,或出現任何不良反應,包括痰多咳嗽,夜睡不寧,神經緊張,潮熱汗出,心煩多疑,踎身起身見頭暈等徵狀,請即時停止,並向專業人士尋求協助。

2015年4月21日 星期二

基督徒特別的關心技巧


post下呢條片先


其實係教會耐,唔多唔少都應該學過一D輔導技巧,知道乜野叫同理心。但係呢,教會D弟兄姊妹處理其他人嘅問題時,卻又好鍾意鑽牛角尖,不斷嘗試咁搵下對方有乜問題,係咪犯左D乜罪未認,係咪唔夠信心,係咪唔夠祈禱,係咪靈修唔好。而呢套標準其實又set到天咁高,無任何客觀方法可以證明,結果係無人可以達標,人人都係有罪唔夠信心唔夠祈禱靈修唔好,從而合理化解釋左件事,證明你係抵死,事出有因。

佢地會成日覺得,一個基督徒生命出現問題,一定係佢做錯事,一定係佢驕傲、自高自大、無信心、唔依靠、唔合一、唔係真基督徒,搬一套套套邏輯出黎:

生命出問題係因為唔依靠神 唔依靠神生命就會出問題

依靠神生命唔會出問題

生命無問題就證明你夠依靠神


loop死左。
我唔係好明呢套價值觀點黎,因為約伯記寫明,一個人嘅遭遇,同佢係咪依靠神無乜必然關係,上帝仲鬧埋約伯幾個朋友多管閑事,定係一般基督徒都唔多睇約伯記呢。

所以有時候,呢D所謂弟兄姊妹關心,一D關心效果都無,仲傷害緊人。

你老豆死左但未信主呀!

哎呀,點解你平時唔用多D時間陪佢,你早D同佢傳福音呀,點解你對神咁無信心呀!
你失業無錢開飯好擔心呀!

哎呀,呢個係神比你嘅考驗,點解你唔多D依靠神,天邊飛鳥都不耕不收啦,點解你對神咁無信心!

你失戀空虛寂寞同凍呀!

哎呀,上帝所配合人不能分開,係咪你起初無好好聽神嘅說話,祈禱唔夠,自把自為呀,點解你對神咁無信心!
你遇到個仆街老闆唔出糧比你呀!

哎呀,你要順服你肉身的主人,乖僻都要順服,咁你有無好好為佢祈禱,從佢嘅難處著想,上帝比你上司大,點解你對神咁無信心!

撞車斷腳入左醫院呀!

哎呀,你係咪忘記左生命中乜野先係對你最重要,神只係想用一件意外令你明白返,耶穌先係你生命最寶貴,點解你對神咁無信心!

而最恐怖係,佢地真心以為自己關心緊人,係咁去追問你,不斷不斷不斷咁去挖掘你生命中嘅小問題,不斷為你祈禱,希望你回轉悔改,一搵到D問題就如獲至寶咁不斷放大,你身邊所有不幸遭遇,無論失明失業失戀定失身,一定係由呢D問題引起啦,無論傾緊乜,都會失驚無神整一句:「你要對神有信心」調返轉黎講,就係假定人信心不足,先將人定罪,然後提供解救方法,只要你改到呢D問題你就能一帆風順人生美滿,生命煥然一新,第日可以上台講見證。

你話佢咁樣做無補於事時,佢感受唔到佢嘅關心,佢就胡囧囧上身:

「我都係想關心你啫,點知會搞成咁喎!」

我唔知到最後,有幾多人係比呢D「關心」傷害刺透,從此以後唔返教會。

其實好多人唔開心去搵人傾時,唔係想解決問題,而係想搵人認同一下自己嘅感受,到最後佢可能都知道出現一D問題係由自己引起,但係果一刻,只係想有個人同佢講下:

「嘩,乜條仔/女飛你飛得咁仆街架。」
「D老闆就個個都仆街冚家產黎架啦,無個好人!」
「我搵律師同你告到個司機甩褲!」

沒有留言:

張貼留言