警告!

本人並沒有接受過任何正統神學訓練,所有發表內容,全屬個人信仰心得及教會生活經驗分享,敝blog負能量爆燈,如閱讀時感到不適,或出現任何不良反應,包括痰多咳嗽,夜睡不寧,神經緊張,潮熱汗出,心煩多疑,踎身起身見頭暈等徵狀,請即時停止,並向專業人士尋求協助。

2015年4月17日 星期五

愛主基督徒何處尋? 教會單身事工系列十九


為避免我有日橫屍街頭,再戴頭盔,只不過咁啱我寫女仔先,我之後都會寫普遍教會男仔問題,如果各位姊妹有任何不快經歷,歡迎PM我,我一樣會寫出黎。

上一回講到,好多港女身上出現的陋習,一樣會係教會女仔身上出現,一樣撞到好多觀音。至於其餘要求經濟能力、成熟穩重、專一、風趣幽默、愛護小動物、孝順父母、喜歡小朋友、勤奮好學、有上進心、無不良嗜好、婚後唔算同屋企人住、五尺十吋以上等等,就不在話下。

而教會女仔揀男仔嘅條件,又肯肯定多一項屬靈要求,而呢個屬靈要求,甚至會被視為最重要一環!就好似之前講過咁,討論理想對象最後總係「愛主基督徒」呢五隻字,或者係「比自己更愛主」。

咁乜叫愛主基督徒呢?同D女人話要個男人有安全感一樣,大部份人都講唔出係咩黎,往往係一D好虛無飄渺嘅印象。係咪話佢星期日返一堂崇拜,你去夠三堂;佢做一份事奉,你做三份;佢十一奉獻,你十三奉獻;佢一年去一次短宣,你一年去三次,你就可以追到教會女仔呢,咪傻的嗎啦,你D時間都用晒係教會到啦,仲邊有時間去識女仔。

當然, 姊妹對自己未來伴侶有要求係好正常,要佢比自己更好,要佢比自己更愛主亦係人之常情,但有D姊妹,因為響教會生活左好耐,亦已經成為資深單身姊妹,過住一種好敬虔嘅生活,又由於單身可以好投入教會事奉,亦承擔左教會入面一D好重要嘅崗位。

係呢個情況下,仲係要搵一個比自己更敬虔,比自己更愛主嘅人。我無話咁樣要求唔得,咁當姊妹已經去到呢個 level,仲要向上求時,係咪即係要考慮嫁個牧師呀、宣教士呀咁呢,有無調查過,唔考慮做人續弦咁話,全港未結過婚嘅牧師有幾多個?全港平均按牧年齡係幾多?我估計都起碼四五十歲啦,即係話你要嫁個阿叔甚至阿伯。或者搵個宣教士時,有無諗過要嫁去巴布亞新畿內亞先!你知唔知巴布亞新畿內亞係邊呀?你知唔知巴布亞新畿內亞首府叫乜名呀?仲未計有眾多單身姊妹,本身就係傳道人/牧師/宣教士黎架!係咪要飛過去敍利亞,搵對抗ISIS、有心為主殉道果班義士先掂呀!

(待續)

沒有留言:

張貼留言