警告!

本人並沒有接受過任何正統神學訓練,所有發表內容,全屬個人信仰心得及教會生活經驗分享,敝blog負能量爆燈,如閱讀時感到不適,或出現任何不良反應,包括痰多咳嗽,夜睡不寧,神經緊張,潮熱汗出,心煩多疑,踎身起身見頭暈等徵狀,請即時停止,並向專業人士尋求協助。

2015年4月13日 星期一

典型教會婚姻觀如何影響教會女性(教會單身事工系列十七)




上一回講到,教會女仔笨唔係一群村姑,唔少仲質素好好,但點解佢地都係無拍拖呢。


教會依然三五七九十一十三時強調「男人是頭」嘅教導,要求男性無論係信仰上,或者係關係上帶領伴侶,成為日後家中嘅重心,而女性就要順服溫柔沉靜依靠。

大家可以睇下條link,入面係一套典型過典型嘅教會婚姻觀,不斷係信徒成長中用黎教導大家。

http://christianresource.hypermart.net/christianresource/new_page_4796.htm

當中除咗有唔少係「想做就去做,聖經專為我服務」之外,係現代角度黎睇,部份講法已經接近性別歧視,呢D教導甚至會影響埋已經成家立室嘅信徒,例如有已婚團契嘅牧者,會勸喻個老婆放棄工作,安心在家生仔照顧屋企,因為咁先係聖經教導。

咁,當然,由於上一代男性牧者,係當時社會環境下,係自己家庭入面可以貫切實行到呢種諗法,可以留意,大部份師母,返到教會都成隻鵪鶉咁,差在真係無搵塊布嬲住個頭,有D真係結咗婚十幾廿年都再無打工照顧屋企,你就知道佢地無講大話。佢地經常地、恆久地係講壇分享自己幾十年前拍拖、相處之道,並視之為不變嘅教導,直到永永遠遠,阿們。

再加上係教會入面其他教導,話乜野你係上帝嘅寶貝,你被上帝設計成獨一無二,你係上帝眼中視為珍貴,上帝好愛你,你唔好睇輕自己,上帝係愛同珍惜每一個人,你要好好愛自己,要好好咁預備自己,唔好立亂糟蹋自己,當作一份最珍貴嘅禮物比日後嘅伴侶,你唔駛為一份感情去刻意改變自己(無論外表定內在),因為上帝已經無條件接納左你,上帝已經預備左一個同你天造地設嘅perfect match、Mr. Right,就快經順豐速遞送到你屋企,你記得留係屋企簽收。

可以夠膽講句,教會公主病風行比率,係遠超市面上一般港女。

因為近一二十年,香港女性嘅地位大幅提升,何止婦女能頂半邊天,直頭係頂晒、頂穿、頂爛、undingable 啦,係社會上,至少係新一代上,不少女性都出色過男性。但係中國社會傳統文化嘅影響下,依然強調男尊女卑,女性下嫁要面對相當大壓力,而教會似乎毫不察覺或毫不理會呢種因時代變化而帶黎嘅矛盾,有意無意咁加強左呢種男女間嘅刻板印像,男人就理性D,女人就溫柔細心D,男仔就要讀理科,女仔就要讀文科,男主外女主內,男人就要擔起頭家,女人就要學湊仔等等。

5 則留言:

  1. 最近寫了一篇討論信徒能否和非信徒結婚(典型教會婚姻觀之一),也算是「聖經為我服務」害人不淺教訓之一:

    http://wp.me/p612Gc-dn

    回覆刪除
    回覆
    1. 其實,我唔係完全反對教會信與不信呢套講法,但同一信仰唔等於有同一價值觀,同一價值觀又唔等於戀愛同婚姻可以持久同幸福,教會實在過份強調當中的必然性

      刪除
    2. 同意。但你為什麼不完全反對教會信與不信的講法?

      刪除
  2. 相同信仰同背境,咁實際上都有助發展,我唔完全否定呢種講法,但只係覺得呢種講法聖經根據唔強,只係common sense。係教會講信與信,好多時係自己教會塘水滾塘魚添啦。

    回覆刪除
  3. 「呢種講法聖經根據唔強」:同意。所以應該有不少討論空間,不應以聖經權威扼殺

    回覆刪除