我唔知！我唔聽！我唔理！ (教會單身事工系列二十一)

話時話，據我自己觀察，甚至多口問返黎，好多結左婚嘅人都不約而同會話，佢個老婆老公同自己當初定立嘅條件差好遠，即係之前話唔會接受細個自己果位姊妹，又真係嫁左個比自己年紀細嘅弟兄。話要搵葉子楣做女友果位弟兄，最後又真係無搵到個好似葉子楣咁賢良淑德嘅女仔拍拖。甚至有人會話對方唔係自己一生人最鍾意果個，只不過係最適合係埋一齊果個。咁教會成日搞D大龍鳳，叫人諗清楚自己要求，寫張清單出黎列出所有擇偶條件，然後逐樣祈禱向神求為乜架呢？既然好多人都相反，咁我而家係咪應該祈禱，叫上帝先祈唔好整個好似李心潔咁嘅女仔比我，我最憎就係李心潔呢款。

言歸正傳，一個人有要求好正常，但呢個要求是否合理，甚至存唔存在，係需要定時定候咁去檢討，唔好又得二百蚊，又要李嘉欣(呢句話都係對弟兄講)。正如好似搵工咁，你想做top sales底薪三萬，無壓力唔駛跑數，有生意仲有佣收，有無諗過呢個世界根本無呢份工呢。姊妹去搵老公時，有無得閑上下政府統計署睇下，年齡30-45呢個階層，月入三萬以上無拖拍又從未結婚，同時係基督徒，有幾多個？

但姊妹們又似乎一副態度：「上帝早已預備！」

不過，當你問深少少，係咪一定要「愛主基督徒」呢五隻字就搞得掂呢？係咪比個Nick Vujicic你都得呢。我試過問佢地，我唔聽我唔知我唔理咩叫比你更愛主，總之，而家就有一個真係比你更愛主更屬靈嘅人出現黎追求你，不過佢只係小學畢業、送外賣、住劏房，你會唔會考慮？答案係點，心照啦。

只不過教會呢個場境下，大家都無得唔咁樣講嘛，難道話自己可以接受非基追求，就算係，都唔夠膽講啦，否則你就好快要「被教導」同「被關心」。

即係話，教會姊妹，只不過都係一班口是心非嘅屬靈港女，面對呢班屬靈港女，真係好需要一種獨特的溝通技巧先掂。

睇到呢到，大家應該都明點解我追唔到教會女仔啦，返到教會唔比人分屍再用鹽醃起拎去餵狗都已經神蹟啦。

得喇得喇，下篇到我講下教會班男仔。