人地唔結婚又關你咩事

係，唔關我事，一個姊妹嫁唔出無人要，除非我願意犧牲自己，否則，的確係唔關我事。之但係，一個人要減肥節食唔食野，的確唔關身邊D人事，但有人想食而食唔飽要捱餓，就係一個社會問題。當教會入面，有成千上萬姊妹性嫁唔出，咁樣就會演變成一個社會問題，亦同時係教會責任。大家唔善忘，再對上篇文做左少少統計，以全港48萬基督徒計，男女比例六四開，呢個數字已經相當保守，去到6.5:3.5或者7:3都有機，扣除已婚人士，25-45歳男性人數係二萬五人左右，而女性人數近四萬(38,016)，係一軛論下，最少有萬三位姊妹最後係無著落，呢個已經係最保守嘅數字。

喺咁強調家庭價值嘅教會，咩「一生一世，一男一女，一夫一妻」，變左做「一生一世，一個人過，一殼眼淚」，呢個真係莫大嘅諷刺。

而更重要係，當一個女人感情無著落嘅情況下，會寄情事業，佢地會比男人更拼搏，更快上到位，做事更不擇手段，一之記之曰mean。你可以話我一升篙打一船人，但讀者不妨只問下你身邊任何一個有一定工作經驗嘅人，佢可以分享到一打或以上，關於身邊呢班mean女人嘅事蹟。

佢地三十到尾四十出歲，事業有成，過去無乜拍過拖，甚至完全無拍過拖，但對戀愛對象有極高要求，所以長時間無男人敢埋身。佢地係辦工室有極高戰鬥力，亦完全唔會控制自己情緒，話爆就爆。

我遇過一個最極端嘅例子係，有位女高層，佢自己搬左出黎一個人住，工作忙到唔記得交水費比人截咗水，佢加班留到公司無人嘅時候，去更衣室沖埋涼，係水機裝兩枝水返屋企飲，如是者咁樣過咗幾個星期，直到比人投訴。

呢班mean中女固然會憎晒世界上有陽具嘅生物，認為世界上所有好男人死光晒，所有男人都係有眼無珠唔識貨。你亦唔覺得你係女人佢會對你好D，係佢身上會發揮強大嘅Queen bee syndrome，遇神殺神，佛阻殺佛。

而更加恐怖係，佢有咁好彩第日結到婚，或者係有男人咁唔好彩娶咗佢，呢D性格一旦形成後係好難改變，佢仍然會係一個mean老婆、mean媽，禍延下一代。

我相信，一定有女讀者，係符合呢堆條件：三十到尾四十出歲，已經擠身中高層，過去無乜戀愛經驗，或者已經好耐無拍拖，但同是間覺得自己都正正常常丫。我又不妨再引一次史兄本鉅著《婚姻這種邪教》入面嘅講法：妳夠唔夠膽問下妳下屬，佢阿姐，即係妳，份人mean唔mean。(如果答案都係否定的話，麻煩留個聯絡方法。)

咁好喇，咁呢班人，除咗寄情工作，仲係會寄情信仰生活，以佢地嘅辦事能力，空閑時間同專注程度，好容易就可以擠身執事等高位，或者索性走左去讀神學做傳道人，係一個陰盛陽衰嘅教會，再比班mean女人管理，會發生咩事呢，我唔係幾想去諗，所以我先至話，呢一個係社會同教會問題。