估唔到上篇文咁大迴響，果然「飲食男女，人之大欲存焉」，打鐵趁熱寫多篇先。
去到我呢個年紀，身邊已經有一大堆三十到尾，四十出頭，而嫁杏無期嘅姊妹。除左教會內男女比例結構性問題之外，好多時同姊妹自己心態有關。
我唔係好想拎深雪小姐黎做例子，因為佢唔係一個基督徒，但佢真係一個典型。
之前睇《婚姻這種邪教》，史兄講到男人係一定先睇樣，我唔係話世界上無女人去到三十尾，四十出頭依然保養得好，有吸引力，亦唔係話男人100%一定會睇樣，因為世界上有D不幸嘅人係天生失明。但三十幾四十歲一拍埋廿幾歲班囡到，男人第一個感覺就係：「屌，乜條女咁撚老架。」歲月，除左呃到自己，係呃唔到人。所以，上左年紀嘅女人除左好似深雪咁呃自己：「我仲keep得到丫」，佢地仲會說服自己，雖然我已經唔係十八廿二，但唔駛用班妹妹仔鬥靚，除左sale外在，仲有好多內在美吸引人，例如成熟、具女人味、懂照顧人、經濟獨立、靈命好等等。但我又想指出，要求對方完全繞在外在，而可以直接欣賞你內在，除非你係一部雪櫃，入面仲放滿啤酒。加上人以類聚，物以群分，懂得第一時間就識欣賞人內在嘅，大部份係好缺乏外在美，咁姊妹們又受唔受得住呢。
再加上教會長年以來的教導，「你是上帝獨特的創造，上帝已經為你預備咗最好，你要先求祂的國和祂的義，這些東西都要加給你們了」，唔單止姊妹，其實好多弟兄都係，就係明明年紀大咗又無著落，唔覺自己有獨身恩賜or詛咒，好恨拍拖結婚生仔，但係改變自己去增加機會嘅意欲係奇低，以致於完全沒有，你識佢十幾廿年，從來無見過佢刻意去塑造自己外在同性格。永遠行到出黎就係一副，「我做自己，我做自己，我唔理人，我要做自己。」
有一個好奇怪，但又信徒間頗流行嘅觀念，就係唔理我幾三尖八角，總之上帝會設計到我另一半fit晒我，好似砌圖咁，有幾千幾百塊都好，只有一塊係perfect match，我係唔需要為呢件事而改變d咩，因為上帝最知我需要，更加唔應該自己刻意去搵，一個唔該揀錯咗，miss咗上帝留比我個perfect match咪大件事！所以我乜都唔可以做，上帝自然會比我知道邊個係，任何刻意改變係對上帝唔尊重，最緊要係做返自己，保持信心，同埋做多d事奉，仲有祈禱等候同等候祈禱。結果等黎等去，等咗一幾二十年呢個所謂perfect match仍然未出現。
情況就好似摩西同以色列人講，上帝要帶你地出埃及去流奶與蜜之地，但以色列人決定嘅做法就係，留係埃及做奴隸，日日一齊禱告，一步都唔願意行出埃及。
有D姊妹條件唔差，後生時都有人追過下，但唔知點解個個都唔啱心水，而條件好要求又高，佢地心目中嘅完美對象清單又往往水蛇春咁長。咁我上次篇文已經講到，「適婚年齡25-45歲，未婚，月入超過三萬嘅男性基督徒」，只佔年齡層人口1.1%，只要加多幾個條件上去，例如五尺七吋或以上，BMI體重指數唔超標，有幽默感，孝順，喜歡小朋友，熱愛大自然，有運動習慣，外表唔太差，比自己更愛主，難度簡直等於趙子龍百萬軍中救阿斗一樣，一百萬人入面都唔知有幾多個。
揀下揀下揀過籠，等到年華老去，外在美一日一日咁變差，但內在美卻無一日一日咁變好。最後就好似深雪咁，等到自己四十幾五十歲，仍然覺得理想對象應係三十出頭，有經濟能力，夠浪漫夠激情，仲一定要靚仔，死未。
後記
執筆期間，我間過身邊唔少基督徒，香港究竟有多少人符合以下條件：「適婚年齡，界乎25-45歲的未婚男性基督徒，月入三萬以上」，大部份人過份高估，由一萬到五萬都有。我猜，因為在教會內接觸的全是基督徒，以致嚴重高估全港基督徒的數目。由香港政府製作的《香港便覽》，資料指出香港基督徒(不包含羅馬大公教會)數字約為48萬，教會2014年普查的資料應該更準，恆常出席崇拜的數字，約為30萬，估整體700萬人口不足5%。
沒有留言:
張貼留言