我未有小朋友我唔明系列(一)之學樂器

我未有小朋友我唔明系列(一)之學樂器

前言 

先旨聲明，呢個系列唔一定同信仰有關，不過無論係生活上定係教會入面，近年同d為人父母嘅傾偈，三句唔埋就有一句係：「你未有小朋友你唔明架喇。」係教會入面，結咗婚生埋仔，直頭可以話大X晒，教會所有program都要就佢地。正如經上記著說：「父母說，要有Awana，就有Awana，父母看Awana是好的。」我只想從一個局外人嘅角度，寫返我地呢邊嘅故事同睇法，講到明，係負能量爆燈架喇，屬牛屬豬以及正能量者請迴避。

正文

我覺得，呢三單料，要疊埋一齊睇先有意思。

第一單(傳送門)

第二單

 第三單

香港好多父母會逼小朋友學樂器，原因有好多，例如，做好個profile博入名校、陶冶性情、表演比親戚朋友睇、教琴可以搵好多錢。更聽過一個講法係話，比佢學運動最多玩到三十幾四十歲，學音樂可以玩足一世，又可以自己玩，唔駛好似踢波打籃球咁要湊腳。

但好多父母無諗過一個問題，就係，你小朋友鍾唔鍾意音樂先？甚至係，作為父母，你懂唔懂音樂，你鍾唔鍾意音樂？假如你唔識，如何欣賞自己嘅仔女彈得好唔好？

我細個都比老母逼過去學拯溺，原因唔係強身健體，拯救生命，原因只係做救生員當年好好搵(90年代中，做暑期工可以月入過萬)，比佢逼去考個銅章然後去搵錢。結果點？個銅章三年夠期後我就無再續，三年係泳池做又做得唔開心，因為暑假無得去玩，賺到錢又大部份比左老母。呢十年黎落水次數十隻手指數得晒，原因係乜？好簡單啫，遊水都唔係我興趣(當然打工都唔係)，我鍾意閱讀同寫作，無人逼無人理，我自己點都會抽到時間睇書。

D老豆老母會同你講：「你而家唔明，大過咗之後就會明，咁做係為你好。」到我大個之後就真係明，明白好多老豆老母係只係人一個，會犯錯，唔一定啱晒，好多所謂「為你好」，只係佢地鍾意，而無理過個小朋友係咪鍾意係咪對個小朋好。逼一個人花十幾年時間去做一係自己無興趣兼唔鍾意嘅事，仲成日比父母鬧做得唔夠好，阿隔離屋小明快你成年考到八級，對個人有咩好？唔少父母更加係好自私，瘋狂宰制剝削自己小朋友，逼佢地完成自己無法完成嘅夢想。自細窮，無機會學鋼琴，大個咗有條件，唔係自己去學，而係逼個小朋友去學，犧牲佢童年補償返自己童年。

呀老母呀老母，你如果細個有諗過去學琴又無機會，唔好投射落你小朋友身上，放過佢啦，佢無辜架，你想咪自己去學囉，你大人大姐邊有人阻到你呀。

而更加奇怪係，小朋友自己有天份又有興趣，會自發練習果D，好多老豆老母又以為玩玩下，不務正業，浪費時間。你試下諗，你自細到大果堆同學入面，梗有一兩個人手畫好得，成本書只要有空白位置，都比佢畫晒公仔。但你又從來無見佢老豆老母比錢佢去學畫畫學藝術，接受正統訓練，佢D興趣同天份，只係留於將本書空白位置填滿，無再受到栽培同發揮。

你想學，佢未必比，你唔想學，佢逼你學。

結果，我身邊好多細個比老母(其實呢D野老豆好少會理)逼學樂器嘅朋友，係中學時甚至拎過唔少奬，到大學畢業，父母再無法控制後，十幾二十年再無掂過音樂。

唔知點解，華人社會好多老豆老母雖然而家唔會再打仔，但依然深信「捧下出孝兒」呢D道理，認為要透過唔合理嘅強逼同磨練，先以為可以陪養出紀律同服從，係一D無傷大雅嘅決定上，一定要小朋友跟自己意思，否則係唔聽話唔乖唔孝順。好多老豆老母有一個諗法，就係小朋友唔識為自己打算，哪怕果位「小朋友」已經係十五六歲嘅少年人，以為如果比佢自由選擇，佢一定會揀埋D無謂野浪費時間，所以一定要用強逼嘅手法，逼佢揀我地覺得正確嘅事。我地從來唔信一個人會係天份同興趣驅使下，搵到自己出路，對於小朋友自然發生嘅興趣，不單不加以裁培，仲要消滅係萌芽階段，以免令到小朋友自己想點就點，唔聽話。而佢地，尤其係老母，又成日認為天下間得自己最理解同認識自己仔女，對其他意見「我唔聽，我唔知，我唔理」。

「你講！你係咪好唔鍾意彈琴！你係咪好唔鍾意練琴！你係咪好唔鍾意考琴試！你一句話唔鍾意我即刻唔駛你練，即刻揼咗個琴！你講吖！你講吖！你講呀嘛，我而家就聽你講，你講吖！你講吖！你做乜唔出聲呀。佢點會唔鍾意呀，佢鍾意D咩唔鍾意D咩我做佢老母唔清楚得過你！」

調返轉又諗，作為仔女，係你成長期間，有邊一日會認為天下間最認識同理解自己嘅人，係你老母呢。

而最悲劇係，個仔女自細比人逼去學音樂，點知真係培養到興趣出黎，花好多時間去練去參加比賽。呢個時候老母就會變面，認為練樂器影響學業，「與趣嘅野玩下就好，都係讀書緊要」，夾硬制止佢。更甚者，有D細路大個咗之後，想將音樂作為終身志業，成就夢想。呢個時候，個老豆老母千方百計威逼利誘逼仔女放棄，要佢行返普通人條路，話做音樂係香港搵唔到食，供你讀完大學想你做過有用嘅人，搵多D錢，係做工程師、會計師、律師，而唔係去做樂師，甚至用斷絕關係黎威脅，「你係要玩音樂就唔好認我做老豆」，引起無數爭拗，破壞家庭幸福。

講到底，呢D只係葉公好龍，做老豆老母從來唔會真心相信，一門興趣例如音樂、繪畫、運動，背後真係有意義，可以啟迪心靈，可以成為終身追求嘅目標同理想，佢地只不過要人無我有，人有我又要有，我有時要更好。

早知今日，何必當初。逼到個仔女要跳樓，或者到老時個仔女唔想養你，唔想見你，唔好問點解囉。

唉，我未有小朋友我唔明架喇。