警告!

本人並沒有接受過任何正統神學訓練,所有發表內容,全屬個人信仰心得及教會生活經驗分享,敝blog負能量爆燈,如閱讀時感到不適,或出現任何不良反應,包括痰多咳嗽,夜睡不寧,神經緊張,潮熱汗出,心煩多疑,踎身起身見頭暈等徵狀,請即時停止,並向專業人士尋求協助。

2016年5月24日 星期二

教會唔應該講政治


咁樣樣,我覺得教牧真係唔需要識政治同時事,呢樣野可能唔係佢地「異像」,佢地亦唔係時事評論員,佢地份糧無包到呢一part。但很肯定,佢地份糧係有包到講解聖經同牧養,所以佢地負責講好聖經,做好牧養就夠。我偶然睇返楊牧谷牧師d書,發覺雖然寫係二十幾年前,但而家睇返d都唔過時,點解?因為真理本身有超越性,唔會過時,你講得中,隔十幾二十年睇返一樣中


不過如果真係打算拎政治同時事上講壇講的話,麻煩認真做少少功夫,最起碼要有簡單基本認識,或者可以問下教會入面比較熱衷政治同時事嘅人,好多稍為大間少少嘅教會而家都會有D社關小組,正所謂三人行必有我師焉,唔識可以問,一個人無可能咩都叻晒。

之但係「屬靈的人看透萬事」,好多教牧明明唔識,但又驚人話佢out,係都鍾意要講兩野以示自己貼地。查實傳道人離唔離地,貼唔貼地係無關痛癢,有係 bonus 無亦正常,有無聽過咩係沙漠教父,佢地就係一堆離地撚,離開晒社會匿埋係深山生活,專心追求神,歷史上從來無人批評過佢地離地唔關心社會唔關心 人群,反之佢地長時間咁獨處同靈修,咁樣嘅靈性生活吸引左好多人追隨佢地。


作為一個平信徒我反而真係會去睇佢熟唔熟聖經,平日能唔能夠關懷別人,可唔可以同唔同觀點嘅人溝通,而唔係下下屬靈三幅被,開口埋口就係百搭屬靈廢話:「你要對神有信心」、「凡事都可行但不一定有益處」。


傳道人唔講政治好好地,往往一講就出事,部份教牧對社會政治時事脫節程度,真係令我感到非常驚訝。雨傘運動過左一週年,對上星期聽講道,台上傳道人竟然話自己唔知咩係黃絲藍絲,雨傘運動/遮打革命係好多人心目中完全唔等於佔中又唔知,佢甚至將黃絲藍絲講錯左做黃遮藍遮。真係唔好問點解今時今日後生仔唔想返教會,教會對佢地黎講可能同火星一樣咁遙遠,你會唔會個個星期去火星一次丫,而對呢一班教牧黎講,地球好危險,都係快D返火星,去同d火星異種傳福音。



剎時間,我真係明白,教會唔應該講政治,傳道人真係唔應該再講政治,因為唔少人根本唔識講,講錯晒,唔講好過講。講果班唔識,聽果班又唔見得真係有興趣,咁夾硬講黎做乜。都係果句,做好釋經解經關懷牧養,其他野,有心有力做多D無人怪,做得唔好只會自招批評。

沒有留言:

張貼留言