睇緊莊偉忠本《不開會的CEO》，我覺得呢本書係咪應該放去企業管理果到？有無人做過一田，呢位老闆係咪真係講到咁堅，落手落腳去報紙皮，解決前線問題呢？因為我以前曾經係某大企業到打工，個老闆又係曾經出過書話自己點點點，咩人才係公司最重要資產，又話自己點有人情味，打工當然係另一回事。
本書講D野一D都唔深，無乜理論，好多真係常識黎，例如「開會越多效率越低」、「老闆個人再叻都唔及團體叻」、「每個人都有解決問題的能力，只要充份放權同給予空間」。有件事佢仲提醒左好多管理層，係管理學入面提出好多理論同例子，往往只會講好的一面，而忽略執行成本。成間公司行six sigma，無數Run chart、Five why、Fishbone diagram，D伙計花時間去個Power point整到靚一靚比老闆睇，老闆係可以好方便一眼睇晒，但背後成本卻係幾何級數咁上，伙計往往要放低手頭前線工作去預備呢D野，結果係得不償失。正如莊生所講，一間公司最理想係「五個人做十個人野，出八份糧」，充份放權釋放員工能力，好過花時間不斷設立績效制度去管理。
又例如本書又講到一個例子，大部份香港做零售都要跑數，今年目標係10%，你達標的話，下年就只會更高沒有更低，今年超標去到15%，下年目標就係17、18%。聰明的打工仔好快適應遊戲玩法，明明可以為公司賺更多錢，但擔心超標太多，下年更難跑數，比人捽數捽死，僅僅達標就會停手。所以莊生的做法係，每年目標都係3%，減低同事跑數壓力，唔駛擔心比人捽，自自然然更投入工作，有更多創意，上司又唔駛捽數可以專心業務發展，反而每每為公司賺大錢。
又忽發奇想，教會的十一奉獻，係咪可以循呢條思路去。而家教會強調十一奉獻，有能力的人，固然會停係10%唔會奉獻更多，無能力果D，因為佢地日日比人鬧偷左神的供物，咁比3%又係咁鬧，比5%又係咁鬧，索性留返比自己就算啦，橫掂只要唔夠就比人鬧，何必又比錢又受氣。結果好多教會的十一奉獻比率，長期停留係20到30%左右。
背後我地好明白，上帝係唔需要我地供養，只係教會要交租，傳道人要開飯，無論講幾多大道理引幾多段聖經，依然改變唔到呢個實然。反而，用返教會最興講果句，人有罪而唔完美，教會唔完美，世界唔完美，我地應該體察呢份唔完美，而唔應該去要求個個信徒都拎晒十一出黎咁撚完美。
作為教會一份子，係有責任去支持教會運作，但諗深一層，係咪可以將十一奉獻呢個指標解套，下放權力，比大家按自己能力去決定呢。
最後，舉一個親身經歷做回應。
話說曾經係教會教育部成員，每年要幫手編預算請講員，舉辦一D額外的講座同工作坊，由於要比講員費，部份價錢不低，雖芸陪育信徒不應計較，但想收回些少成本，以免過份虧本，所以某些課程會收費。雖然不過一百幾十，但很快出現兩個效應，第一是一收錢就很少人報名，因為教會大部份課程均屬免費，要收費，競爭力就差一截。第二，是連一百幾十也有人賴賬不交，多次催款亦不了了次，而且擔心有心報讀但經濟困難的會友因此卻步，又要提供津貼。背後的行政成本，高不可攀，非區區一個部門搞得掂。最後集體決定，以後所有課程全部免費，只會在結束時傳奉獻袋，豐儉由人。結果，頗喜出望外，大部份的課程最後的奉獻收入，都比我們的收費課程還要高。無他，只要課程內容對大家有幫助，可以令人滿載而歸，大家是完全不介意付出，多多益善，少少無拘，先為人設想，別人也會盡力回報。
係，呢個做法睇落好冒險，但群眾有時又會發揮出驚人威力，教會管理層有無咁嘅信心，放棄十一奉獻的指標，由信徒自己隨心，認為上帝必供應呢？
沒有留言:
張貼留言