宅心仁厚

本來唔想寫，但諗諗下又頂佢唔順，結果都係寫，不過都係果句，我宅心仁厚，唔開佢地名。至於點解本地教會D紀律手冊呀信徒指引呀，本本咁雷同，有時間先研究再寫。


以下係我唔知係邊挖出黎，某教會的紀律文件。

先講十六歲唔比拍拖呢條例。

老老豆豆，如果佢寫明十六歲唔比拍拖，而你又願意遵守返佢教會，周瑜打黃蓋，一個願打一個願捱，如果唔涉及道德同法律，外人無法管得到。但教會開佈道會引人入教時，幾何同時間將成份教會紀律比人睇，話你信主後黎得我地個堂口聚會就要守乜規則。即係黑社會入會時都講明有乜規矩，衰左要三刀六洞。有時候教會仲霸道過黑社會，入咗會先同你講規矩，監人乃後，好多時到人衰咗，長執先拎本教會紀律出黎，有D教會更加係無明文紀律，有乜事就臨時開個紀律委員會，由當中嘅人法落。

年紀太輕思想未成熟，過早談戀愛埋唔到尾容易散，恐怕只係常識，教會、學校同長輩有適當教育同埋同行下，大多數都唔成咩問題，正所謂個少女不多情，那個少年不懷春。但教會永遠更加注重你會唔會做愛，擔心你失身，然後引兩段經文砌成係聖經教導。而更加奇怪係，教會為對抗婚前性行為，擔心拍拖拍得太耐忍唔住，所以近年慢慢開始鼓吹早婚，叫人唔好搞咩愛情長跑，拍得一兩年就好結婚，以解決性衝動。究竟點先可以一邊要求人遲拍拖，而又一邊要求人早婚，只能講句，在人不能，在神凡事都能。

但唔比人係16歲前拍拖，係咪有效阻止佢地搞野呢。根據避孕套生產商杜蕾斯2016一項調查，香港人平均失身年齡係20.2歲。而且有越推越遲之勢，由2005年18.6歲，慢慢升至2016年20.2歲，同教會入面成日講世界道德淪亡，人越黎越敗壞，越黎越淫亂剛好相反。稍用常識推斷，香港人16歲仍要依賴父母，經濟唔獨立，扑野都無錢爆房，去到大學甚至工作以後，有更大自由，先更易出事。如果真係擔心大家婚前失身的話，應該將拍拖年齡定係21歲甚至25歲以後，等佢地性格完全成熟，一拍拖拿拿聲結婚開齋，先比較有保障。

先講帖前4:3，「神的旨意就是要你們成為聖潔，遠避淫行。」

前文後理都無講到呢句係專比青少年人，係對所有信徒的勸戒，亦睇唔到點樣可以引伸到十六歲前唔比拍拖呢樣野到。

提後2:22，「你要逃避少年的私慾，同那清心禱告主的人追求公義、信德、仁愛、和平。」

保羅亦無指出所謂少年的私慾，乃是性慾，而當時提摩太已是年近三十歲的青年人。

隨便截一段聖經出黎就話有聖經根據，無解經無釋經，無前文後理，究竟上帝能唔能創造一間教會，可以唔亂引聖經，用平實的語言清清楚楚去解釋一件事呢？

你引聖經我又引。

「要使你的泉源蒙福，要喜悅你幼年所娶的妻」(箴五 15)

「 他離棄幼年的配偶，忘了神的盟約。」(箴2:17)

「所以當謹守你們的心，誰也不可以詭詐待幼年所娶的妻。」瑪2:15

 聖經唔止一次提到年少時所娶的妻，而古代向來早婚，十三四歳就可以嫁人，我而家話聖經其實係支持14歲前拍拖，16歲就結婚，18歲前就要生仔，等你黎駁。

好多教會用林後「信與不信」作為反對信徒與非信徒拍拖結婚的原由，但好多聖經學者已明言此段經文並非描寫婚姻，而是當是有些信徒常與異教徒來往做生意，參加他們在廟中的宴會，吃祭過偶象的祭物，甚至與廟妓行淫。所以有好多教會改口成所謂原則性教導，即婚姻係人倫中最親密，如果連做生意上有一軛論，同樣可以引伸出去，所以如果唔做得商業伙伴，理應更親蜜的拍拖結婚都唔得。

呢間教會係承襲左呢種諗法，所以就改稱做「夥伴關係」。不過好奇怪係，保羅所寫係不應因為做生意而沾染對方拜偶像及淫亂的風俗，在今天教會中反而不成禁忌，信徒可以隨意與未信的人有商業合作，甚至跟隨對方到風月場所消遣傾生意，而經過註釋引伸的應用，卻成為教規，你話怪唔怪。

咁做唔單止無解決到「信與不信」的問題，反而帶黎更多不必要的難題，因為「夥伴關係」又何止夫妻呢，信與不信咁樣超展開法，咁好多關係我地都要重就檢視，係咪「符合」聖經。

簡單講以中國傳統五倫，唔計而家無咗君臣，仲有四樣叫父子、兄弟、夫婦、朋友，咁係呢種解釋方法入面，唔單止唔可以同未信的人拍拖結婚，理應同時間唔可以認未信的人做老豆老母，要同未信的兄弟姊妹斷絕關係，仲有唔可以識未信的朋友。你唔好話我打橫黎講，呢種講法符合所謂原則性引伸，因為而家講係親密夥伴關係影響信仰。你老豆老母同你親唔親？佢地唔比你返教會，唔止影響你信仰生活，甚至影響埋家庭關係。好，你話雙親無得揀，朋友有得揀掛，近朱者赤，近墨者黑呀老友，仲唔快D同人絕交，咁樣係為你好咋。

呢D仲未計老師學生、工作上的夥伴，甚至屋企入面個工人，好多細路情願比工人姐姐湊都唔想跟老母，同樣會因為呢一種關係，影響你好深，咁樣作為一個基督徒，信主之後係咪要轉校，炒左個工人，同D股東拆伙，去晒教會同相關機構打工呢。

我仲未計，如果講到信徒不應與非信徒建立一種親密的「夥伴關係」，以免動搖信仰立場，咁講法，婚後其一方先信主果D，一樣會受到其非信徒伴侶影響，點解佢地又毋須停事奉同接受教會紀律，難道佢地唔會嘈十一奉獻，唔會因為價值觀唔同，因為點樣教仔而鬧交？咁佢地嘅婚姻，又係唔係不受祝福，神不喜悅，呢世無幸福呢？教會所講信與不信的所有問題，一樣會出現係已婚先信的伴侶當中，點解處理上有咁大分別。

一對情侶，一個信一個唔信，最後佢地結婚，起碼佢地compromise過先會行呢一步。如果，兩個唔信，突然老婆有一日返黎同你講佢信左耶穌，今日起要比十份一人工教會，逢星期六日要返教會唔煮飯，同埋要拆祖先神位。個老公返黎話信左耶穌，聖誕節要去短宣，唔可以同你去日本旅行。你覺得邊pair衝突會大D？

如果避免絆倒信心軟弱的肢體，所以要低調處理，唔參加他們的婚禮，唔比報告，甚至好似沈旭暉結婚時比佢老婆教會杯葛，教友連姊妹都唔比做。但咁做法，何止直接絆倒一對新人，直頭係兜膝頭哥一棍吽落去，打到佢地殘廢，同埋佢地屋企人，同埋佢地d親戚朋友，點解又無人理，反而去理一D根本唔知道存唔在在的軟弱肢體。你有無識過有人，因為沈旭暉娶咗個基督徒，所以唔返教會唔信教？呢班肢體咁軟弱成日絆倒，駛唔駛我介紹個醫生比佢地，睇下係咪患左軟骨症，以致成日仆街。

咁樣如果他日佢地生小朋友，教會傳道人係又唔係唔可以去探佢地，唔可以去飲滿月酒？以免比D軟弱肢體誤以為教會支持人生下唔敬虔嘅後代。

一個唔好彩當中個信徒死左，咁教會係咪連安息禮拜都唔可以同佢做，以免絆倒信心軟弱的肢體呢？若然信與不信會絆倒人，咁不信與不信的婚禮，豈非更罪大惡極？係咪要求所有基督徒唔出席呢？

經常詬病教會一件事，就係為左反對一件事，將某段經文經過多層的解釋同引伸，升格成聖經真理同普遍原則，而完全無為意到，除左佢地想反對果件事之外，同時間牽涉到好多其他野，而又從來唔解釋，點解一個原則性教導係有選擇性，一時要守，一時唔駛守。呢D問題，只係冰山一角，寫極都寫唔完。