教會擺年宵

同往常一樣，本文負能量爆燈，我正積極考慮將敝blog改為「耶教負能量」以正名，以免大家摸錯門口。如要正能量，請買天使心。多謝合作。

可以提供巨大正能量，你認為仲有第二本《天使心》咩

教會擺年宵，應該係一個揭後語。

除咗聖誕佈佳音之外，近年教會又發展出一個新傳統，擺年宵攤位。名為「傳揚屬天福氣」、「讓未信的人體會神的大愛」、「連結社區」、「祝福社區」、「接觸社群」、「領人信主」等等，唔好講笑，呢段片入面，611靈糧堂話年宵期間，有超過八百人信主，真係好感謝主。

教會年宵設攤位 傳揚屬天福氣

敝會牧師過去經常有一個講法，平日派福音單張D人見你講耶穌，好多人會拒絕，但新年流流派個派印有福字嘅單張，以及無餡利是，意頭野大家唔敢唔接，所以傳福音會容易好多，講起黎真係有幾分道理。

不過，人生就是這個BUT......

我有位朋友的年宵攤位，某年正好喺正一間教會側邊，佢話自從果年之後，佢就好憎教會好憎班基督徒，此話何解呢。佢話，教會投個檔返黎，根本唔志在做生意，而係宣傳自己，D貨好多時唔駛自己比錢買，而係靠關係R返黎，就算買返黎佢地賣出去係唔理成本。而人呢，一間稍具規模嘅教會，可以有無限嘅人力提供。即係話，除咗投個檔返黎以外，係零成本，而且亦無任何要賺錢同回本嘅壓力。咁即係點呢，即係話，教會係唔會依呢個世界嘅商業規則去營運個檔口，只要有辦法吸到人過黎聽耶穌佢都會做，而最簡單的做法，就係賤物鬥窮人。 

我朋友話，當時隔離唔知係邊到搵到D玩具返黎，佢說如果正常標價，最少可以買到二三百蚊，就算當清貨，最低佢會標八十到一百，咁你估當時教會標幾多錢？ 佢話，教會係十蚊廿蚊咁賣出去。

咁你開正係佢隔離嘅話，你檔生意，點樣同唔理賺蝕兼有無限人力資源嘅教會鬥呢？

而我朋友話，最仆街唔係咁，而係教會個檔口，無時無刻好多人，多人到成日企埋過黎派單張傳福音，連續幾晚阻住佢做生意，有D人見到係教會，會捉人講耶穌又刻意兜開行，有D信徒唔熟性仲諗住撩佢傾偈，問佢今年生意點，想同佢傳福音，而佢果下真係嬲到震，仲有無啦啦成班人鳩叫「耶穌愛你」、「主祝福你」、「X年快樂」，同教會負責人投訴過無數次都無改善，佢心底裡講咗無限咁多句：「基督徒大X晒呀，傳福音大X晒呀，開教會大X晒呀。」不過佢係斯文人，無講出口。

結果，我朋友年三十晚見唔對路，拿拿聲賤賣D貨費事責過年算數，十二點幾收檔敗走，聽完佢個經歷，我都唔夠贍問佢賺定蝕。

無論如何，基督總被傳開了，為此我就歡喜，並且還要歡喜。至於其他人歡唔歡喜喎......