警告!

本人並沒有接受過任何正統神學訓練,所有發表內容,全屬個人信仰心得及教會生活經驗分享,敝blog負能量爆燈,如閱讀時感到不適,或出現任何不良反應,包括痰多咳嗽,夜睡不寧,神經緊張,潮熱汗出,心煩多疑,踎身起身見頭暈等徵狀,請即時停止,並向專業人士尋求協助。

2017年1月27日 星期五

新春負能量


又再講到明,呢篇負能量到爆炸,新年流流唔啱睇請過主,麻煩買《天使心》正飽佢。

假如有前世今生嘅話,我幾肯定自己唔係中國人,因為我對絕大部份中式禮儀非常疑惑,明明好簡單,硬係搞到好複雜。 

例如,做節。 咁做節食飯,唔係出去食,就係自己煮。但呢個問題,會係長輩之間討論足兩個星期,通常得兩個點: 

A 出去食好貴喎 

B 自己煮好麻煩喎 

「今年出去食丫!」 
「出去食好貴喎!」 
「咁不如自己煮啦!」 
「自己煮好麻煩喎。」 
「咁不如出去食丫!」 
「出去食好貴喎!」 
「咁都係自己煮啦。」 
「自己煮好麻煩喎,都係出去食啦。」 
「出到食好貴喎,不如自己煮啦。」 

 Loop到2047。 

因為土地問題,親戚當中已經好少有人屋企大到可以塞幾代人,近年到最後通常都係出街食,雖然決定好出去食,但去邊到食又可以傾一大輪,妖,到最後咪又係樓下間街坊酒樓。 

到酒樓後,第一個集體遊戲,叫做「夠唔夠位坐」。依照我數理頭腦直線邏輯分析,想知道夠唔夠位,簡單點一點人數,再唔係大家儘快坐底,邊個無位坐咪知爭幾多個位。不過負能量我識,人情世故,我真係識條鐵咩,大家最常見係,長輩唔坐底,後輩唔敢坐,個個企係到問:「你有無位坐呀?你有無位坐呀?阿公有無位坐呀?三姨有無位坐呀?表姐有無位坐呀?」 我後生火氣比較大時,真係試過去到一野就坐,比人叫返起身,再問你:「你有無位坐呀?」,你唔叫我起身,我咪坐緊囉。

搞完一大輪,終於可以坐底,你以為有得食?未住,我地仲有第二個項目,叫調位。呢樣野,我真係留意咗好耐,每一個家族中,硬有一個女性長輩會做呢件事,會覺得大家坐得唔啱,要調位坐:「阿儀過黎同阿公坐,三哥過去坐果邊啦,呢邊冷氣風大,等D後生坐,你地後生果D坐埋一枱,哎呀,邊個同阿婆坐……」 

擾擾攘攘一大輪,大家終於安頓好,進入下一個環節:點菜。 

通常大時大節,酒樓只會提供屈錢套餐,而無得散叫。我一直覺得大時大節去食中菜係十分搵笨,價錢加二加三之餘,質素又唔會好得去邊,新年流流一席加埋酒水可能要成四五千蚊如果咁好彩,撞正間酒樓比人點菜,呢個時候,你果個好唔支持民主嘅藍絲親戚,突然間民主女神上身咁,充份表現直接民主嘅精髓,拎住個餐牌逐個人去問: 

「生炒骨好唔好呀?」 
「生炒骨好唔好呀?」 
「生炒骨好唔好呀?」 
「生炒骨好唔好呀?」 
「生炒骨好唔好呀?」 
「生炒骨好唔好呀?」 
「生炒骨好唔好呀?」 
「生炒骨好唔好呀?」 
「生炒骨好唔好呀?」 
「生炒骨好唔好呀?」 
「生炒骨好唔好呀?」 

一圍人十二個,除開自己,佢問晒十一個,然後自然自語咁講:「生炒都唔係幾好喎,不如叫乳鴿。」

由於人數眾多,當然無乜可能有個餸個個都啱胃口,擾擾攘攘又一大輪。其實,是Q但點幾個大路咪得囉,黎黎去去都係果D野啦。 

第二個情況係,長輩授樣下一代廢青話事,塞個餐牌比你,叫你話事。 

廢青:「咁呀,叫碟炒蜆啦!」 
廢老:「炒蜆唔好,有甲型肝炎呀。」
廢青:「咁呀,叫碟炸大腸啦!」 
廢老:「炸大腸邊好呀,咁熱氣,你阿公無牙食唔到喎。」 
廢青:「咁呀,無牙就椒鹽豆腐啦,豆腐啱晒阿公啦。」 
廢老:「椒鹽野食完係咁飲水。」 
廢青:「咁,琵琶豆腐啦。」 
廢老:「出到黎酒樓食琵琶豆腐呢D cheap野,叫D好野食啦。」 
廢青:「咁,叫兩隻龍蝦喇。」 
廢老:「大時大節食呢D好貴個喎,淨係個殼都成斤啦。」 
廢青:「咁麻煩樣樣都唔食得,不如你點啦。」 
廢老:「噓,而家比你話事嘛,做少少野都唔得,正一打壞後生。」 

至於大時大節,酒樓唔夠人手,當然唔會有任何服務,加上親戚中實有幾個唔飲得又扮飲得,飲到啤啤夫,隨時同酒樓侍應嘈起黎。 

食完成餐飯先至係戲肉,埋單! 

如果有人請,很好,我會講聲多謝;AA制,也不錯;若我有能力,我請又何妨。不過,我呢輩人大部份人讀過《請客》呢篇文,知道埋單呢係事,係中華民族中係別有意義。我極度懷疑中國南拳中短途發勁、擒拿手之類,係就嚮搶埋單呢下演變出黎。你要搶埋單,但又唔能夠真搶,因為唔止真係要埋咗張單,而係咁做法,係唔比面大家,比人覺得你輕視班親戚無錢埋單。但你要讓,又唔可以真讓,因為真讓,又比人覺得你孤寒,陰對方比錢。呢個讓與唔讓,爭與唔爭嘅當中耗費嘅心力,如果用係正途上,我諗中國人一早可以殖民火星。

3 則留言:

  1. 我仲以為你最尾會拉到d咩事同教會有關

    回覆刪除
  2. 出去食 vs 屋企煮
    點菜

    呢兩 part 真係好真實。基本上發生喺每個節日。 無限 loop.

    回覆刪除
    回覆
    1. 以前話年關難過,過咗年仲係一關接一關

      刪除