一百億負能量戰士上集

從不諱言我係一百億負能量戰士，亦係《每日來點負能量》嘅忠實讀者(話時話，呢本書係台灣大賣)，我好似Dr. Stranger入面THE ONE咁吸取黑暗力量黎生活，唔係你估坐底一晚寫三四千字出黎係易事？你班正能樣試下一日感恩感三四千隻字出黎，睇下得唔得。


呢個當然同我嘅成長同生活有關，而我亦已經接納咗自己係一個咁嘅人，偶然我都會聽下意見嘗試改變一下，但江山易改，品性難移，你話改就改咩。果D充滿喜樂和平仁愛感恩基督徒，你又試下改下性格，做幾日負能量戰士，睇下你又頂唔頂得順，如果你頂唔順嘅話，唔好立亂叫人改性格，你夾硬黎只會令我仲唔開心仲負面，我已經夠負面，你過黎逼我強顏歡笑，你覺得我會開心咗，定更加唔開心呢。所以我一向好奇怪，點解教會一面號稱耶穌接納所有人，但同時另一方面又不斷叫人改，改到符合一個基督徒樣式，呢D雙種標準無得解得黎又好矛盾。 

雖然出親呢D文都比人鬧，但我又發現一個情況，呢種負能量到爆炸嘅文章，係極受歡迎，傳閱者眾，當然我唔能夠排除入面係有一D人share篇文黎鬧，亦都有一D憎耶教嘅人話：「睇下，D耶X係咁架喇」，但無論如何，文章總被傳開了。呢個情況唔單止出現係我身上，你去睇下陳到D崇拜筆記，佢鬧人崇拜做得唔好果幾篇，係特別多人關注，佢盛讚靈糧堂果篇反而無乜人理。正如黃子華棟篤笑記著說：「香港人係鍾意睇人仆街。」 

我估陳到同我一樣R爆頭，好多時我地根本無落任何負面評價，無特登鬧人，無特登唱衰佢，甚至連評論都講唔上，只係件事咁發生，儘量依照實況寫出黎，咁係負面？我寫傳道人講道，話佢東拉西扯，時事溝幾個寓道故事，搞幾個爛gag，講下家事當係一篇道，我係攻擊佢？我老屈佢架家陣？最多咪話我要求高，份人mean。 

好多回應入面，鬧果班人D留言同樣係負面到爆，左一句「你無得救重生」、右一句「你係咪異端」(問呢句都痴線，我係異端唔通我自己會認呀，個個異端都話自己最正統，其他人先係異端架啦)，連我都甘拜下風，最少我從無懷疑同我意見唔同嘅人得救有問題或者係異端。即係話呢，散播負能量，人人有責，無人share，無人like，負能量唔駛人鬧自然會收皮，你係咁鍾意同我嘈，除咗恭喜之外我唔知講咩好。 

係呢D情況，我觀察到一個現象，係正能量橫掃教會之下，要個個喜樂無窮感恩不絕，底果浸，有一股極為強大嘅負能量暗湧：悲觀、消極、焦慮、憤怒，好似一個裝滿水嘅汽球一樣，我只要搵枝針篤一篤佢，即時啡啡聲有水噴出黎。如果用中國哲學思想去解釋，呢D叫禍福雙生，福兮禍之所倚，禍兮福之所伏，正面同負面係同一樣野黎。當教會不斷強調正能量正面積極，壓抑負面情緒，負面野反而因壓抑而壯大。情況好似我剛才所講，你逼一個唔開心嘅人要開心，佢只會越唔開心，但，你去逼一個開心嘅人唔開心，佢都係會唔開心，係呀，呢樣野係咁唔公平，世界係唔公平架啦，人生不如意事十常八九，睇開D啦。 

一般人好少理到，負面同悲觀有積極意義，以為一個人負面悲觀等於懶散同消極，日日坐係到怨天尤人，係錯架，悲觀唔同失敗主義，悲觀者更容易向事情嘅壞處諗，並且以最壞嘅結果作為自己行動嘅根據。失敗主義係覺得自己無論幾努力，最後會因為一D唔能夠控制嘅因素導致失敗，所以不如我唔好努力，慳返啖氣好過。 

用一個例子去解釋，天文台話今晚會落雨，但你出門口果下好好天，一個樂觀嘅人會諗，咁好天，點會落雨呀，就算落雨淋下雨都唔係壞事丫。一個悲觀嘅人會諗，雖然而家好天，但如果真係落雨咁點呢，拎返把遮好。而一個失敗主義嘅人會諗，拎遮又點，唔拎又點丫，個天要落雨，唔通我阻得到咩，拎唔拎都罷啦。 

教會今日變差，公共形象下滑，唔係由於悲觀負面造成，反之係過度樂觀自信，深信教會有神保守，長遠而言，即使我地乜都唔做，教會自己會變好，認為如果教會真係需要改革，上帝自然會興起新一個馬丁路德出黎，到時大家跟住佢行就得，毋須自己落手落腳。
 
所有問題唔係問題，而係信徒心態問題，只要信徒調整心態，變得積極樂觀，問題就不成問題。講道爛唔係由於講員唔認真預備或能力不足，係信徒過份挑剔，唔去提醒督責，相反用極為樂觀嘅心態去諗，或者講道唔係佢恩賜，或者佢有其他強項，而呢個「或者」從來無驗證過，現實可能係「或者」佢根本唔適合做傳道人，「或者」佢講道之外好多野都好爛好唔得。而前者樂觀得黎乜都唔做，傳道人講道爛由佢繼續爛，或者自己揀過另一堂崇拜返；後者悲觀得黎反而嘗試搵出背後原因，睇下有乜可以幫到傳道人改善。(當然唔排除有人為鬧而鬧) 

而家情況好似以色列人被擄之前咁，恃住有個聖殿有個約櫃，以為神同在可以戰無不勝，唔怕亡國，唔守律法，無惡不作。而家D基督徒就恃住教會係「基督的新婦」，無有怕，做乜都可以得到原諒同赦罪，教會係唔會滅亡，教會係會接納所有罪人，到第日新天新地一齊happy。上帝連自己聖殿都拆得時，你覺得佢幫個仔搞離婚，做唔做得出丫嗱。

你想一個人仆街冚家產嘅話，唔係去鬧佢，相反，你要不斷去讚佢，讚到佢天上有地下無，話比佢聽所有問題都唔係問題，一切問題會因為佢心態改變，而係佢面前會迎刃而解，唔駛努力唔駛刻苦。到佢面對真正問題時，自然無能力去解決，仆街仆到盡。