警告!

本人並沒有接受過任何正統神學訓練,所有發表內容,全屬個人信仰心得及教會生活經驗分享,敝blog負能量爆燈,如閱讀時感到不適,或出現任何不良反應,包括痰多咳嗽,夜睡不寧,神經緊張,潮熱汗出,心煩多疑,踎身起身見頭暈等徵狀,請即時停止,並向專業人士尋求協助。

2015年5月15日 星期五

現今騙徒手法層出不窮 (教會單身事工系列二十五)


係剩/乘/盛/賸/嵊/晟/鱦女當道嘅教會入面,尤其係弟兄,好似肩負起一份責任,正所謂生於亂世,有種負任!返得教會就有責任溝姊妹,成日凝住就會有個死鬼關德興師父走出黎:「剩女問題,男子有責!」耐唔時就有D三唔識七嘅渠頭走過黎同你講,教會咁多女仔點解唔揀返個,呀邊個邊個都幾好云云。

年過三十歲仍長時間單身,未拍拖亦無熱切意圖去追女仔,就會假設你私底下性格有好大問題,唔識同人相處,可能好似有五十道陰影嘅格雷咁鍾意玩BDSM,再唔係就直情覺得你根本就係基,或者兩者兼備,係一個鍾意玩SM嘅基佬。好彩我份人夠咸濕,最多比人懷疑鍾意玩SM,暫時未有比人懷疑過係基嘅。

所以有段時間我都好積極考慮過,係咪直接話自己係基,扮出櫃算數,起碼唔駛咁煩,咁到第日遇到自己鍾意嘅人,又可以話靠住神嘅大能拗返直,仲可以四圍幫明光社講見證賺下車馬費,都可以話係一舉兩得。

甚至有D人索性覺得你靈性上出左問題,「你係咪唔夠信心?」、「你係咪無祈禱?」、「你係咪無依靠神?」、「你係咪有罪未認?」、「你同神關係好唔好?」

根據聖經教導,由罪進入世界一刻開始,邊個無問題?你女朋友家下好完美咩!你男朋友唔會睇AV咩!你同奶奶相處好好咩!你好喜歡約你外母飲茶咩!

教會先製造出一堆 so called 單身問題,然後試圖幫你解決,以為可以解決呢D問題後,就解決到單身,所以就衍生出果D乜野提昇自我形像、擴闊社交圈子、認識自我、要你明白上帝係你身上有計劃等等,要你不斷咁去改。簡單黎講,係覺得你未夠好,未夠努力,要更加努力咁去贏取上帝為你預備果位。當然我唔係完全否定呢種講法,你努力到月入三十萬,我相信的確比較容易搵對象,但呢個係咪就係教會背後嘅目的呢?

咁係咪努力過就得,係咪努力過就搵到呢,我究竟係去搵一個我會愛佢,佢又會愛我嘅伴侶,定係搵一個Arch enemy出黎,好似悟空咁先要去界王星修練,等佢有足夠實力去挑戰撒亞人王子比達呢。咁我不斷咁改善自己同認識自己,擴闊社交圈子到Facebook有二千幾人時,同埋已經學識界王拳,戰鬥力有9000以上,係咪就可以搵到真愛呢?


咁傳道人呢個時候就會走出黎同你講:「哦,咁其實都無保證嘅。」

嘩,搞場大龍鳳出黎,搭咁大個雞棚引人落搭,最後先同人講無保證,現今騙徒犯案手法真係層出不窮。

(待續)

沒有留言:

張貼留言