警告!

本人並沒有接受過任何正統神學訓練,所有發表內容,全屬個人信仰心得及教會生活經驗分享,敝blog負能量爆燈,如閱讀時感到不適,或出現任何不良反應,包括痰多咳嗽,夜睡不寧,神經緊張,潮熱汗出,心煩多疑,踎身起身見頭暈等徵狀,請即時停止,並向專業人士尋求協助。

2015年5月7日 星期四

教會以外的見解 (教會單身事工系列二十二)

本身想寫教會弟兄遇到嘅困難,不過比我睇到呢篇文,雖然龍震天師父唔係教徒,但呢篇文卻幾分析到教會入面姊妹們係搵對像時的問題,而呢個問題,根本係源自教會對戀愛唔準確嘅教導引起。

玄學家龍師傅:3種想法 令你一直單身



「這即如一個人,大學畢業之後去找工作,他小心選擇,他要找到一份必定能夠做到退休的工作,他要肯定這一點,才會考慮上班。

另外,他也很清楚自己對工作的要求:人工高,不用受氣,同事及老闆都會對他好,而且沒有壓力。

因此,他待業了二十年,還未開始找到一份工作。

(中略)

但她從來沒有好好想過如何在「還未拍拖」的情況下能夠保證對方「必定對自己持續有興趣,而且一直交往,繼而結婚」。

這是思考的盲點,但很多人都會盲目的朝著這個想法去做,結果時間過了,甚麼都沒有開始。」

當然,大家要注意,呢個係一個比喻,唔話你搵戀愛對象等於搵工咁,搵工可以騎牛搵馬,拍拖我就極不鼓勵人咁做。

係教會氛圍入面,結婚是正路,分手是歧途。係教會好多人都會同你講,你唔打算結婚就唔好拍拖,你一拍拖就一定要諗幾時結婚,你分手呀,你一定係當初無好好聽神講,靠住自己血氣去揀男/女朋友啦,你唔夠信心呀,點解唔等候神為你預備最好果個,你快D返去祈禱認罪呀,爭在未問埋你有無同佢上過床,有無犯罪。梁家麟曾經為呢個問題寫左一本小書叫《憑誰意行》,講乜野先算得係上帝嘅心意,絕對唔可以單單成功同失敗去分別。

係呢種壓力下,近年觀察到好多信徒,到左所謂適婚年齡,佢地拍拖參加婚前輔導到結婚生仔,係可以響兩年內完成晒,即係話,扣返籌備緊婚禮嘅時間,佢地一拍拖無耐已經決定要結婚,而且婚後儘快要小朋友。

係教會內,好少人去考慮到戀愛事實上是一個過程,一個邁向婚姻嘅過程,當中唔係包生仔(咁唔排除當中有人唔小心生咗仔)。兩個人相處時,除非係相睇或者盲婚啞嫁,未必一開始就諗結婚一生一世。

有時候,真係要兩個人坦誠相對時,先會發現一D連自己都收到好入嘅諗法,有D去到結婚生仔之後先會察覺,甚至唔一定解決得到。我自己都聽過唔少故事,個女仔聽日都要嫁人,前一晚仲諗緊自己有無做錯決定。我亦見過,結婚相都影埋,酒席都book好,個女仔突然話唔嫁(唔知點解,呢D故事總係女方反悔,好少聽過男仔去到臨結婚果下縮沙)。教會卻要大家一拍拖就無甩拖,日後結婚生仔一條龍,造成嚴重嘅期望錯置。

簡單黎講,就係對未來嘅要求,對結婚嘅想像,對一生一世的期盼,錯誤地放咗係拍拖前,甚至係做朋友、約會果陣,要求大家係事前,就要好全面咁認識對方嘅價值觀、背景、鍾唔鍾意小動物、願唔願意生小朋友等等一大抽野,先決定同唔同對方開始。所以就明,點解係教會入面會流傳住一分戀愛守則,要人係拍拖前做完一大輪野,就係要符合呢種講法,務求令大家係拍拖前就處理晒呢堆野,順利踏上「正途」,一帆風順,婚姻美滿,白頭偕老,百子千孫,阿彌陀佛,善哉善哉。

呢個其實並唔係要求高同低,或者對愛情認唔認真嘅問題,而係先後次序,你點樣可以係兩個人單獨約會之前,就確認到對方係同你一生一世果位呢?當然無乜可能,結果就不自覺認為,既然唔能夠一生一世,就唔好浪費大家時間,一開始就拒絕對方,寧缺毋濫,有時候更加係朋友都唔願做,唔想浪費時間。

係呢種想法之下,唔好講到信與不信呢D咁大單,而係對方任何小問題都會被無限放大,因為覺得一旦食咗餐飯,接受追求就註定要同對方一生一世,分手就係無了解神嘅心意誤入歧途,第一次單獨食飯就諗:「對方第日會唔會係一個好爸爸呢?」

所以,教會唔少女仔係不乏有人表達好感,但就遲遲都未有開始拍拖,到一朝春盡紅顏老,就會「被恩賜」。 (待續)

沒有留言:

張貼留言