大台

大台係過去二十幾年，因住香港獨特嘅文化氣候，從來無出現過真正嘅競爭者，係絕對壟斷嘅情況下，真係整D垃圾出黎都有人捧場。結果係呢個咁獨特嘅環境，大台主事者，基本上大致失去左競爭力同埋隨時代革新嘅能力，雖然佢地一路走來，始終如一，問題唔係佢地有幾堅持幾盡力做得好唔好，問題係個世界變左時代變左人心變左，以前用nokia，而家用iphone，大家鍾意嘅野唔同左，以前會睇你台戲，今日個個識轉台。

一旦市場上出現有力競爭者，大台即刻手忙腳亂，無諗過D人會轉台，甚至會比人柴台，你叫佢地變？唔係唔想，而係佢地做左廿幾三十年都係咁做，要變，真係有難度，傳統太多，包袱太重，D人又老，佢地想變，未出街之外，已係內部比人屌死左。再講，而家壇野仲未死，差左少少之嘛，為咩要變，變就一定會更加好？變左嘅話，新客未搵到，又得失班舊客咁點算。所以無論變嘅動力，同變嘅能力，大台都無乜。

去到呢D位，大台通常會繼續鞏固自己做緊嘅野，認為大家只係一時糊塗，受人唆擺，點都係愛大台嘅。咁佢地通常會將原有嘅野玩得更大花更多資源，希望勾起大家集體回憶，重圓舊夢。通常去到呢一步，都係死亡嘅第一步，因為已經無新野賣，要靠老本，食老本都仲頂得時，變革意欲更加低。

對大台黎講，真係瀨一鑊勁反而係好事，一黎知道真係有危機，所謂生於憂患而死於安樂也，而且瀨一鑊勁嘅話，又可以向管理層問責，震走緊D西人，加速新陳代謝，大台跌30%，一十定會驚覺檢討從新出發。最危除嘅情況，係慢慢咁陰乾，但今年跌D人，下年又跌D人，穩定而慢速下跌，溫水煮蛙，到察覺問題時，已經散得七七八八，再想翻新已經無本錢。

係呀，講支聯會六四晚會大台。