少年，你太年輕了，你以為基督徒結婚前就唔搞野

基基=沒有婚前性行為，非基=好鍾意搞野，呢D係教會中人嘅二分法。


我識過D非信徒，佢地對貞操呢件事一樣有堅持，堅持程度不一定比信徒差。一直以黎香港基督教界從來無做過任何認真的調查，去睇下信徒之間婚前「出事」問題有幾嚴重，究竟同教外有咩分別。有時候我見到D信徒拍拖時展示出黎嘅親密程度，佢地私下唔搞野，我真係批個頭出黎比你當櫈坐。而從美國一D調查，就話比大家聽，其實教徒同非教徒呢個位無乜分別。耐唔耐呢，教會亦會爆一兩單因為婚前懷孕被逼結婚，佢兩個真係咁好彩一擊即中，第一次搞就有BB，你當我睇緊TVB咩。

問題我覺得，就算我作為一個信徒願意遵守教會規矩，係呢件事上，教會除左定出一條不可逾越嘅界線外，對信徒係無乜支援無乜實際可行嘅教導，甚至提出一D難以達成嘅要求，忽略左現代社會嘅變化。

例如，係古代，青少年第二性徵成熟時，父母就會安排佢地結婚，男仔早到十六七歲，女仔早到十二三歲就會結婚，難道以前D人三十歲結婚仲可以生成七八個咩，所以婚前性行為先顯得特別異常。女仔二十歲仲未結婚，係好大件事，涉及到父母失職。當時甚至係設有官媒(唔係環球時報果D)幫人拉埋天窗，條村有閨女未嫁，而地方官無盡力為佢搵對象，甚至會被罰。

想當年我返教會時，教會傳道人係鼓勵人遲婚，擔心人未夠成熟就結婚影響婚後關係。雖然話遲婚，不過斯托得當時建議嘅遲婚標準，係二十五歲！Any肥，總之教會係推遲信徒結婚年齡呢件事上好成功，加上社會種種原因，去到今時今日，女性三十，男性四十，都尚未算遲婚。現代人又發明左拍拖呢樣野，即係大家會有一段時間唔短嘅親密嘅關係，以教會個講法，拍拖時間太短未認識清楚又唔可以結婚，快極都要一兩年，正常可能要兩三年，而教會入面，又好興愛情長跑，拍七八年甚至十幾年拖大有人在，你話佢地當中無衝動過，我批埋另一個頭比你都得。

咁教會面對呢個情況時，有無提供過任何切實可行嘅方法，幫到大家去面對呢一大段時間？除左一味叫你唔好搞，唔好去旅行，唔好去對方屋企，飲杯凍水，祈個靚禱，講幾聲「我要對神有信心」，甚至叫你地拍拖時唔好成日單獨見，大家有無聽過D野，對你面對呢件事上，真係幫到忙呢，不妨同大家分享下。

近年教會仲癲到，鼓勵人早婚，以避免長時間拍拖，最終忍唔住搞野。真係要講一句：

教會離地，又點止單單係政治上呢。

後話

通常一寫呢D野，就有人回應：「你咁講，都係因為你想發生婚前性行為之嘛。」如果你思考能力只係去到呢種程度，我唔怪你，過去遇過好多呢D人，佢地程度只係去到可以談論人，而係唔能夠理解人提出嘅理念。係佢地心目中，反對死刑一定係死刑犯，出黎遊行一定係收左錢。我無自信可以說服你。

我惟有畫公仔畫出腸，我唔係去單單講支持或者反對，而係教會若然覺得呢件事係合符聖經兼對人有益，咁就要諗方法，點樣令到大家可以面對，即使係困難中都甘心願意堅守。今時今日，真係覺得從上而下逼係有用？定係阿崩叫狗，越叫越走。