教會面對批評時的典型反應

《誰消費誰的教會》時代論壇時代講場14.06.2016

這篇時代論壇投稿的題目應該叫做「教會面對批評時的典型反應」，大致如下：

1. 教會沒有問題，是批評的人自己有問題，才會覺得教會有問題
2. 批評容易，建設困難。
3. 教會有問題，教會只不過係罪人組成的群體，人有罪而不完美，所以教會也不完美。

我之前已經寫過好幾次，話教會入面遇到批評時，從來唔會認真諗下人地講得啱定錯，然後據理回應。只係不斷去攻擊批評者個人背景，研究對方係咪有問題，而唔會研究對方提出嘅問題，係非基督徒提出就係「非我族類，其心必異，一少撮離教者及無神論者亡我基督教之心不死」，係基督徒提出就彈一句「你係咪基督徒黎架」。今次罪名就係消費教會。

好似呢篇咁，其實佢都提過少少教會的問題，例如「講壇無道，傳廉價福音，小組格式化，佈道會樣版化」，咁呢D係事實定衊造呢，係衊造嘅話，作者有無為教會辯解呢？無！一項都無！你覺得人地鬧教會鬧得唔啱，唔係事實，你咪出聲駁囉，咪話自己聽過好多有質素嘅講道，傳緊重價福音，小組搞得有聲有色，佈道會多姿多采，無人唔比你回應。

但作者文章筆鋒一轉，落入最用嘅屬靈套語，叫做「批判總比建設易」，但之後呢，佢就開始批評D批評者，呢樣又唔做，果樣又無做，咁，佢又有無真正咁接觸到呢班所謂批評者呢，成疑。呢D又何嘗唔係「批判總比建設易」咩，佢有無真真正正走入呢班批評者入面，同佢地傾下，理解佢地遇到嘅問題，從而疏導處理，令佢地重上正軌呢。我遇過唔少所謂教會批評者，本身都曾經經歷過一段好熱心好投入嘅階段，最到後先灰心發怨言。我係好唔明點解教會入面有呢種迷思，就係出聲果班就一定無落手落腳去做，落手落腳就一定唔會出聲批評，我簡單劃個matrix都知會有四格架啦。難道我未辭職就唔講得老闆壞話咩，要辭左職先得，十個打工仔十個咪又係一邊做一邊鬧。

除左上面講果D，近年對教會面對最多批評係乜？話教會唔傳福音，唔做關顧，唔同未信者談道，唔為臨終病人祈禱呢D咩？剛好相反，係話教會淨係識關心信徒個人靈性需要，而忽略社會公義，將D人送晒上天堂就算，唔理人間現世痛苦。仲未計見到有D教會領袖向政權靠壟，係政治同社會事件上退縮唔敢出聲，搞下社會關懷都要低調處理。好難想像為何作者能生發出一種道貌岸然，不吃人間煙火似的樣式，唔知呢個世界呢幾年發生緊咩事。

黎緊個論點：「若沒有她不斷地在前線作您所謂愚昧、膚淺、荒謬多多的佈道或建立生命的工作；沒有她建立您眼中大量廉價的基督群體，您那重價恩典的培靈智慧又能再對誰高談闊論呢？沒有她那千蒼百孔的帶領或管理模式，您那超越時代又堅實的形而上的教會論豈不是英雄無用武之地？」咁講咪即係話，無人隨街掉垃圾，清道夫就無價值架喇；唔係有三級大火，消防員平日咁辛苦訓練又可以向誰高談闊論；世界上無罪人，耶穌就唔駛死，無我地，耶穌那超越時嘅救恩豈不是救主無用武之地，耶穌都係消費緊我地呢班罪人，咁呀。

再之後果段：「或者，一個大學教授奢望幼稚園教師具有博士水平本身壓根兒就不切實際；於我，教會的不完美，也涉及世界與人的不完美。但究竟你看之為遺憾還是缺憾美，這需要更深的愛的信念，人與教會之間，本身就是要相互配搭，在建設中成長，而不是在排拒中分道揚鑣。」

咪又係「教會唔完美，教會好多罪人，教會係由罪人組成，唔完美」，喂呀，教會唔完美，同教會好撚唔完美，同教會真係好撚柒唔完美，係有程度上分別架嘛！人無完人，但唔會代表欣宜同岑麗香係無分別，都係女人掛。咁批評者夠係罪人，唔完美啦，又話佢地唔啱。新教出現，咪就係馬丁路德頂唔順教會原來可以咁完美，以致去到腐敗失控嘛。喂呀，您成篇文咪係到「排拒」果班批評者，要同人分道揚鑣。

我想提一個呢類文章入面一個深層次矛盾，呢類文章其中一個回應重點係「人與教會之間，本身就是要相互配搭，在建設中成長」，即係某程度回應果班批評者，教會入面就有好多人唔係想行到咁前，唔一定要關心社會，搞社會運動，推動社會或政制改革。有好多人傳福音，做探訪，同人談道，為臨終病人祈禱守望，呢D事奉係有價值唔應該立亂批評，各有各做，就如經上記著說：「惟用愛心說誠實話，凡事長進，連於元首基督全身都靠他聯絡得合式，百節各按各職，照著各體的功用，彼此相助，便叫身體漸漸增長，在愛中建立自己。」

之但係，如果我地認同呢句聖經，就唔應該鬧果班批評者唔肯「傳福音，做探訪，同人談道，為臨終病人祈禱守望」，因為佢地咁做都有佢地嘅價值。有無諗過咁樣講係雙種標準呢？既然係各有各做不應互相批評，點解又要限死做某D野先算得上建設教會。

或者，我們需要主的聖光照亮我們的心房。

最後補句：「去鬧班批評者係容易，要解決批評者提出的問係困難。」