婚姻這種邪教

呢兩本書要一齊睇

 

而家先睇《婚姻這種邪教》，係有D out out地。如果要我用一句說話黎總結呢本書，我會話呢本書係一本「男人寫比男人睇嘅愛情小說」，我唔係話呢本野係BL，家陣就連BL其實都係寫比女人睇。 而係，世界上大部份愛情小說，係女人寫比女人睇，就算係男人寫，佢都會寫到成個女人咁，遮住個作者名你係唔會分得到。但呢本《婚》，卻係從一個男人角度，去講下咩係愛情，咩係結婚。

本文含粗口及粗俗用語，以及大量作者情緒之言，十八歲以下人仕，需要由家長伴同收看，敬請留意。

本書主要內容係一個基於真人真事的創作故事，關於作者一個朋友森哥，係籌備婚禮途中，滾大左另一條女個肚，結果分手收場。於是森哥原封不動咁用返ex個wedding plan同新果條女結婚，結婚無耐就發現，個肚有機會唔係自己，之後決定離婚。森哥仆唔仆街？仆街！但呢件事真唔真呢，我身邊都有一單係咁上下。有個舊同事話結婚，結婚前半年到約出黎食飯見下阿嫂咁，點知去飲果日發現，阿嫂另有其人，當中發生咩事我無深究。

正如我之前寫過，對男人黎講，結婚呢回事，係佢求婚成功之後就完左，之後發生乜事，個男人好多時都唔會在乎，連結婚對象都係。正如史兄係本書入面咁講，好多男人，只係想結婚生仔，同邊個結，同邊個生，佢係無乜所謂，總之係女人，眼耳口鼻西齊就得。

「好多人話要結婚，講穿咗，不過代表求其搵個，只要對象有女性特徵，有對波，有個西，加上生到仔就得。最好大家仲可以一齊供樓。」

係，男人有時就係咁仆街，而最仆街係，好多女人寧願要嫁畀個仆街，犧牲自己一世幸福，一生人點都要結一次婚，著一次婚紗，做一次主角，講一聲我願意。而通常有呢D諗法嘅女人，會有機會結多過一次婚。

好多女人話要同男人結婚，其實都係差唔多，佢哋要靚仔，有錢。大部份要嘅，不過係一個有相關特徵嘅人同佢結婚，例如有對大波或者靚仔，而唔係同一個特定嘅人，例如我非阿Joyce不娶。總之有個人肯結，我又唔係好抗拒就得。趕時間呀！係時候咧！差唔多啦！唔結等幾時？」

婚姻係種邪教，邪教最大特徵係乜，咪就係「不要問，只要信」囉，無自己思想，唔准質疑，質疑係罪，要絕對忠心，總之夠時間，要結婚，唔好問，總之結左婚就會幸福快樂，唔好諗，你結左婚都唔快樂？一定係你唔夠信心！點樣可以係邪教入面生活落去？就係不斷催眠自己，認為自己已經得到世界最幸福嘅野，呢個世界係邪惡，唔好聽佢地講，惟有我地得到救贖，係純潔嘅族裔，你地通通都會落地獄。陳到寫《婚姻這種耶教》，話婚姻教唔單止有教義、有儀式、有領袖，仲有信眾，我覺得應該仲要加多樣，就係婚姻教徒仲會好努力傳教，普渡眾生。

「對好多人嚟講，結婚唔使準備，唔須要講能力，但求有人肯結。再沉迷婚姻教多一點嘅，不單止自己結了，若你唔結，佢哋會覺得你係一個fucking loser。」

好似基督徒同人傳福音一樣，對方唔信，就成日覺得對方失救會落地獄一樣，對方一信，就乜都搞掂晒。婚姻教徒認為結婚，好多時包埋生仔，係人生最高價值，除婚姻外別無拯救，只要你結到婚，你人生嘅問題就係迎刃而解，個人會成熟左、負責任左、大隻左，自信返晒黎。你唔結婚，無論你嘅人生成就去到邊，你嘅人生就係唔完美，係一個fucking loser。

呢種結婚等於成功嘅觀念，究竟係邊到黎架呢，我幾懷疑係源自結婚要買樓，而買到樓係香港等於成功，所以久不久就會聽到有人同你講，結婚嘅原因，可以係抽居屋，夾份供樓同樓價回左D，而唔係彼此相愛想廝守終身。教會好多時話自己分別為聖，信耶穌有豐盛人生，同其他不信嘅人唔同，其他人就係空虛寂寞同凍，信耶穌就幸福感恩喜樂。但你睇真D，會發覺教會入面流行緊嘅觀念，都係結婚買樓生仔同老婆唔駛做，同世界上大部份人係無乜分別。聽到有人傳出婚訊，第一件事反射式就會問：「你第時住邊，買樓定租樓。」最關心唔係佢兩個性格夾唔夾，夠唔夠handle一段婚姻，而係買唔買到樓，講完一大輪之後，結論依然係，結婚當然係買樓好啦，租樓就無咁好喇，結完你仲要同屋企人住，幾十歲人仲要靠屋企真係好悲哀，you are such a fucking loser！

成個故事史兄兜兜轉轉問緊一個問題，兩個人好好地，做乜要結婚，結婚係咩野黎，正確啲黎講，係搞結婚。今時今日搞結婚，已經成為一項龐大無比嘅產業，再唔係兩個人承諾一生一世嘅決定，而呢場大龍鳳嘅目的，就係證明比其他人睇你有幾愛對方，而當中有30%係你一年都唔會見一次嘅親戚。

套用一句教會術語，呢D係律法主義、形式主義，本來一紙婚書行個禮，只係兩人相愛一個憑證，同埋兼顧法律上的需要，有同無，都唔會影響兩個人相愛呢個事實。但慢慢發展落去，形式取代實體，你兩個相唔相愛已經無人理，但你唔做晒呢堆野，就證明唔到你夠愛佢。即係好似黃子華話齋，你去飲，你會記得新郎個愛的宣言感唔感人，定條魚蒸得好唔好食呢？

(話時話，究竟係幾撚時，邊撚個開始，要個新郎要係接新娘同婚宴上去講一篇，完全無撚可能做得到嘅「愛的宣言」，當眾講一個大話去證明自己有幾撚愛對方，呢個咩玩法？)

而呢套野，係資本主義運作下，更加會無限膨脹落去。

今時今日變態到咩地埗呢？唔止有wedding planner，仲有proposal planner，係呀連求婚都有專業planner幫你諗埋度埋，拍埋片，等你第日婚宴上播，然後隻DVD就收係櫃桶底幾十年不見天日。而家結婚，再唔係兩個人之間，亦唔止兩個家庭之間嘅事，有係幾十人以至過百人生計嘅事，涉及金錢數以十萬計。再發展落去會有乜planner呢？Frist kiss planner？破處planner？「一生人得一次，你唔係唔想有個美好回憶掛，我地公司專誠請左係日本專拍AV嘅導演返黎，務求捕捉到你破處嘅珍貴一刻，我哋仲可以提供唔同場境同服裝，早鳥價只不過係$18888，為您留下最珍貴美好嘅回憶。」

甚至覺得史兄到肉過好多教會講婚姻、講關係嘅書，無他，正如佢所講，佢係一個仆街，咩類型關係都試過，有大量一手經驗。咁講結婚講拍拖，你信一個經驗豐富嘅人講多D，定係教會連拖都未拍過果個女傳道多D呢。嗱，我唔係話一定要有好多經歷先至可以牧養同輔導到人，否則天主教D神父同修女會面對同一個問題。而係，我近年實在聽過太多次「你未結婚你唔明架喇」，如果聽一次有十蚊落袋的話，我今日係加勒比海晒緊太陽啦，仲駛對住部電腦打文。

即係，教會入面，流傳緊兩套截然不同嘅教導，我哋可以接受未結婚，甚或毫無戀愛經驗嘅傳道人，係教會入面開戀愛講座教人點拍拖結婚，但未婚信徒就永遠唔明白，永遠低人一等。

你大可唔認同史兄對婚姻嘅睇法，但佢又講中咗一D關於男女關係、拍拖結婚好深層嘅問題，而你永遠唔會係教會入面聽到，所以我係幾推介呢本書比弟兄姊妹睇，我唔係話佢講嘅野一定啱，但你可以從中睇到，呢個世界入面，有人就係咁諗，唔好再困自己係教會四幅牆入面，得閑申個頭出黎睇下呢個世界。