有一種教會叫港女

有一種教會就好似同你中學就青梅竹馬嘅女朋友，你初初識佢時，覺得佢好純好靚好乖讀書好叻人又孝順又鍾意小朋友，雖然份人係保守左D，但絕對無損你心目中女神嘅形象。你同佢表白果下諗住打定輸數，點知佢接受左你。你同佢係埋一齊之後，為左佢開始改變自己，佢叫你唔好做果D野，你聽晒佢話，包括唔好打機，唔好咁夜訓，唔好學瑜珈，唔好食煙，唔好賭錢，唔好飲Starbucks，唔好睇星座，唔好走堂，唔好抄功課，唔好出貓，唔好去馬會兼職，唔好飲酒，唔好講粗口，唔好睇鬼片，唔好唔好睇AV，唔好打飛機，你都一一願意唔做(Well，除左睇AV同打飛機啦，OK，大家男人，明嘅)，因為你覺得，真愛係要付出，真愛係要犧牲，兩個人係埋一齊係要互相遷就，況且自己都覺得佢講D野有道理。因為同佢係埋一齊，開始努力讀書，成績有進步，更加令你覺得一切係理所當然。

直到你有一日入左大學，識左D新朋友，開始有D唔同諗法。你係hall到識左個朋友叫阿強，阿強同你有完全唔一樣嘅成長經歷，阿強入到大學已經又煙又酒又爛口又蒲機鋪又走堂去馬會兼職，對日本AV女優如數家珍，絕對係所有人口中唔好群咁多果D人，點解佢都讀到入大學，點解佢咁都溝到女，佢條女完全唔會管佢話邊d做得邊d唔做得，你私底下都有兩分羡慕阿強呢一段關係，咁毫無束縛自由自在，點解自己背住條女打個飛機都咁大罪咎感，而阿強同條女開房完全唔當係一回事。有意無意係自己條女面前提起阿強，一提起條女就黑面，話佢地呢D邊係愛，愛點會無限制同管教，話阿強只係鍾意同條女扑野之嘛，叫我唔好群咁多呢d人。雖然對呢段關係有D疑問，但果時你仲係好鍾意佢，成日同佢係埋一齊，諗住第日一定要娶佢，認為隨時間可以慢慢改善。

到出黎做野，問題就更加多，女朋友仲好似以前返學咁，一個星期要見幾次，星期六日一定要比晒時間佢，平日仲要加一晚，有乜特別日子又要出黎見，你返份工五日半連加班，已經無左半條人命，佢一D都唔體諒，每次拎出黎傾，可唔可以見少一日，休息下或者做下自己野，每一次最後都會鬧交，唔係，係比佢鬧，每一次去到最後，佢就用對水汪汪嘅大眼睛望住你講：「你有我陪你唔係最幸福最好咩？你係咪唔想見吖，你係咪唔愛我喇？你係咪唔記得當初點解會追我？你係咪唔記得我以前對你有幾好？」結果，每一次你都心軟，放工得返半條人命都要陪佢。

當你一出黎做野有收入時，佢就問你攞錢開聯名戶口，話為左大家嘅將來，一定要買樓。你問過佢好多次，點解一定要買樓，樓價咁高，何必摸頂入市，租住先唔得咩，佢答你，問題唔係層樓到(咁又係你話要買)，而係為左有一頭安穩嘅家，係為左我地嘅未來，而點解一頭安穩嘅家同未來，係邏輯上一定要買樓呢，點解唔買樓就無未來，當年好多人搞到家破人亡就係因為有層樓變左負資產，不過，你唔係諗住同女人講邏輯掛。你惟有同佢講，初初出黎做野，又要比家用，又要儲錢讀書，又要還grant loan，又想去下旅行見識呢個世界，真係無咁多錢淨，希望佢可以體諒下。你一講，佢就黑面，話男人擔起頭家係責任，係天經地義，你唔畀即係偷左未來個家嘅錢，又唔係叫你儲好多，一個星期食少兩餐就係到啦。好喇，死慳死抵下終於每個月拎到D錢出黎放入戶口，貯左一排，你想問佢戶口而家有幾多錢，第日買樓想買邊到，佢死同唔肯講比你知，話：「你唔係唔信我嘛，D錢比得我管就要信我。」(屌，乜唔係儲錢為將來，點解D錢變左你管，我唔問得。)你為呢個問題，同佢鬧過無數次交，唔係，係比佢鬧。

再做左幾年野，你越黎越發覺同你女朋友有距離，佢越黎越似高登仔口中嘅港女，佢好似仲停留左係中學時代，無長大過。佢依然追緊TVB劇，佢依然迷緊黎明，佢依然每個星期去Trendyland睇下有乜Hello Kitty野新出，然後興高采烈咁用BB聲同你講，「BB，你知唔知我今日買左D乜」(成三十歲人，B乜撚野B唧)，佢依然覺得王晶D戲好好笑，叫你陪佢去睇《賭城風雲III》。每一次出黎只不過係行街睇戲食飯，Loop足十幾年都無變過，你唔係無試過帶佢去博物館/睇話劇/行下書局/去電影節，佢次次唔係話好悶就係話睇唔明，搞到你自己無晒癮，寧願自己一個人去。

係雨傘運動期間，無意睇到阿強個Facebook，發現阿強同佢女友換左黃絲帶頭像，當日放催淚彈時係現場，之後仲走左落佔領區訓左幾晚。而你呢，連同條女講下件事嘅勇氣都無，因為心入面知道最後一定會鬧交，唔係，係比佢鬧。因為上次去佢屋企食飯，發覺佢老豆係藍絲黎，係大陸有生意，開住有線新聞台鬧足一個鐘，而你一句聲無出過。因為你心知最後個對答會係咁：「我老豆上面有生意，你都唔想佢因為第時個女婿係上面搵唔到食掛，總之你唔好行咁前啦，政治呢D野咁複雜唔到我地理，最緊要我地平日孝順父母，我地只不過係普通人，做唔到幾多野。」

雖然佢成日將個愛字掛係口邊，成日同你講愛係乜，愛係凡事相信凡事包容，愛係要互相遷就忍讓，唔好去改變對方，要接納對方就係咁。驀然回首，發覺同佢拍拖拍左十幾年，係凡事我要相信佢，係凡事我要包容佢，係凡事要遷就忍讓佢，接納佢，咁多年黎，嘈完傾完，最後都係你有錯，最後要改變嘅都係你，你從來未見過佢為呢一段感情，為你改變過D乜。

呢一刻分手，十幾年感情又好似一時放唔低，但諗一諗，未來幾十年，你真係想同呢個人過埋下半世？