我係咪做緊社企

 

唔少職場見證，係講條友覺得份工營營役役無乜意義又無乜前途，結果走出黎搞社企，然後走去請啲弱勢社群。由於我唔熟社企，所以唔敢話佢地咩野，不過身處一間商業機構中作為一個中層管理者，又係咪事必營營役役無意義呢。

我而家間公司，請咗唔少聾啞人士、少數族裔、自閉症同精神病康復者。我而條line十五六人，已經有三個聾啞人士、一個自閉症、兩個少數族裔，新移民普遍到已經唔計。

當然背後驅動力唔係咩「要讓人參與在創造主的美善創造裡，並作出貢獻」，而係：「X！好X多野做，請唔到人」，去到而家只要有手有腳肯返工就請。

作為一間資本主義下萬惡賺到盡剝削員工的大企業，敝公司所提供到的機會同回報，以量同質黎講，相信係好過唔少社企。人工我地係照跟巿場價比full pay，一樣有在職培訓，甚至而家開始想搵同事學埋手語方便溝通。

半題外話，由於之前失業去咗上再培訓，閑時會收到機構彈啲job過黎，尋日收到份某教會社企請包餅助理，大家不妨估下出幾多錢。

$9000

朝八晚六長短週，除返開$45個鐘。

作為資本主義下萬惡賺到盡的大企業，我都唔敢開呢個價去請人，呢個價可以話係脫離巿場，最多只能請到退休人士再就業過日晨果種。好多話大公司用最低工資請人剝削員工，以我過去經驗計，最低工資day one實行開始，未試過打工間公司可以用到最低工資請人。(以現時最低工資40蚊計，返26日九個鐘，月薪實得$9360，試下打開任何求職網，睇下仲有無人用緊一萬樓下請人？)

我覺得，幫助呢班員工融入工作，提供培訓令佢地發揮所長，唔好刻薄佢地，唔好歧視佢地，唔好因為佢地殘障就比少啲人工，當然亦唔會因此而降低要求而做少咗野，我地幾乎係當佢一個常人咁用。身為一件塵世間迷途經理仔，我發覺做緊啲野其實同一般社企講無兩樣。

呢樣係公司政策，但似乎又真係同時實踐緊「要讓人參與在創造主的美善」，兩者未必分得開。

教會內經常對商業機構有種偏見，認為必然係資本主義萬惡的化身，剝削員工無所不用其極，但係一般公司打滾咗咁多年，睇到又未必係咁。商界其實係好講信用，無信用鬼同你做生意，亦係好均真，一分耕耘一分收穫呢類大道理好多時係行得通，佢地兼顧到的層面，比唔少打正旗號的社福機構仲要強。

職場召命好多時唔係風風火火，要搞多壇野出黎做，呢個我覺得係教會講職場召命時一個弱點，好想強調你可以係份工到搵到人生召命，但佢地舉啲例子呢，同時又證明咗你唔會係份工到搵得到。我成日話，呢類所職召命出路後往往得三個：

走出黎搞社企；

一係覺得職場無牧養，走咗去做傳道人，想返轉頭牧養職場；

開機機搞講座同培訓。

三樣都係離開咗我地所謂一般的職場，真係好一言難盡下。

我覺得呢，不如鼓勵人留心身邊一啲好微少嘅野，有可能真係得你見得到並且會著手改善，唔一定去做另一樣有意義嘅野先有意義，而係從生活中發掘出黎。

下一篇講下我係點樣係份工入面，尋找到工作的意義。