又半個月無update過，臨新年被業主收樓，顧住搞搬屋。
信仰百川開始時，對我黎講已經勁吸引，唔接受投稿，反而係由編輯搵人供稿，𧄧以控制文章質素，而且題材非常廣闊，真係做到百花齊放的效果，寫手之間唔唔同意見係上面互片時而有之。唔似得好似時代論壇咁，連啲投稿都有所謂「時壇體」，即係「從XXXX看YYYY」。
由於當時百川係唔接受投稿，而我亦唔識得入面任何人，結果得個恨字。到有一日，突然間張博搵我，話我一篇係時代論壇的投稿寫得唔錯，可唔可放係信仰百川上，我當然係吐哺倒履。咁就開始自己的寫作生涯，由2015加盟開始，寫咗近三百篇文，平均一星期有一篇，以業餘計算多產下，算係有個機會了卻小時候的作家夢。
我無乜高言大志、人生召命、聖靈感動之類，一向秉承蜘蛛俠果句「能力越大，責任越大」的相反，「能力無乜，責任無乜」，絕對無諗過咩改革教會、牧養他人、激勵人心、開拓輿論、監察教會之類，果啲大野留返比教會啲大粒搞啦，唔好搞我喇，佢地分分鐘有錢收我又無。我純粹係鍾意寫文發表，甚至係無打算同讀者交流，所以亦無開過社交媒體去聚人。
香港教會過去一直乜所謂教內輿論空間，無論時代論壇好，其他乜報物報都好，始終有一個現象，佢地搵親都係有頭有面有鱗有角的人，一般平信徒的聲音好少可以浮上水面，頂多係得時壇個眾議園比人投下稿。即使係咁，去投得稿果班，好多本身係牧者、博士、牧師博士、之類。
所以我只係有一點想做，以一個平民視角，去講返下，下面嘅人係點睇教會入面呢啲事，我從來唔覺得自己有咩咁敢言，好多野係平鋪直敍咁講返出黎，有好多野對我而言，係連批評都談唔止，原來對好多人黎講已經好有挑戰性。
魚相忘乎江湖，人相忘乎道術。
江湖再見。
留返個聯絡方法
百川個網話一星期後貼出最後一帖，始終最後一帖連影都冇埋。舊年門徒媒體話百川徹底變質，到今年2022開始仲直頭摺埋，成件事不明不白，連遺言都冇。
回覆刪除龍井樹
信門媒一成，雙目失明
回覆刪除信仰百川起初真係做到"海納百川"，唔同宗派嘅人喺度互相交流，亦寫明係要聚集一班用腦嘅人 (a group of thinking people)。但唔接受投稿，永遠都係自己邀請人地寫作，結果變成選擇性地邀請某啲人寫多啲，間接令平台愈來愈偏頗。
回覆刪除收尾呢幾年嘅信仰百川其實已經同時代論壇冇乜分別 (信仰百川個英文名叫得做Faith100，其實都暗示咗搞手來自邊啲群體)。我直頭喺平台上面見過有抒情文，俾著係初初建立平台嗰陣編輯一定ban。
初頭有過百寫手，到最後活躍得返十幾個左右，算係完成咗歷史任務
刪除我好早就放棄咩改變教會，耶穌在世都無改變法利賽人，自己同神既關係先最緊要，我寧願少接觸都唔想被佢哋影響
回覆刪除信仰百川其實呢兩年都越來越差，你幾乎睇唔到批判教會嘅文章，或者分析教會現況，有關時事同教會嘅關係。可能黎黎去講到口臭或者唔敢講所以冇嘢講。後尾得返d 海外牧者個人channel 更加係唔知咩事，貼唔近香港信徒情況，明明想到地，最後就離哂地
回覆刪除渠道多咗，好多人去返自己地盤寫野or錄片
刪除