警告!

本人並沒有接受過任何正統神學訓練,所有發表內容,全屬個人信仰心得及教會生活經驗分享,敝blog負能量爆燈,如閱讀時感到不適,或出現任何不良反應,包括痰多咳嗽,夜睡不寧,神經緊張,潮熱汗出,心煩多疑,踎身起身見頭暈等徵狀,請即時停止,並向專業人士尋求協助。

2015年3月2日 星期一

天呀!這居然是教會單身活動設計的秘密,不看讓你後悔一輩子!

教會單身事工系列之二

市場上一早出現專針對基督徒的配對服務

今次講下內容設計,教會內絕大部份這類 so called 單身事工嘅設計都好騎呢,永無話會明目張瞻單刀直入,幫大家互相介紹。即使參與者有拍拖談戀愛、組織家庭、想娶恨嫁嘅想像同需要,主事人絕對唔夠膽話整個 table for six ,直接比佢地相睇,或者有意無意嘗試搞任何穿針引線嘅活動。點解?最主要咪就係怕死,怕負責任,拍孭鑊,怕介紹左唔知咩人比你囉。

我真係好想講,即使教會唔肯搞唔夠膽搞,提供唔到機會,你唔搞,就覺得呢個世界無人會搞。有需要嘅信徒,有手有腳難道自己唔識出去識人?有觸角嘅商人,難道就唔會設計活動賺呢班人錢。我知大把基督徒,特別係女性,一樣會出去畀錢參加呢類型嘅 speed dating 。當教牧唔敢做,擔心係教會都唔知識埋D咩人時,卻好放心畀佢地週街識人?定係覺得佢地週圍識人出左事,係自己攞黎衰,教會唔需要負責?咁當然我更加唔明,點解教會覺得呢D活動一定好多壞人。

「你做乜唔依靠神,等佢留比你果份最好嘅禮物,而要依靠人嘅行為呢?你知唔知上帝好傷心架。」

多做多錯,少做少錯,唔做就永遠唔錯。

船頭驚鬼,船尾驚賊,船中間又驚沉船走唔切,所以活動設計永永遠遠唔知放係邊,變成諸如認識自己、提升自我形像、擴闊社交圈子、明白神對你生命有最好嘅安排等等等等九唔搭八嘅內容。OK,Fine,退一萬步黎講,你要搞呢堆野無問題,問題係呢堆野係咪班單身人士想要同需要呢?有無派下問卷問下,有無搞下 focus group 聽下意見,佢地係咪真係好唔認識自己,佢地自我形象係咪真係好低落,社交圈子真係好狹窄,係咪真係唔知神對佢地嘅生命有所安排,據我所見,無囉。定係覺得派問卷,做 focus group 呢D係屬世嘅活動,我地係需要屬靈嘅帶領?到最後,根本就係一班教牧閉門造車度個活動出黎叫你參加而你又一方面心思思想去睇下發生乜事諗住睇下識唔識到人半推半就咁去完發現上左賊船然後出黎呻!

所以當聽到教會搞 Single Camp 時,我即時魂遊像外,見到異像,見到天上面有樣野飄落黎,好似一塊布,四隻角綁住放落黎,一直飄呀飄呀飄到我前面,我定一定神咁睇,見入面有本書仔,上面寫住: 

營活生身單夜兩日三

我聽見有聲音對我說:「喂,打開本野睇下!」我說:「主呀,呢本乜春黎架?」那聲音回答說:「睇左你咪知囉,問問問。」

我打開一睇,原來係 Single camp 本 booklet 。(待續)

金德寶,你嘅聲音我已經聽見喇!

「你 們 祈 求 、 就 給 你 們 . 尋 找 、 就 尋 見 . 叩 門 、 就 給 你 們 開 門 。」


待續

沒有留言:

張貼留言