警告!

本人並沒有接受過任何正統神學訓練,所有發表內容,全屬個人信仰心得及教會生活經驗分享,敝blog負能量爆燈,如閱讀時感到不適,或出現任何不良反應,包括痰多咳嗽,夜睡不寧,神經緊張,潮熱汗出,心煩多疑,踎身起身見頭暈等徵狀,請即時停止,並向專業人士尋求協助。

2015年3月2日 星期一

教會話要舉辦Single Camp!知道後我震驚了!教會單身事工你所不知道的內幕!

教會單身事工系列之一

          
(丫頂~而家D標題係咪要寫成咁先有人入黎睇)

「呀….當教會叫我去Single Camp的時候,其實我是拒絕的!因為我覺得….呀…你不能叫我去、馬上去。第一,我要試一下,我又不想說,你去完一個Camp之後以後會很感動,那Camp,很感恩呀!很有得著!很利害!結果會友一出來一定罵我,根本沒有這種Camp,證明上面那個是假的…..我說先要給我試一下。」

是咁的,為免我又比人覺得成日吐槽教會活動,然後事後又比人串話做乜事前唔出聲同幫手,事後先出黎吠。大佬呀,事先我知道係咁,我直情唔去啦,人生苦短呀,我都係瀨完野出黎呻啫,比下面好喎。所以,今鑊我決定吠左先。

今次我就以一名資深單身信徒,現身說法講下教會搞呢類活動嘅問題,期望日後有所改善。

作為一個資深信徒暨單身人士,係教會參加過無數so called單身事工、戀愛講座、乜乜七七等等,我從來未遇過一個活動真正能夠切合單身人士(即係我)嘅需要,照顧到佢地生活實際面對嘅挑戰同困難,反而加深左一D stereotype,甚至造成一D不必要嘅傷害。

例如有次參加教會so called單身事工,請到余德淳黎講talk,余德淳喎!講talk喎!成個talk內容就係圍繞如何提升自我形像;如何與人溝通,建議你同人講野係要望人,要懂得好好愛自己,連自己都唔愛就難要求人愛你,神係愛所有人呀,聽完我真係眼都突埋。當然我唔怪責余德淳,因為佢對我地個群體唔認識,只係靠教牧提供嘅資料,但聽完佢咁講,我完全清楚一班教牧係點睇呢班單身人士,就係不懂自愛,自我形像低落,不識同人溝通,講說連望人都無膽,一大群自怨自艾嘅毒撚!

我 X!X!X!X!咩!

又例如我,作為一個資深單身弟兄,係教會經常聽有人同我講:「教會咁多女仔,做咩唔揀返個。」喂,你唔尊重我都尊重下教會班女仔,講到好似去街市買西瓜咁容易,揀~!返~!個~!

我亦從來未見過,有人因為參加過教會so called單身事工後,真係有所發展,係埋一齊拍拖繼而結婚。

即係話,若果以脫離單身為目標的話,教會搞呢類活動成功率奇低,無法對準目標。雖然佢地每一次都會話自己成功左,每次都好感恩好感謝主咁,不過其實返得耐教會都知,除左安息禮拜唔會咁講之外,搞乜野最後都係呢幾句,咁點解教會仲要花精神時間心機去搞呢D活動,浪費信徒一個大好週末呢。

我之後會以幾個方面去講下,教會呢類型活動失敗嘅原因。

待續


沒有留言:

張貼留言